1Mandaj Diosca, Moisesmanmi cashna nishpa villarca:
2“Madianitacuna, israelcunata llaquichishcashnallata, paicunatapash llaquichingui. Chai jipami, huañushpa cambaj llacta puracunahuan tandanajungui” nircami.
3Shina nijpimi Moisesca, israelcunaman cashna nishpa villajurca:
—Jatun macanajuiman ringapaca, canguna puramanda huaquinguna alichirichi. Shina alichirishpaca, Mandaj Diosta imashna madianitacuna llaquichishcashnallata, chai Madián llactapillata paicunatapash llaquichigrichi.
4Tucui Israel aillucunamandaca, cada aillumanda huaranga runacunata jatun macanajuiman cachaichi— nijurcami.
5Shina nishcashnallatami, huaranga huaranga israelcunamandaca, cada aillumanda shuj huaranga runacunata agllarca. Jatun macanajuiman ringapaj alichirishcalla runacunaca, chunga ishcai huaranga runacunami carca.
6Shinami Moisesca, cada aillumanda shuj huaranga runacunata cacharca. Eleazar shuti curapaj churi Finees shuti curapash, Diospaj huasimanda vasocunata apashpa, trompetacunata huacachingapaj apashpami, jatun macanajuiman rirca.
7Madianitacunahuan macanajushpaca, Mandaj Dios imashna Moisesta mandashcashnallatami, tucui jaricunata huañuchirca.
8Shinallata chai huañuchishca puracunapica: Evi, Requem, Zur, Hur, Reba shuti, Madián llactata picha jatun mandajcunatapashmi huañuchirca. Shinallata Beor shuti runapaj churi Balaam shuti runatapashmi, espadahuan huañuchirca.
9Israelcunaca, madianita puramandaca huarmicunatapash, paicunapaj uchilla huahuacunatapashmi prezu aparca. Paicunapaj tucui animalcunatapash, paicunapaj huagracunatapashmi aparca. Shinallata chai llactapi tucui imatalla charishcacunatapashmi quichushpa aparca.
10Paicunapaj tucui pueblocunatapash, chai muyundi uchilla llactacunatapash, huasicunatapashmi rupachinajurca.
11Chai jipaca, imatalla charishcacunata quichushcatapash, macanajushpa quichumushca jaricunata, animalcunatapashmi japirca.
12Shina japishpami Moisespajman, Eleazar shuti curapajman, tucuilla tandanajushca israelcunapajman apamurca. Israelcunaca, prezu japimushcacunata, macanajushpa quichumushcacunataca, Moab shuti llacta pugru pambacunapi carpacunamanmi apamurca. Chai llactaca, Jordán yacu manñapimi.
13Shinamandami Moisespash, Eleazar curapash, tandanajushca israelcunata tucui mandajcunapash, carpacunamanda canllaman tuparingapaj llujshinajurca.
14Moisesca, soldadocunata mandajcunahuan, huaranga soldadocunata mandajcunahuan, patsaj soldadocunata mandajcunahuanmi fiñarirca. Jatun macanajuimanda tigramunajuj mandajcunahuan fiñarishpami,
15Moisesca cashna nijurca:
—¿Imashpata tucuilla huarmicunataca, causajta saquircanguichi?
16Ricuichi, cai huarmicunamandami israelcunaca, Balaam shuti runa yuyaita cushcata uyashpa nalita ruranajurca. Paicunaca, yachashpata na cazushpami, Baal-peor shuti diosta mañashpa, Mandaj Diosta fiñachinajurca. Chaimandami, Mandaj Diospaj tandanajushca purapica, ashtaca huañuicuna tiarca.
17Cunanga, tucui jari huahuacunata huañuchigrichi. Shinallata jarihuan puñushpa jarita rijsishca tucui huarmicunatapash huañuchigrichi.
18Ashtahuangarin jarihuan nara tacarishca tucui cuitsacunatalla ama huañuchishpa, causajta saquinguichi.
19Cangunaca, maijan cashpapash maijandapash huañuchishca cashpa, shinallata maijan cashpapash huañushcapi tacarishca cashpaca, canchis punllacaman carpacunamanda carupi shuyanguichi. Ña quimsa punlla tucujpipash, shinallata canchis punlla tucujpipash cangunapash, canguna prezu apamushcacunapash armashpa, mapa illaj tucunguichi.
20Shinallata tucuilla churajunacunatapash, carata rurashca tucuilla churajunacunatapash, chivo milmata rurashca tucuilla churajunacunatapash, caspita rurashca ima charishcacunatapash, mapa illajta ruranguichi— nijurcami.
Macanajushpa quichushcacunatami chaupirishca21Eleazar shuti curami, jatun macanajuimanda shamushca chai macanajuj soldadocunataca, cashna nijurca:
—Mandaj Dios mandashpa, Moisesman cushca chai mandashca shimicunapica, cashnami nijun:
22Orota, culquita, bronceta, jirruta, estañota, plomo nishca jirrutapachami rurashca canga.
23Shina cajpica, ninapi na rupanallacunataca, ninahuan rupachijpimi mapa illaj tucunga. Shinallata yacuhuan mapa illaj tucujcunataca yacuhuanmi, mapa illajta rurana canga. Ninapi rupanallacunataca yacuhuan maillashpami, mapa illajta rurana canguichi.
24Chai jahuapash canchis punllapica, cagunapaj churajunacunata tajshanguichi. Chashnami, mapa illaj tucunguichi. Chai jipami, carpacunaman yaicui ushanguichi— nijurcami.
25Mandaj Diosca, Moisesmanmi cashna nishpa villajurca:
26“Macanajushpa imatalla quichumushcataca, gentecunatapash, animalcunatapash canhuan, Eleazar curahuan, tandanajushca israelcunapaj taitacunata mandajcunahuambash tandanajushpa cuentanguichi.
27Chai jipaca, macanajushpa quichumushcacunataca, ishcaipi chaupingui. Shina chaupishpaca, jatun macanajuiman rishpa, macanajuj puracunaman tucui tandanajushca gentecunaman chaupingui.
28Jatun macanajuiman llujshishca, macanajunata ali yachaj soldadocuna impuestota cushcataca, Mandaj Dios ñucaman shicanyachingui. Genteta cashpa, huagrata cashpa, burrota cashpa, llamata cashpapash, picha patsajmanda shujguta shicanyachinguichi.
29Paicunaman chaupishpa cushcamandaca, Mandaj Dios ñucaman cuchun, Eleazar curaman cungui.
30Tandanajushca israelcunaman chaupishpa cushcamandaca, genteta cashpa, huagrata cashpa, burrota cashpa, llamata cashpa, tucui animalcunata cashpapash picha chungamanda, shujguta japingui. Chaicunataca, Mandaj Dios ñucapaj jatun carpata cuidaj levitacunaman cungui” nijurcami.
31Shina nijpimi Moiseshuan, Eleazar curahuanga Mandaj Dios imashna Moisesta mandashcashnallata ruranajurca.
32Macanajunata ali yachaj runacuna, macanajushpa quichumushcamanda puchushca llamacunaca, 675.000 llamacunami carca.
33Huagracunaca, 72.000 huagracunami carca.
34Burrocunaca, 61.000 burrocunami carca.
35Shinallata jarihuan nara tacarishca cuitsacunapash tucuimandaca, 32.000 cuitsacunami carca.
36Macanajuiman llujshij soldadocunaman chaupishpa cushca llamacunaca, 337.500 llamacunami carca.
37Mandaj Diosman impuestota cushca llamacunaca, 675 llamacunami carca.
38Shinallata 36.000 huagramandaca, canchis chunga ishcai huagracunatami, Mandaj Diosman impuestota cunajurca.
39Shinallata 30.500 burromandaca, sucta chunga shuj burrocunatami, Mandaj Diosman impuestota cunajurca.
40Shinallata 16.000 gentemandapash, quimsa chunga ishcai gentecunatami, Mandaj Diosman impuestota cunajurca.
41Moisesca, impuestota cushcacunataca vichai ricuchishpa, Mandaj Diosman cuchunmi, Mandaj Dios imashna Moisesta mandashcashnallata Eleazar curaman curca.
42Jatun macanajuiman llujshishca Israel runacunaman Moisés chaupishpa cushcacunapash,
43(tandanajushca israelcunaman chaupishpa cushcacunapash, caicunami: 337.500 llamacunami carca.
44Huagracunaca, 36.000 huagracunami carca.
45Burrocunaca, 30.500 burrocunami carca.
46Cuitsacunamandaca, 16.000 cuitsacunami carca).
47Tandanajushca israelcunaman chaupishpa cushcamandaca, cuitsacunata cashpa, animalcunata cashpapash, picha chungamanda shujgutami Moisesca japirca. Chaicunataca, Mandaj Dios imashna Moisesta mandashcashnallatami, Mandaj Diospaj jatun carpata cuidaj levitacunaman curca.
48Chai huaranga soldadocunata mandajcunapash, patsaj soldadocunata mandajcunapashmi, Moisespajman shamunajurca.
49Chaipimi Moisestaca, cashna ninajurca: “Canda servij ñucanchimi, ñucanchi mandajpi macanajuiman llujshij soldadocunata cuentarcanchi. Shina cuentajpica ñucanchi puramandaca, shujllapash na illarcachu.
50Chaimandami, imatalla apamushcacunataca, Mandaj Diosman cungapaj apamunchi. Orota rurashca imapash juyaillacunata, rigrapi huatarinacunata, maquipi huatarinacunata, surtijascunata, zarcillocunata, cadenacunatapashmi, ñucanchi juchacunamandaca Mandaj Diosman cungapaj apamunchi” ninajurcami.
51Oromanda ima juyaillata rurashcacunataca Moiseshuan, Eleazar curahuanmi japinajurca.
52Huaranga soldadocunata mandajcunapash, patsaj soldadocunata mandajcunapash, Mandaj Diosman cushca tucui juyaillacunaca, quimsa quintal, picha kilo, patsaj gramota pezaj oromi carca.
53Macanajuiman rishca soldadocunaca, macanajushpa quichushcacunataca, tucuicunami paicunapaj cachun japinajurca.
54Huaranga soldadocunata mandajcuna, patsaj soldadocunata mandajcuna, Diosman cungapaj apamushca oromanda ima juyaillacunata rurashcacunataca, Moiseshuan, Eleazar curahuanmi japirca. Chaicunataca israelcunata yarichunmi, Dioshuan tuparina jatun carpaman, Mandaj Diospaj ñaupajman apamunajurca.
Who We AreWhat We EelieveWhat We Do
2025 by iamachristian.org,Inc All rights reserved.
