NÚMEROS 11 - Quichua Imbabura Bible

Mandaj Diosca, codorniz nishcacunatami cachashca

1Mandaj Diosta juchachishpa israelcuna rimanajujpimi, cashna tucurca: Mandaj Diosca chaita uyashpami, nina japirinashna ninanda fiñarirca. Shina fiñarijpi, Mandaj Diospaj nina paicunapaj jahuapi japirishpami, shuj lado manñapi carpacunata rupachishpa tucuchirca.

2Chaimandami israelcunaca, Moisesta caparinajurca. Chashna caparijpimi Moisesca, paicunamanda Mandaj Diosta mañajpi, chai ninaca huañurca.

3Mandaj Dios cachamushca nina paicunapaj carpacunata rupachishcamandami, chai pambataca, Tabera shutita shutichirca.

4Israelcunahuanga, caru llactamanda shamushca gentecunapashmi chapurishca carca. Paicunaca, micunatallami yarianajurca. Shinamandami israelcunapash, cutin cashna nishpa huacanajurca: “¡Maijambash ñucanchiman aichata carashcanman!

5Egiptopica, pijitapash yanga micushcatami yarinchi. Pepinocunata, melongunata, puerro nishcacunata, cebollacunata, ajoscunatapash micushcatami yarinchi.

6Cunanga, yarjaimanda huañunajunchimari. Caipica, maná shuti granollamari ricurin. Shuj granocunaca, na ricurinllu” ninajurcami.

7Maná shuti granoca, culantro muyushnallami carca. Chaicunaca, bedelio nishca jambishnalla quillullagumi carca.

8Israelcunaca, caita chaita rishpami, chai granotaca pallanajurca. Chaitaca, cutana rumipi tacashpa, na cashpaca cutashpami, mangapi yanunajurca. Na cashpaca mishqui tandata rurashpami micunajurca. Chai micunaca, mushuj aceitehuan rurashcashna mishqui mishquimi carca.

9Tuta jamzi paramujpimi, chai maná shuti granoca, israelcunapaj carpacuna tianajuj pambacunapi urmajurca.

10Moisesca, israelcunataca paicunapaj carpa pungucunapi, paicunapaj familiacunamanda tucuicuna huacanajujtami uyarca. Mandaj Diospash, nina japirinshnami ninanda fiñarirca. Moisespajpash, nalimi ricurirca.

11Chaimandami Moisesca, Mandaj Diostaca cashna nijurca:

—Canda servijtaca, ¿imashpata cashna llaquichihuangui? Cai tucui israelcunahuan llaquita apachun saquingapaca, ¿imashpata cambaj ñaupajpica nali ricurishcani?

12¿Ñucachu cai tucui gentecunataca, vijsayu tucurcani? Paicunapaj ñaupa taitacunaman can carashami nishpa juramentushca llactaman, chuchujuj huahuata marcashpa apanshna apai ningapaca, ¿ñucachu ungurcani?

13Paicunaca: ‘Ñucanchiman aichata carahuai’ nishpami huacashpa, ñucapajman shamunajun. Cai tucui israelcunaman carangapaca, ¿maipita aichataca tarishayari?

14Cai tucui gentecunata ñucalla pushanaca, ninan shinllipachami. Chaimanda ñucalla pushaitaca, na ushanichu.

15Ñucata chashna llaquichina cashpa, cambaj ñaupajpi ñuca ali ricurishca cajpica, ñuca causaita quichuhuailla nipanimi. Cashna llaquita ricungapaca, na munanichu— nijurcami.

16Shina nijpimi Mandaj Diosca, Moisestaca cashna nirca:

—Israelcunata mandaj rucucuna puramandaca, israelcunata mandaj cajta can rijsishca canchis chunga mandaj rucucunata tandachimui. Paicunataca, chaipi canhuan shuyanajuchun ñucahuan tuparina jatun carpa punguman tandachingui.

17Chaipimi ñuca urai shamushpa canhuan rimasha. Shinallata cambi tiaj Espiritumanda japishpami, paicunapi churasha. Shinamandami, paicunapash israelcunapaj llaquita apanajunga. Chaipica, na canlla llaquita apanguichu.

18Ashtahuangarin israelcunataca, cashna ningui: ‘Cayapaca ñucapajlla tucuichi, cayaca aichata micunguichimi. Cangunaca: ¡Ñucanchi micungapaj pipash aichata carashcanman! ¡Egiptopica, aligutapachami causanajurcanchi! nishpami, Mandaj Dios uyajta huacarcanguichi. Chaimandami Mandaj Diosca, canguna micuchun aichata caragrin.

19Cunanga, shuj punllatalla, ishcai punllatalla, picha punllatalla, na cashpaca chunga punllatalla, ishcai chunga punllatallapash, aichataca na micugringuichichu.

20Ashtahuangarin shuj quillacamanmi, singatapash llujshingacaman, millanayachingacaman micugringuichi. Cangunapaj chaupipi causajuj Mandaj Diostaca, yangapi churashpami, cangunaca: ¿Imapajchari Egiptomandaca llujshimurcanchi? nishpa, paipaj ñaupajpi huacarcanguichi. Chaimandami chashna micunguichi’ ningui— nijurcami.

21Shina nijpimi Moisesca, cashna nirca:

—Ñucahuan shamunajuj israelcunaca, chaquilla purij sucta patsaj huaranga runacunami. ¡Shina cajpitami, canga: ‘Shuj quillacaman micunajuchunmi, aichata carasha’ ningui!

22Chai tucuillaman carangapaca llamacunata, huagracunata cungata muchushpa huañuchijpipash, na cashpaca, mama cuchamanda tucuilla pijicunata apamushpa carajpipash, na pactangachu— nircami.

23Shina nijpimi Mandaj Diosca, Moisesman cashna nishpa tigrachirca:

—¿Mandaj Dios ñucaca, maqui illajchu quedashcani? Ñuca rimashca shimicunaca pactanllu, nachu pactan, cunanmi ricungui— nircami.

24Moisés ña llujshishpaca, Mandaj Dios imatalla nishcacunatami, israelcunaman villarca. Chai jipaca, israelcunata mandaj puracunamanda canchis chunga rucucunata tandachishpami, Diospaj jatun carpa muyundipi shayarinajuchun mandarca.

25Chaipimi Mandaj Diosca, fuyupi urai shamushpa, Moiseshuan rimarca. Chai jipaca Mandaj Diosca, Moisespi tiaj Espiritumanda japishpami, canchis chunga mandaj rucucunapi churarca. Paicunapaj jahuapi Diospaj Espíritu tiarijpimi, Diosmanda villanataca, na shaijushpa villanajurca.

26Eldad shuti, Medad shuti ishcai rucucunami, paicunapaj carpacunapillata quedashca carca. Paicunapajmambashmi, Diospaj Espíritu shamurca. Paicunapash escribichi tucushca puracunalla cashpapash, jatun carpamanga na shamushcachu carca. Paicunapashmi, Dios ima nishcata carpacunapi villanajurca.

27Shina villanajujta uyashpami, shuj chairalla viñai huambraguca, Moisespajman calpamushpa:

—Eldad shuti, Medad shuti runacunaca, carpacunapimi Dios ima nishcata villanajun— nishpa villarca.

28Shina villajpimi Nun shuti runapaj churi Josueca, Moisesman cashna nishpa tigrachirca:

—Ñuca amo Moiseslla, chashna rimanajujcunataca jarcapairi— nircami.

Chairalla viñai puramanda Josueca, Moisesta ayudajmi carca.

29Shina nijpimi Moisesca, cashna nirca:

—¿Canga, ñucata juchachishpachu chashna nijungui? Mandaj Dios paipaj Espirituta paicunapi churajpi, tucuicuna Dios ima nishcata villajcuna tucushpapash, alimi canman— nircami.

30Chaimandaca Moisespash, israelcunata mandaj rucucunapash, paicuna causanajuj carpacunaman tigrarcallami.

31Mandaj Dios cachamushca huaira shamushpami, mama cuchamanda codorniz nishca alasyu animalcunataca, carpacunata israelcuna shayachishpa tianajuj pushtuman cachamurca. Chaimandami codornizcunaca, caishuj ladomambash, chaishuj ladomambash, shuj punllatashna rina carupi, carpa muyundicunapi urmanajurca. Vichai jahuamambash, iscun chunga centimetrotashnami jahuan jahuan tianajurca.

32Shina cajpimi gentecuna llujshishpaca tucui punlla, tucui tuta, cati punllapash tucui punlla codornizcunataca pallanajurca. Ashagutalla japin nishcami, chunga mundun codornizcunata japinajurca. Chai codornizcunataca, paicunapaj carpa muyundicunapimi mandanajurca.

33Gentecuna chai aichata shimipi charinajushpapash nara acujpillatami, Mandaj Diosca paicunata ninandapacha fiñarca. Chaimandami chai gentecunapajman, huañuchij llaquita cachamushpa huañuchirca.

34Na amishpa micuj gentecuna huañujpi, chaipi pambashcamandami chai pushtutaca, Kibrot-hataava shutita shutichirca.

35Israelcunaca, Kibrot-hataava shuti pushtumandaca, Hazerot shuti puebloman rishpami, chaipi quedarca.