ROMANOS 9 - Quichua Imbabura Bible

Israelcunatami, Taita Diosca agllashca

1Cristota crij cashpami, na llullashpapacha villajuni. Ñuca shungupica, Diospaj jucha illaj Espiritumi, ñuca imashna causajujta yarichijuhuan.

2Ñuca ninanda llaquirishcata, ñuca shungupi punllandi nanachishpa purijujtami yarichihuan.

3Ñuca llacta aichamanda familiacunata ninanda llaquimandami, paicuna quishpirichun ñucara Cristomandaca anchuchi tucushpa, llaquichi tucungapaj munani.

4Paicunaca, israelcunami. Paicunatami Diosca, paipaj huahuacuna cachun chasquishca. Paicunamanmi, pai punchapambagu cajtaca ricuchijushca. Paicunahuanmi Diosca, ari nijushca. Paicunamanmi, mandashca shimicunatapash cushca. Diosta mañashpa, paipajta ruranajuchumbashmi cushca. Paicunamanmi, imagutapash carashapachami nijushca.

5Paicunami, ñaupa taitacunamandapacha miraicuna. Paicuna puramandami, Cristoca runa aichayu tucushpa shamurca. Paica, tucui imatapash mandajuj Diosmi. Paitaca, causaita causaicaman ninanda alicachishunchi. Shina cachun.

6Israelcunaman Taita Dios carashapachami nishcataca, paillata pactachircami. Ashtahuangarin ñaupa taita Israelpaj miraicunaca, na tucuilla israelcunachu.

7Abrahambaj miraicuna cashpalla, na tucuilla paipaj huahuacunachu. Ashtahuangarin Abrahammanmi, Diosca cashna nirca: “Cambaj churi Isaacpaj miraicunallami, cambaj huahuacuna ni tucunga” nircami.

8Shina nishpaca, chai mirai purallata cashpapash, na tucuilla Taita Diospaj huahuacuna cashcatami yachachijun. Ashtahuangarin Dios carashapachami nishcashna miranajuj huahuacunallami, ña paipaj miraicunapacha tucun.

9Abrahamman Dios carashapachami nishpaca, cashnami nirca: “Ñuca shamusha nishca huatapimi, cutin shamusha. Chai huatapimi, Sara shuti cambaj huarmica, shuj jari huahuaguta charinga” nircami.

10Shinallata ñucanchi ñaupa taita Isaacpaj huarmi Rebeca tarishca ishcai jari huahuapash, chashnallatami tucurca.

11(Chai ishcandi huahuacuna nara huacharishpaca, ima alita, nalitapash nara rurarcachu. Ashtahuangarin Taita Dios imata rurangapaj munashcapash, ñaupamandapacha pai agllashcashna causachunmi, chashna carca. Imatapash nara rurajpillatami, pai munashpa agllai ushashcata ricuchirca).

12Chaimandami Diosca, cashna nirca: “Punda churimi, jipa churitaca servijunga” nircami.

13Escribishcapica cashnami nijun: “Jacobotami juyarcani, Esautaca na ricunayachircanichu” nijunmi.

14Shina cajpica, ¿imatata nishun? ¿Taita Diosca imatapash cashcatapachaca na ruranllu ninachu canchi? Napacha shinachu.

15Diosca, Moisesmanmi cashna nirca: “Maijandapash ñuca llaquingapaj munashcatami llaquisha. Shinallata maijanda ñuca juyangapaj munashcatami juyasha” nircami.

16Shinamandami, agllahuashcanman yashpa imatapash rurajushcamandalla agllai tucunaca na tian. Ashtahuangarin agllai tucunaca, Taita Dios llaquishcamandallami tian.

17Shina cajpimi Dios escribichishca Shimipica, Faraonman cashna nirca: “Ñuca ninan ushaita charijta cambi ricuchingapajmi, candaca jatun mandaj cachun churarcani. Ñuca shutita tucui cai pachapi villanajuchunmi, chashna churarcani” nircami.

18Shina cashpami Diosca, pai maijandapash munashcatalla llaquin. Ashtahuangarin maijandapash, shunguta shinlliyachingapaj munashpaca shinlliyachishpami saquin.

19Shina cajpica, cashnachari nihuangui: “¿Imamandata Diosca llaquichigrin? Pai imata rurangapaj munashcataca, ¿pita jarcai ushashca?” nihuanguichari.

20Ashtahuangarin canga, gentellami cangui. ¿Ima cashpata, Taita Diostaca nalicachijunguilla? Alpa mangaca, ¿paita rurajtaca: “Ñucataca, ¿imashpata cashnata rurahuarcangui?” ningachu?

21Mangata ruraj runaca, ¿nachu turutaca imatapash rurai ushan? ¿Nachu chai turumandallata shuj mangataca alipajpash, shujtaca nalipajpash rurai ushan?

22Shina nishcashnami Taita Diosca, pai ninanda fiñarishpa llaquichingapaj ushaita charishcatapash ricuchijun. Ninanda fiñarishpa tucuchingapaj shicanyachishca alpa mangashna cajpipash, paica na tucuchishpa shuyajurcallami.

23Paica, ninan punchapambagu cajta ricuchingapajmi, chashna shuyajurca. Chaitaca, juyailla alpa mangatashna, pai llaquishpa agllashcacunamanmi ricuchirca. Punchapamba llactaguman paicunata pushangapajmi, ñaupamandapacha alichirca.

24Diosca, na Judea llacta gente puramandalla cayarcachu. Ashtahuangarin na Israel puramandapashmi, ñucanchita cayarca.

25Oseas shuti libropipash, cashnami nijun:

“Na ñuca agllashca gentecunatami:

‘Ñuca agllashcacunami canguichi’ nisha.

Ñuca na juyashcatami: ‘Ñuca juyashcami canguichi’ nisha.

26Maipimi paicunataca: ‘Na ñuca agllashcacunachu canguichi’

nishca pushtupillatami: ‘Causajuj Taita Diospaj

huahuacunami canguichi’ ni tucunajunga” nijurcami.

27Shinallatami Isaiaspash, israelcunamandaca cashna nishpa caparijun: “Israelcunaca, mama cucha manñapi tiajuj t'iyu alpashna ashtaca ashtaca cashpapash, huaquin puchushcacunallami quishpichi tucunga.

28Jatun Diosca, pai imata rurashpa llaquichisha nishcataca, imatapash cashcatapacha rurashpami, cai pachapica ñapash pactachinga” nijunmi.

29Isaiasca, punda huatacunallatami cashna nijurca:

“Tucuita Mandaj Jatun Dios, shujlla

miraitapash na saquishca cajpica,

Sodoma shuti puebloshnami tucurinchiman carca,

Gomorra shuti puebloshnami canchiman carca” nijurcami.

Crijpillami, imatapash cashcatapacha rurachun chasquijun

30Shina cajpica, ¿imata nina canchi? Na israelcunaca, imatapash cashcatapacha ruranata na catishpapash, imatapash cashcatapacha rurashcatashna chasqui tucunatami tarirca. Crishpami, imatapash cashcatapacha rurashcashna chasqui tucurca.

31Ashtahuangarin israelcunaca, imatapash cashcatapacha rurangapaj mandashca shimicunata catinajushpapash, na pactachircachu.

32¿Imamandata shina tucushca canga? Paicunaca na crishpapash, mandashcapi nijujtallami catinajurca. Mandashcapi nijujtalla ruranajushpami paicunaca, rumipi nitijanshna tucushca.

33Escribishcapimi cashna nijun:

“Ricuichi, Sion shuti pueblopimi nitijashpa urmachun, shuj jatun rumita churani.

Pipash paita crishpaca, na pingai tucungachu”

nishcashnami nitijanajurca.