Psalms 51 - Quichua Imbabura Bible

Juchata maillahuai nishpami, llaquirishpa mañashca(2 Sam. 12:1-15)Betsabé shuti huarmipi David chayashca jipami, Dios ima nishcata villaj Nataán runaca, Davidpajman shamurca. Candajcunata mandaj candachijuchun, David rurashca Salmomi.

1Taita Dioslla, can imashna llaquin

cashcashnallata, ñucata llaquihuayari.

Imashna ninanda llaquin cashcashnallata,

ñuca na cazushpa jariyashcata anchuchipairi.

2Jatun nalita rurashcataca, ashtahuan

ashtahuan maillahuayari.

Ñuca juchata fichahuayari.

3Canda na cazushcamandaca, ninandami llaquirini.

Ñuca juchaca yarichijuhuanllamari.

4Canda ninanda fiñachishpamari, juchata rurajushcani.

Cambaj ñaupajpimi, chai jatun nalitaca rurajushcani.

Canga, juchachina cajpillatami juchachihuangui.

Ñuca juchamandallata llaquichishcataca,

imata nitapash na ushapanichu.

5Ricui, ñucaca mamapaj vijsapillatami,

na ali cashcani.

Ñuca mamaca, juchandillatami vijsayu tucuhuashca.

6Ricui, canga na llullajtami ninanda juyangui.

Chaitami ñucamambash, shungupilla

ali yachaita yachachihuarcangui.

7Ñuca juchataca, hisopo nishca

malquihuan anchuchihuayari.

Shina anchuchijpimi, ima mapapash illaj tucusha.

Maillahuayari, can maillajpimi,

rasutapash yali yuraj yuraj tucusha.

8Ninan cushijunata uyachihuayari.

Shina rurajpimi, tullucaman can

llaquichishca cajpipash, cutin cushijusha.

9Ñuca juchacunataca, ama ricuhuaichu.

Nalita rurashcataca, tucuilla fichahuayari.

10Taita Dioslla, ñucapica ima

mapapash illaj shunguta rurahuayari.

Aligutalla ruraj espirituta,

ñucapica cutin churahuayari.

11Cambaj ñaupajmandaca, ama anchuchihuaichu.

Cambaj jucha illaj Espiritutapash,

ñucamandaca ama anchuchihuaichu.

12Can quishpichijpi cushijushcataca,

cutinllata cuhuayari.

Cambaj ali Espirituhuan charihuangui.

13Shina rurajpimi, canda na cazujcunataca,

canda cazushpa causanata yachachisha.

Juchata rurajcunaca, cambajman tigrarinajungami.

14Taita Dioslla, pitapash huañuchinamandaca

jarcahuayari.

Ñucata quishpichij Taita Dioslla,

imatapash cashcatapacha can rurashcatami,

ñuca jalluhuanga candasha.

15Jatun Dioslla, ñuca shimita pascahuayari.

Shina rurajpimi candaca, shujcunapaj

ñaupajpi alicachisha.

16Canga, animalta carashpa ñuca huañuchijuchumbash,

animalta canman cushpa tucuillata

rupachijuchumbash na munanguichu.

17Shungu faquirishpa llaquirinaca, Taita

Diosman animalta carashpa huañuchishcashnami.

Taita Dioslla, ninanda llaquirishca ali

shungutaca, na yangapi churanguichu.

18Sion pueblopica, cambaj juyaihuan alita rurapairi.

Jerusalén muyundipica, pircacunata shayachipairi.

19Chashna rurajpimi, imatapash cashcatapacha

rurashpa, animalcunata canman carashpa

huañuchishcapash, candaca cushichinga.

Animalta canman cushpa tucuillata

rupachishcapash, na cashpaca imatapash canman

cushpa tucuillata rupachishcapashmi,

candaca cushichinga.

Shina cajpimi cambaj altarpica,

shicucunata canman carashpa rupachinajunga.