JOB 20 - Quichua Imbabura Bible

Nalicunaca llaquichi tucunatami, Zofar shuti runaca villajun

1Naamatita nishca Zofar shuti runaca, cashna nishpami tigrachirca:

2“Ñuca yuyaicunapachami tigrachishpa rimachigrihuan. Shinamandami, ucha rimangapaj munani.

3Ñucata nalicachishpa rimajtami uyashcani. Shinamandami, ali yuyaita charij ñuca espirituca, ñuca imashna tigrachinata yarichijuhuan.

4Cai pachapi runata churashca punllamandapacha, chashna cajtaca, ¿nachu yachangui?

5Nalita ruraj runacunapaj cushijunaca, ñapash tucurinllami. Diosta na manllaj runapaj cushijunapash ashallami.

6Jahua pachaman chayajta jariyashpapash, paipaj uma fuyucaman chayana cashpapash,

7pai mapayachishca huanushnallatami, chingaita chinganga. Paita ricushcacunapash: ‘Paica, ¿imata tucushca?’ ninajungami.

8Muscuishnalla chingangallami, paitaca napacha tari ushangachu. Muscuipi imatapash tuta ricushcashnami chingangalla.

9Paita ricujcunaca ima horapash, na ashtahuan ricungachu. Pai maipi causashca pushtupash, paitaca na ashtahuan ricungachu.

10Paipaj huahuacunaca, imagutapash na charijcunatarami mañanajunga. Paipaj maquillatami, pai imata shuhuashcatapash tigrachinga.

11Paipaj tullucunaca, shinllira cashpapash, ashtahuangarin paihuanllatami ñutu alpapi sirijunga.

12Nalicunatara paipaj shimipi mishquichishpami, jallu ucupilla pacalla charijushcanga.

13Alimi yashpa na shitashpami, ashtahuangarin paipaj shimi ucupilla charijushcanga.

14Shina rurashca cajpica, paipaj vijsa ucupimi, chai micunaca shuj tigranga. Paipaj vijsa ucupica, millai culebrapaj jayajshnami tucunga.

15Ashtaca charishcacunata langashca cashpapash, shungu tigrachingami. Paipaj vijsa ucumandaca, Taita Diosmi llujchinga.

16Millai culebrapaj venenotami chupanga, culebrapaj jallumi huañuchinga.

17Jatun larca yacucunatapash, jatun yacucunatapash, ninanda jatarij huaicu yacucunashna llujshijuj balun mishquitapash, lechetapash na ricungachu.

18Pai imatalla rurashcamanda, ima alicunata japijushcataca cutinmi tigrachinga. Chaicunataca na langashpa cushijungachu.

19Imagutapash na charijcunata llaquichishpa, jichushpa saquishpami, napash huasichishpata, quichushpalla huasiyu tucushca.

20Shinamandami paipaj vijsapica, napacha jundachinga. Ninanda munashpa, imata pai charishcatapash, napacha quishpichi ushangachu.

21Paica, imatapash na puchuchishpami, tucuillata micurca. Shinamandami pai imatalla charishcacunapash, na unaicaman tianga.

22Yapata charijyashca punllapimi, llaquicuna quichijimunga. Jatun nalita runacuna tucuilla shamushpami quichunajunga.

23Paipaj vijsapi jundachingapaj tiajujpimi, Taita Diosca nina japirinshna pai fiñarishcataca, paipaj jahuapi cachamunga. Chaitaca paipaj jahuapipash, paipaj micuna jahuapipashmi tamiachimunga.

24Jirruta rurashca macanajunacunamanda pacajushpa calpajujpipash, bronce arcohuanmi, ñaupajman yalijta chugrichinga.

25Paipaj cuerpotaca flechami, tujsishpa llujshinga. Punchapamba flecha pundami, paipaj jayajta chaupishpa llujshinga. Jatun manllaicunapashmi, paitaca japinga.

26Pai imatalla charishcacunapaca, yana yana tutacunami alichishca tiajun. Na fucushpa japichishca ninami tucuchinga. Paipaj carpapi imalla tiajtapashmi tucuchinga.

27Jatun nalita pai rurashcataca, jahua pachami ricuchinga. Paita llaquichingapaca, cai pachami jataringa.

28Paipaj huasipi tiaj retoñocunaca, apai tucungami. Pai ninandapacha fiñarishca punllapica, caita chaitami shitai tucunajunga.

29Taita Diosca, paita na manllaj runapaca, chaicunatami alichishca charijun. Taita Diosca, paipaj shimihuanmi, runa japinataca señalashcalla charijun” nijurcami.