1Suhita nishca Bildad shuti runami, cashna nishpa tigrachirca:
2“¿Ima horascamanda chashna rimajugringuilla? ¿Can rimashca shimicunaca, acapana huairashnami canga?
3Taita Diosca, ¿japinatallata japinataca na cushpa saquingachu? Tucui Ushaita Charij Diosca, ¿imatapash cashcatapacha ruranataca, nalita rurashpa saquingachu?
4Cambaj huahuacuna paita na cazushpa, juchata rurashcamandami, paicunataca chai juchapillata saquishcanga.
5Canga, tutamandata Taita Diosta mascashpa, Tucui Ushaita Charij Diosta mañangui.
6Aligutalla rurashpa mapa illaj causangui. Shina causajpica, paica canda yaringapachami. Imatapash cashcatapacha rurashpa causana cambaj huasipipash, imagutapash ashtahuanmi mirachinga.
7Canga, ashatalla punda charishca cashpapash, jipa punllacunapica ashtaca alicunatami charingui.
8Cunanga, punda causashca taitacunata tapushpa, chai taitacunapaj taitacuna imatalla yachashcata yachajuyari.
9Ñucanchica, cainallacuna cashpami, imatapash na yachanchi. Ñucanchi causaica, cai pachapica llandushnallami.
10Paicunami, ¿nachu candaca yachachishpa rimanajunga? ¿Nachu paicunapaj shungumanda llujchishpami parlanajunga?
11¿Sucusca, turu na tiaj pushtupi viñanllachu? ¿Michina pambapi jihuaca, yacu illaj pushtupi viñanllachu?
12Verdella cashpapash, na fitishca cashpapash, chaicunarami tucui jihuacunamanda punda chaquin.
13Taita Diosta tucui cungajcunapaj causaicunaca, chashnallatami. Diosta na manllaj runa shuyajushcapash, chashnallatami chinganga.
14Pai shuyajushcapash, fitirinshna tucuringami. Pai yariajlla causashcapash, araña telashnami canga.
15Paipaj huasipi pai taunarijpica, chai huasica urmangallami. Ama urmachun charingapaj munashpapash, na ushashpami saquinga.
16Indipi na chaquij, verdella quirushnami canga. Paipaj retoñocunaca, huertata yali jatunmi viñanga.
17Paipaj sapicunapash, yacu manñapimi caita chaita huatarishpa rijun. Rumilla alpaman chayangacamanmi, huatarishpa viñajun.
18Pai maipi tiajushcamanda fitishpa shitajpica, chai alpaca: ‘Candaca, ima horallapash na ricushcanichu’ ningami.
19Pai cushijushpa causanaca, chashnapachami tucuringa. Ñutu alpamandallatami, shuj jihuacuna viñanga.
20Ricui, Taita Diosca ima pandatapash na ruraj runataca na millanayachinllu. Nalicuna imata rurachumbash, na ayudanllu.
21Chaimanda canga, ninanda asinguirami. Cambaj shimihuambash, cushijushpa caparinguirami.
22Canda millanayachij runacunaca, musparinahuanmi churajushcashna canga. Diosta na manllaj runacunapaj huasicunapash chingangami” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
