1 REYES 8 - Quichua Imbabura Bible

Salomonmi, Diospaj arcataca Diospaj huasiman apashca(2 Crón. 5:2-14)

1Shinamandami Salomonga, israelcunata mandaj rucucunata, Israel aillucunata tucui mandajcunata, Israel familiacunata mandajcunataca, Jerusalenman paipaj ñaupajman tandachimurca. Paicunataca, Mandaj Dioshuan ari ninajushpa escribishcata alichina arcata, Davidpaj Sion pueblomanda apamungapajmi chashna tandachirca.

2Etanim shuti canchis quillapimi, tucuilla Israel runacunaca, jatun mandaj Salomonhuan tandanajurca. Chai quillapica, jatun fiestata rurana punllacunami carca.

3Israelcunata mandaj rucucuna tucuilla shamujpimi curacunaca, Diospaj arcata japinajurca.

4Mandaj Diospaj arcatapash, Dioshuan tuparina jatun carpatapash, Diospajta rurangapaj chai carpapi imalla tiashcatapashmi apamunajurca. Chaicunataca curacuna, levitacunami apamunajurca.

5Chaipica, jatun mandaj Salomombash, paihuan tandanajushca tucui israelcunapashmi, Diospaj arca ñaupajpi llamacunata, huagracunata, Diosman cushpa huañuchinajurca. Chai animalcunaca ashtacapacha cajpimi, maitapash na cuentai ushanalla carca.

6Chai jipami curacunaca, Mandaj Dioshuan ari ninajushpa escribishcata alichishca arcataca, maipi churana pushtumanllata apanajurca. Chai arcataca, Diospaj huasipillata Diospajlla shicanyachishca ucuman apamushpami, querubín nishcaunapaj alas ucupi churanajurca.

7Chai querubingunaca, Diospaj arca jahuata alasta chutashcami carca. Chaimandami chai querubingunaca, Diospaj arcatapash, arcata huanduna vara caspicunatapash, alascunahuan jahualla quilpashca carca.

8Chai vara caspicunaca, jatunguna cashcamandami, chai caspi umacunaca, Diospajlla shicanyachishca ucu ñaupajmandaca ricunalla carca. Shina cashpapash, ashtahuan canllamandaca na ricunallachu carca. Chaica cunangamanmi, chashnallata tiajun.

9Diospaj arcapica, imapash ashtahuanga na tiarcachu. Horeb shuti urcupi cashpa, Moisés churashca ishcai tabla rumicunallami tiajurca. Egipto llactamanda llujshimujpi Mandaj Dios, israelcunahuan ari ninajushcatami chai rumicunapica escribishca carca.

10Diospaj huasimanda curacuna ña llujshijpica, Mandaj Diospaj huasipica fuyumi jundarca.

11Fuyu junda cajpimi curacunaca, Diospajta chaipi rurangapaj shayanajuitaca na ushanajurca. Mandaj Diospaj punchapambami, Mandaj Diospaj huasipica jundashca carca.

Diospaj huasitami, Diosmanllata mingashca(2 Crón. 6:1—7:10)

12Chaimandami Salomonga, cashna nirca: “Mandaj Dioslla, canga yana tutapimi causasha nircangui.

13Shina cajpipash ñucaca, can causajuchunga, shuj huasita shayachishpami, causaita causaicaman can chaipi causachun, shuj ucutapash rurarcani” nircami.

14Jatun mandajca tigrarishpa ricushpami, chaipi tandanajushca tucui israelcunata bendiciarca. Chaipica, tucuilla tandanajushca israelcunami shayanajurca.

15Paica cashnami nijurca: “Israelcunata Mandaj Taita Diosca, alicachi tucushca cachun. Ñuca taita Davidman pai imatalla nishcataca, paipaj maquihuambacha rurashpami pactachishca. Paica cashnami nishca carca:

16‘Ñuca agllashca israelcunata, Egipto llactamanda llujchimushca punllamandapacha, tucui Israel aillucunapaj pueblocunamandaca, maijan pueblotapash ñuca shuti causana huasita shayachijuchunga, na agllarcanichu. Shina cashpapash, ñuca agllashca israelcunata mandachunga, Davidtami agllarcani’ nishcami carca.

17Chaimandami ñuca taita Davidca, israelcunata Mandaj Taita Diospaj shutipi mañana huasita rurangapaj paipaj shungupi yarijushca carca.

18Ashtahuangarin Mandaj Diosca, ñuca taita Davidtaca cashnami nishca carca: ‘Ñuca shutipi mañana huasita shayachinatami, cambaj shungupi yarijushcangui. Can chaita yarijushpaca, alitami yarijushcangui.

19Shina cashpapash, chai huasitaca na can shayachinguichu. Ashtahuangarin canmanda llujshishca cambaj churimi, ñuca shutipi mañana huasitaca shayachinga’ nishcami carca.

20Mandaj Diosca, paipaj shimihuan chashna nishcataca pactachishcami. Chaimandami ñucaca, Mandaj Dios imashna nishcashnallata, ñuca taita Davidpaj randi, israelcunata mandashpa tiarinapi tiarircani. Shinallata israelcunata Mandaj Taita Diospaj shutipi mañana huasitapashmi shayachircani.

21Chai huasipimi, arcata churangapaj shuj ucuta rurarcani. Chai ucupica, ñucanchi ñaupa taitacunata, Egipto llactamanda llujchimushpa, Mandaj Dios paicunahuan ari ninajushpa escribishcata alichishcami tiajun” nircami.

22Shina nishca jipami Salomonga, Mandaj Diospaj altar ñaupajpi shayarishpa, tandanajushca tucuilla israelcuna ricujta, jahua pachaman maquita chutashpa,

23cashna nijurca: “Israelcunata Mandaj Taita Dioslla, can Taita Diosman rijchajca jahua pachapipash, cai pachapipash na tianllu. Canda tucui shunguhuan cazushpa, cambaj ñaupajpi ali purij canda tucui servijcunata llaquishpami, can imata ari nishcatapash pactachijungui.

24Canda servij ñuca taita Davidman cushami nishcataca pactachishcanguimi. Cambaj shimihuan villashcataca, cambaj maquihuambacha rurashpami, cunan punllapi ricushcashnallata pactachijungui.

25Israelcunata Mandaj Taita Dioslla. Cunanga, canda servij ñuca taita Davidman pactachishami nishcataca pactachipairi. Chaipaca, canga cashnami nishcangui: ‘Cambaj mirai puramanda, ñuca ñaupajpi Israel llactata mandangapaj tiarinapi tiarij runaca na illangachu. Chaipaca, ñuca ñaupajpi can ali purishcashnallata, cambaj churicunapash ñuca mandashcata cazushpa, ñuca ñaupajpi ali purinatallami charin’ nishcanguimi.

26Shina cashcamanda israelcunata Mandaj Taita Dioslla, cunanga canda servij ñuca taita Davidman pactachishami nishcataca pactachipailla.

27Ashtahuangarin, ¿Taita Diosca cai pachapi causangapachachu imashi? Ricui jahua pachaca, ashtahuan jahuaman jahua pachapash, can Dios causangapaca na pactanllu. Ñuca shayachishca cai huasicarin, ¿maitata pactangayari?

28Shina cajpipash, ñucata Mandaj Taita Dioslla. Canda servij ñuca caparishpa mañajujtaca ricuhuanguimi. Canda servij ñuca, cambaj ñaupajpi caparishpa cunan chashna mañajujta uyashpami ricuhuangui.

29Cai huasitaca tutapash, punllapash ricujupanguilla. ‘Ñuca shutica, chaipimi causanga’ nishca pushtutaca ricuriajupanguilla. Canda servij ñuca caipi mañajujtaca uyahuanguiyari.

30Canda servij ñucapash, can agllashca israelcunapash canda mañajujtaca uyapangui. Cai huasipi canda mañanajujtaca, cambashmi can causajuj jahua pachamanda uyapangui. Shina uyashpaca, juchacunata cungapangui.

31Maijan cashpapash, paipaj cumbatallata fiñashpa juchata rurajpica, cambaj cai huasi ucupi tiajuj altar ñaupajpi juramentuchunmi pushamunga.

32Shina juramentujpimi, jahua pachamanda uyashpa, canda servijcunata aliguta ricushpa, imatallapash rurapangui. Canda na manllajtaca ninanda llaquichishpami, pai nalita rurashcatallata, paipaj jahuapi cachamupangui. Imatapash cashcatapacha rurajtaca, imatapash cashcatapacha rurashcamandami, chashna alita rurashpa causachun chasquipangui.

33Can agllashca israelcunaca, paicunallata canda na cazushpa juchata rurashcamandami, paicunata fiñajcunapaj ñaupajpi mishai tucunga. Chashna mishajpica, cambaj ñaupajman tigrarishpami, ninanda llaquirishpa, cambaj shutita alicachishpa, cai huasipi mañanajunga.

34Chashna mañajpica, jahua pachamanda uyashpami, can agllashca israelcunapaj juchata cungapangui. Shina cungashpami, paicunapaj ñaupa taitacunaman can carashca llactaman tigrachimupangui.

35Canda na cazushpa, paicuna juchata rurashcamandami, jahua pacha vicharishpa na tamianga. Paicunata can llaquichijpica, cai huasi ucupi canda mañashpami, cambaj shutita alicachishpa cambajman tigrarinajunga.

36Shina rurajpica, jahua pachamanda uyashpami, canda servijcunapaj juchatapash, can agllashca israelcunapaj juchatapash cungapangui. Canda cazushpa purichumbash, ali ñanda ricuchishpami yachachipangui. Shinallata can agllashcacunaman can carashca, cambaj llactapipashmi tamiachipangui.

37Cai llactapica, jatun yarjaipash, jatun ung:uicunapash, chagracuna rupaipi chaquinapash, ima ung:uihuan chaquinapash, langosta jurucuna tucuchinapash, na cashpaca fahuashpa purij jurucuna tucuchinapashmi tianga. Shinallata paicuna causanajuj llactaman paicunata fiñajcuna shamushpa, chaupipi churanapash, na cashpaca imapash shuj llaqui cashpa, ung:ui cashpapashmi tianga.

38Shina tiajpica, maijan runa cashpa, na cashpaca can agllashca tucui israelcuna cashpapashmi canda mañanajunga. Maijan cashpapash, huañuchij ung:uihuan japi tucushcata yachashpami, cai huasiman paicunapaj maquita chutashpa ninanda mañanajunga.

39Shina mañajpica, can causajuj jahua pachamanda uyashpami, paicunapaj juchacunata cungapangui. Shina cungashpami, paicuna imata rurashpa causashcashnallata tucuicunaman cupangui. Paicunapaj shungutaca, canmi rijsipangui. (Canllami, huañuna aichayu tucuilla runacunapaj shungutaca rijsipangui).

40Ñucanchi ñaupa taitacunaman can carashca llactapi causanajui tucui punllacunapi canda manllashpa causanajuchunmi, chashna rurapangui.

41Shinallata shuj llactamanda shamushca, na can agllashca Israelpura cashpapash, cambaj shutita alicachingapajmi shamunga.

42(Cambaj jatun shutitapash, cambaj ushaitapash, cambaj rigrata chutashpa imatalla rurashcatapashmi yachanajunga). Chashna yachashpami, cai huasipi canda mañaj shamunga.

43Chashna mañajpica, can causajuj jahua pachamandami uyapangui. Shina uyashpami shuj llactamanda cajpipash, paicuna imata mañashcashnallata rurapangui. Chashna rurajpimi, tucui cai pachapi causajcunaca, cambaj shutita rijsishpa, can agllashca israelcunashnallata canda manllashpa causanga. Shinallata ñuca shayachishca cai huasipica, cambaj shutita jatunyachishpa mañanatapashmi yachanajunga.

44Can agllashca israelcunaca, paicunata fiñajcunahuan macanajungapajmi can maita cachashca ñanda llujshishpa rinajunga. Chashna rinajushpami, can agllashpa cushca puebloman ricushpa, shinallata cambaj shutipi mañangapaj ñuca shayachishca cai huasi ladoman ricushpa, can Mandaj Diostaca mañanajunga.

45Tucui shunguhuan chashna ninanda mañajpica, jahua pachamanda uyashpami, imatapash cashcatapacha rurapangui.

46(Juchata na ruraj runaca, shujllapash na tianllu). Canda na cazushpa juchata rurajpimi, paicunahuanga ninanda fiñaringui. Chashna fiñarishpami, paicunataca caru llactaman cashpapash, ladolla llactaman cashpapash prezu apachun, paicunata fiñajcunapaj ñaupajpi churangui.

47Paicunaca, prezu apai tucushca llactapi cashpami, paicunallata canda na cazushcata yachanajunga. Prezu apashca llactapimi cambajman tigrarishpa, cashna nishpa mañanajunga: ‘Juchatami rurashcanchi, jatun nali runacunashnami rurashcanchi. Diosta na manllajcunashnami rurashcanchi’ ninajungami.

48Paicunata fiñajcunapaj llactaman prezu apai tucushca cashpami, paicunapaj tucui shunguhuan, paicunapaj tucui almahuan cambajman tigrarinajunga. Chashna tigrarishpaca, paicunapaj ñaupa taitacunaman can carashca llactamambash, can agllashpa cushca pueblopi canman ñuca shayachishca cai huasi ladomambash tigrarishpami, canda mañanajunga.

49Paicuna ninanda mañajpica, can causajuj jahua pachamanda uyashpami, imatapash cashcatapacha rurapangui.

50Can agllashcacunataca, juchata rurashpa canda fiñachishcatapash, tucui nalita rurashpa canda na cazushcatapash, canda na cazushpa jariyashcatapash cungapangui. Paicunata llaquichingapaj apajcunamambash, paicunata llaquina yuyaita cupangui.

51Paicunaca, cambajlla cachun can agllashca gentecunami. Paicunataca Egiptomandaca, jirruta yacuyachijuj jornomandashnami llujchimurcangui.

52Canda servij ñuca mañajujta, can agllashca israelcuna ninanda mañanajujtaca, cambaj ñavihuan ricuriashpa, ñucanchi ima llaquihuan cashpa, caparishpa mañanajujtapash uyapangui.

53Jatun Mandaj Dioslla. Ñucanchitaca, tucui cai pachapi causaj puracunamandami, cambajlla cachun agllarcangui. Chaitaca, ñucanchi ñaupa taitacunata Egiptomanda llujchimushpa, canda servij Moisesman villashcashnallatami, chashna rurarcangui” nijurcami.

54Salomonga, chashnami tucuita ninanda Mandaj Diosta mañashpa tucuchirca. Chai jipami, Mandaj Diospaj altar ñaupajpi cungurishpa, maquitapash jahua pachaman vichai churashpa mañajushcamandaca jatarirca.

55Shina jatarishpa shayarishpami, tucuilla tandanajushca israelcunataca, shinllitapacha cashna nishpa bendiciarca:

56“Mandaj Diosca, alicachi tucushca cachun. Paica, pai agllashca israelcunamanmi, casilla ali causaiguta caramushca. Paica, paita servij Moisesta villachun mandashcashnallatami, tucui imata carasha nishcataca, shuj shimigutallapash na saquishpa tucuita pactachishca.

57Ñucanchita Mandaj Taita Diosca, ñucanchi ñaupa taitacunahuan cashcashnallata, ñucanchihuambash cachun. Ñucanchitaca ama cungachun, ama saquichun.

58Ñucanchi shungupica, paitalla cazuna yuyaita ashtahuan churachun. Ñucanchi taitacunaman cushca mandashcacunata, imata rurachun mandashcacunata, escribichishca shimicunata cazuna yuyaita cuchun.

59Mandaj Diospaj ñaupajpi ñuca mañashca cai shimicunaca, punllapash tutapash ñucanchita Mandaj Taita Diospaj yuyaipi cashpami, ali canman. Shina cajpimi, paita servij ñucapaj llaquitapash, pai agllashca israelcunapaj llaquitapash ricushpa huacaichinman. Ima punlla imata rurana cajpipash, chai horasllatami ruranman.

60Chashna rurajpimi, cai pachapi tiaj tucui llactacunapi causajcunaca, Mandaj Dioslla Taita Dios cajta, ashtahuan shuj Diosca na tiajta yachanga.

61Shinallata cangunapaj shungupash, ñucanchita Mandaj Taita Diospaj huasipica, ima nalipash illaj cachun. Shina cashpami, pai mandashcacunata, escribichishca shimicunataca, cunan punllacaman pactachishcashnallata pactachinguichi” nishpami bendiciarca.

62Chai jipami jatun mandajpash, paihuan tandanajushca tucui israelcunapash, Mandaj Diospaj ñaupajpi animalcunata cushpa huañuchinajurca.

63Mandaj Dioshuan ali cangapajmi Salomonga, ishcai chunga ishcai huaranga huagrata, patsaj ishcai chunga huaranga llamata Diosman cushpa huañuchijurca.

Chashnami jatun mandajpash, tucui israelcunapash, Mandaj Diospaj huasitaca Diosmanllata minganajurca.

64Jatun mandajca chai punllallatami, Mandaj Diospaj huasi ñaupajpi tiajuj chaupi patiotapash, Diospajlla cachun mingarca. Diosman cushpa tucuillata rupachina animalcunata ashtahuan imatalla carashcacunata, Dioshuan ali cangapaj cushca animalcunapaj viracunataca, chai patiopimi rupachirca. Mandaj Diospaj ucu ñaupajpi tiaj bronce altarca, uchillami carca. Diosman cushpa tucuillata rupachina animalcunata, ashtahuan imatalla carashcacunata, Dioshuan ali cangapaj cushca animalcunapaj viracunata rupachingapaca na pactarcachu.

65Chai punllacunallatami Salomonga, Mandaj Taita Diospaj ñaupajpi canchis punllata jatun fiestata rurarca. Hamat puebloman yaicuna ladomandaca, Egipto llacta jatun huaicu yacu ladocunaman causanajuj tucuilla israelcunandimi, ashtacapacha tandanajurca. Ashtahuan shuj canchis punllatapash, fiestata rurarcarami. Tucuimandaca chunga chuscu punllatami, chashna rurarca.

66Chai cayandi pusaj punllapimi Salomonga, gentecunataca cayacaman nishpa cacharca. Chashna cachajpimi, paicunapash jatun mandajta bendiciashpa, paicuna causanajuj huasicunaman, paicunapaj shungupash ninanda cushijushca tigranajurca. Paita servij Davidman, pai agllashca israelcunamambash, tucui alicunata rurashpa Mandaj Dios carashcamandami, chashna cushijunajurca.