1Sion shuti pueblota juyaimandaca, napacha upallayashachu. Jerusalenda juyaimandaca, napacha samashachu. Imatapash cashcatapacha pai ruranapash punchapamba ricuringacaman, quishpirinapash michumbi michata japichishcashna ricuringacamanmi, chashna casha.
2Chashna cajpimi shuj gentecunaca, imatapash cashcatapacha can rurashcata ricunajunga. Shinallata tucui jatun mandajcunami, can juyailla rurashcataca ricunajunga. Chaipimi Mandaj Diosca, paipaj shimihuambacha candaca mushuj shutita shutichinga.
3Mandaj Diospaj maquipica, punchapamba coronagushnami cangui. Cambaj Taita Diospaj maquipica, jatun mandajpaj umapi churana diadema nishcagushnami cangui.
4Canga cutinga napacha: “Jichushca pueblo” ni tucunguichu. Cambaj llactatapash napacha: “Llaquichi tucushca llacta” ninajungachu. Ashtahuangarin canga: “Ñuca munashca huarmi” ni tucunguimi. Cambaj llactapash: “Ñucahuan cazarashca huarmi” ni tucungami. Mandaj Diospaj juyaica canhuanmi canga. Chaimandami cambaj llactaca, paihuan cazarashcashna canga.
5Jarihuan nara tacarishca cuitsahuan, chairalla viñai huambra cazarashcashnami, cambi causajcunapash, canhuan cazarashcashna causanajunga. Shuj cusa paipaj huarmihuan cushijunshnami, cambaj Taita Diospash canhuanga cushijunga.
6Jerusalenlla, cambaj muyundi pircacunapica, cuidajcunatami churarcani. Paicunaca, tucui tuta, tucui punlla napacha upalla cangachu. Mandaj Diosta yariashpa causajcunaca, napacha samanachu canguichi.
7Jerusalenda pai cutin alichingacaman, cai pachapi causajcuna Jerusalenda alicachi tucushca cachun churangacamanmi samachunga, na saquina canguichi.
8Mandaj Diosca, ninan ushaita charij, paipaj ali lado maquita alsashpami, cashna nishpa juramenturca: “Cangunata fiñajcuna, cangunapaj trigota apashpa micuchunga, napacha saquishachu. Canguna tarpujpi fucushca uvasmanda vinota, na rijsishca runacuna ufiachumbash, napacha saquishachu.
9Ashtahuangarin cangunallata cozechashpa micushpami, Mandaj Dios ñucataca alicachinguichi. Uvasta tandachijcunami, ñucapajlla huasi patiocunapi vinota ufianajunga” ninmi.
10Pueblo pungucunataca yalimuichiyari, yalimuichiyari. Ñuca agllashcacuna yaicuchun, ñanda fichaichiyari. Ñandapash, rumicunata anchuchishpa ali llambullaguta alichichiyari. Tucui shuj gentecuna ricuchun, banderata shayachichiyari.
11Ricuichi, Mandaj Diosca tucui cai pacha manñacunapi causajcunatami, cashna nirca: “Sion urcupi causajcunataca, cashna nichi: ‘Ricuichi, cangunata Quishpichijca ñami shamujun. Pai caranacunatami apamujun. Paica rurashcacunatami ñaupachimujun’ nichiyari” nircami.
12Paicunataca: “Mandaj Dios quishpichishca, jucha illaj gentecuna” ninajungami. Can Jerusalendapash: “Dios juyashpa na jichushca Pueblo” ninajungami.
Who We AreWhat We EelieveWhat We Do
2025 by iamachristian.org,Inc All rights reserved.
