DEUTERONOMIO 23 - Quichua Imbabura Bible

Diospajlla tandanajuipi na yaicui ushanacunatami villajun

1Maijan cashpapash lulunda llapi tucushca, na cashpaca pai charishca aichata fiti tucushca runaca, Mandaj Diospaj tandanajuipica, na yaicui ushangachu.

2Huainayashpa charishca churipash, Mandaj Diospaj tandanajuipica na yaicui ushangachu. Paipaj miraicunaca, chunga miraicamanmi Mandaj Diospaj tandanajuipica, na yaicui ushanga.

3Amonitacunapash, moabitacunapash, Mandaj Diospaj tandanajuipica na yaicungachu. Paicunapaj miraicunaca, chunga miraicaman na yaicui ushangachu. Paicunaca, Mandaj Diospaj tandanajuipica, tucui causaipimi na yaicui ushanga.

4Paicunaca, canguna Egiptomanda llujshimujpica yacuhuan, micunahuan ñambi tuparingapaca, na llujshimurcachu. Paicunaca, Mesopotamia shuti llactapi tiaj Petor shuti pueblopi causajuj Beor shuti runapaj churi Balaam shuti runamanmi, culquita curca. Shina cushpami, cangunataca ima llaquipash japishpaca alichari canman nichun cachamurca.

5Ashtahuangarin canda Mandaj Taita Diosca, Balaa shuti runataca na uyangapaj munarcachu. Ima llaquipash japishpami ali canman nishcataca, canda Mandaj Taita Diosca, bendiciai tucunamanmi tigrachirca. Canda Mandaj Taita Dios canda juyaimandami, shina rurarca.

6Shinamandami, paicunahuan casilla ali causaita charingapaca, na mascana cangui. Paicunaman alita ruranatapash, tucui punllacuna, tucui causaipi na munanachu cangui.

7Edomitacunataca, cangunapaj huauqui purallata cajpimi, millanayachishpaca na ricuna cangui. Caru llactamanda rishpa, paicunapaj llactapi causashcamandami, Egipto llactapi causajcunatapash millanayachishpaca na ricuna cangui.

8Paicuna puramandaca, quimsa miraicunapi huacharishca miraicunami, Mandaj Diospaj tandanajuipi yaicui ushanga.

Ima mapapash illaj causachunmi mandashca

9Canda fiñajcunahuan macanajungapaj llujshishpaca, ima nalimandapash jarcarinami cangui.

10Canguna puramanda maijan cashpapash, tuta puñushpa imamandapash mapayashca cashpaca, carpacunamanda llujshishpa ama cutin yaicumuchun.

11Shina cashpapash ña amsayajpimi, yacuhuan armanga. Shina armashca jipami, indi ña huashajujpica, carpaman yaicui ushanga.

12Shinallata ishpanatapash, carpa tiaj pushtumandaca, carupimi charina cangui.

13Shinallata cambaj macanajunapica, shuj estacatapashmi charina cangui. Can ishpagrishpaca, chai estacahuan alpata allangui. Chai jipaca, mapataca alpahuan quilpangui.

14Canda Mandaj Taita Diosca, canda quishpichingapaj, canda fiñajcunata cangunapaj ñaupajpi churangapajmi, cambaj carpa chaupipi purijunga. Chaimandami cambaj carpacunaca, Diospajlla canga. Cambi ima mapapash tiajta pai ricushpa, canmanda ama anchurichunmi chashna canga.

Gentecunahuan ali causachunmi mandashca

15Servij runa, paipaj amopajmanda pacajushpa cambajman shamujpica, chai runataca ama paipaj amopajman tigrachinguichu.

16Paica, cangunapaj chaupipimi canhuan causanga. Paica, maijan pueblopi ali canatapash agllashpami, pai munashcapi causanga. Paitaca, na llaquichishpa charinachu cangui.

17Israelcunapaj ushi purapica, culquimanda huainayaj huarmica ama tiachun, Israel churi purapica jari purallata siririj sodomita nishcapash ama tiachun.

18Culquimanda huainayaj huarmi cushca culquitapash, alcushna purij runa cushca culquitapash, canda Mandaj Taita Diosman carashami nishca cajpipash, na chasquinachu cangui. Canda Mandaj Taita Diosca, chashna nalita rurajcunataca, caishujtapash chaishujtapash napacha ricunayachinllu.

19Cambaj huauquiman culquita mañachishpaca, mama culquimanda mirashca culquitaca, na mañanachu cangui. Granota mañachishpapash, ashtahuan imata mañachishpapash, na mirachishpa mañanachu cangui.

20Na rijsishcacunataca, mirachishpa mañanallami cangui. Ashtahuangarin cambaj huauqui cajpica, na mañanachu cangui. Cambaj cachun japingapaj can rijuj llactapi, cambaj maquihuan imata rurashcapipash, canda Mandaj Taita Diosca bendiciachunmi, na chashna rurana cangui.

21Canda Mandaj Taita Diosman imatapash ari nishcata pactachingapaca, ama unayanguichu. Na pactachijpica, canda Mandaj Taita Diosca llaquichingami. Chaita na pactachishpaca, juchatami rurangui.

22Ashtahuangarin paiman imatapash na ari nishpaca, ima juchatapash na ruranguichu.

23Shina cashpapash cambaj shimihuan carashami nishpaca, yariashpa pactachingui. Canda Mandaj Taita Diosman imagutapash carashami nishcashnallata yarishpa pactachingui.

24Cambaj cumba runagupaj uvas chagraman yaicushpaca, na munangacaman micunguilla. Ashtahuangarin canastapi apaitaca na ushanguichu.

25Cambaj cumba runagupaj trigo chagraman yaicushpaca, chai trigo caspacunataca maquihuanlla japingui. Ashtahuangarin cumba runagupaj trigota hoceshuan cuchuitaca, na ushanguichu.