1 SAMUEL 7 - Quichua Imbabura Bible

1Quiriat-jearim shuti pueblopi causajcuna shamushpami, Mandaj Diospaj arcata apashpa, Abinadab shuti runapaj huasipi churarca. Paipaj huasica, shuj lomapimi carca. Mandaj Diospaj arcata cuidashpa causachunga, Abinadab runapaj churi Eleazartami, Diospajlla cachun shicanyachinajurca.

2Diospaj arcata, Quiriat-jearim puebloman apamushca punllamandaca, tauca punllacunami yalirca. Ishcai chunga huatatami chaipi carca. Shinallata tucui israelcunami ninanda huacashpa, Mandaj Diostaca mascanajurca. Samuelca, israelcunapaj juezmi tucushca

3Samuelca, tucui israelcunatami cashna nijurca: “Mandaj Diospajman tucui shunguhuan tigraringapaj munashpaca, canguna puramandaca shuj dioscunatapash, Astarot shuti huarmi diostapash shitaichi. Chai jipaca, cangunapaj shungutapash alichirishpa, Mandaj Diostalla servishpa causaichi. Chashna rurajpimi, filisteocunapaj maquimandaca cacharichinga” nircami.

4Shina nijpimi, israelcunaca Baal shuti, Astarot shuti dioscunata shitashpa, Mandaj Diostalla servishpa causanajurca.

5Shina cajpimi Samuelca, cashna nirca: “Tucui israelcunata, Mizpa shuti pueblopi tandanajuchun mandaichi. Ñucami cangunamandaca, Mandaj Diosta mañasha” nircami.

6Shinallata israelcunapash, Mizpa pueblopi tandanajushpami, yacuta llujchishpa, Mandaj Diospaj ñaupajpi talinajurca. Chai punllapica na micushpa, Diosta mañashpami cashna ninajurca: “Juchata rurashpami, Mandaj Diosta fiñachishcanchi” ninajurcami. Samuelca, israelcuna fiñanajushcataca, Mizpa pueblopimi alichijurca.

7“Israelcunaca, Mizpa pueblopimi tandanajushca” nijtami filisteocunaca uyarca. Shina uyashpami filisteocunata mandajcunaca, israelcunahuan macanajungapaj shamunajurca. Chaita yachashpami israelcunaca, filisteocunataca ninanda manllanajurca.

8Shinamandami israelcunaca, Samueltaca cashna ninajurca: “Filisteocunapaj maquimanda ñucanchita huacaichijuchunga, ñucanchita Mandaj Taita Diosta ñucanchimanda mañanataca, ama saquipaichu” ninajurcami.

9Shina nijpimi Samuelca, chuchujuj huahua llamaguta japishpa, Mandaj Diosman cushpa huañuchishpa, tucuillata rupachirca. Shina rurashpami Mandaj Diostaca, tucui israelcunamanda mañarca. Chashna mañajpimi, Mandaj Diosca uyarca.

10Tucuillata rupachina llamata Samuel huañuchijujpimi, cashna tucurca: Filisteocunaca, israelcunahuan macanajungapajmi chayamurca. Ashtahuangarin Mandaj Diosca, chai punllapica ninanda culun nichishpami, filisteocunata manllachirca. Chaimandami, israelcunapaj ñaupajpi mishai tucurca.

11Israelcunaca, Mizpa pueblomanda llujshishpami, Bet-car shuti pueblo ura ladocaman catishpa, filisteocunataca chugrichishpa huañuchinajurca.

12Chai jipami Samuelca, shuj jatun rumita japishpa, Mizpa shuti pueblohuan, Sen shuti pueblohuan chaupipi shayachirca. Chaipi shayachishpaca: “Mandaj Diosca, caicamanmi ñucanchitaca ayudashca” nishpami, chai rumitaca: “Eben-ezer” shutita shutichirca.

13Chashnami filisteocunaca, mishai tucunajurca. Chaimandami Israel llactaman tigrashpa yaicuitaca, na ashtahuan usharca. Mandaj Diospaj maquica, Samuel causajui tucui punllacunami, filisteocunata llaquichijurca.

14Filisteocuna macanajushpa israelcunata quichushca pueblocunaca, israelcunapajllatami tucurca. Chai pueblocunaca, Ecrón shuti pueblomanda callarishpa, Gat shuti pueblocamanmi carca. Chashnami israelcunaca, paicunapaj pueblocunataca, filisteocunapaj maquimanda cutin japinajurca. Amorreocunahuanga, casilla aligutami causanajurca.

15Samuelca, tucui paipaj causaipimi, israelcunataca mandajurca.

16Paica huatapi huatapimi, Bet-el, Gilgal, Mizpa shuti pueblocunata muyungapaj rijurca. Paica, israelcuna fiñanajushcata alichingapajmi rijurca.

17Chai jipaca, Ramá shuti pueblopi tiaj paipaj huasiman tigranllami carca. Paica, chai pueblopimi tucui israelcunata mandashpa causajurca. Chai pueblopillatami, Mandaj Diosman shuj altartapash rurarca. Israelcunaca, jatun mandajta charingapajmi munashca