1Chashna nijujpimi, temanita nishca Elifaz shuti runaca, cashna nishpa tigrachirca:
2“Canga, ñucanchi rimajpica, llaquiringuimi. Ashtahuangarin, ¿pita na rimashpa jarcangayari?
3Ricui, canga taucacunatami yachachin carcangui, Imata ruraitapash na ushajcunataca, shinllichinmi carcangui.
4Nitijanshna pandaj runatapash, aliguta rimashpami alichin carcangui. Cunguricuna quivirinshna llaquilla cajpipash, shinllichinmi carcangui.
5Ashtahuangarin cunan, canda llaqui japijpica, ninandami llaquirijungui. Llaquicuna canda japijpica, ninandami musparijungui.
6¿Nachu canga, Taita Diosta manllanata yariajlla causan carcangui? ¿Nachu ima pandatapash, na rurashpa causanatalla shuyan carcangui?
7Cunanga, aliguta yariyari. Ima nalitapash na ruraj runaca, ¿maijambash huañushcachu? Aligutalla rurajcunaca, ¿maipita tucuchi tucushca?
8Ashtahuangarin nalita rurahuan yapunshna, nalicachishpa rimajcunaca, chaitallata cozechanajujtami ricushcani.
9Taita Diospaj samaihuanllami huañunajun. Pai ninanda fiñarishpa fucujpillami, tucuchi tucunajun.
10León ninandapacha huacashpa caparinapash tucurishcami. Huahua leongunapaj quirucunapash faquirishcami.
11Rucu leonga, micuna aicha na tiajpimi huañun. Micuna illajpimi, mama leonbaj huahuacunapash, caita chaita rinajun.
12Chaitaca, ñucamambash na villashpami pacashca. Ashtahuangarin ñuca rinripillami, chaitaca huaquinllatapash uyarcani.
13Tuta muscuipishnami, yuyaipilla ricurcani. Gentecuna ninanda puñunayachishpa puñunajujpimi uyarcani.
14Ñucapajman ninan manllai shamushpa chujchuchihuarca. Shinamandami, tucuilla ñuca tullucunapash chujchurca.
15Ñuca ñaupajta huaira fucunshna aya yalijujpimi, ñuca cuerpo milmacunapash shayarirca.
16Ñuca ñaupajpimi, aya shayarirca. Paipaj ñavitaca, na ricurcanichu. Upalla tucujpimi, cashna nijta uyarcani:
17‘¿Runaca, Taita Diostapash yali imatapash cashcatapacha rurajchu canga? ¿Runaca, paita ruraj Diostapash yali ima mapapash illajchu canga?
18Ricui, Diosca paita servijcunatapash, na yariajlla canllu. Paipaj angelcunatapash, shinlli shungu cajtami ricurca.
19Alpa turuhuan shayachishca huasipishna causajcunatacarin, ¿maitata yariajlla causangayari? ¡Paicunaca, ñutu alpa jahuapilla huasichi callarishcacashna cashcamandaca, polilla juru micujpica urmangallami!
20Paicunaca, tutamanda ali cashpapash, chishipaca tucuchi tucunllami. Ima tucunatapash, pipash na villajpica, chingaita chinganllami.
21Paicuna juyaillagu ricurijujpash, ¿nachu paicunahuanllata chinganlla? Ima ali yachaitapash na yachashpami huañunajun’ nijtami uyarcani.
Who We AreWhat We EelieveWhat We Do
2025 by iamachristian.org,Inc All rights reserved.
