MATEO 12 - Quichua Imbabura Bible

Jesuspaj yachajujcunaca, samana punllapimi trigo umata fitinajushca(Mar. 2:23-28; Luc. 6:1-5)

1Chai punllacunapimi, trigo pambata Jesusca, samana punllapi paipaj yachajujcunandi yalijurca. Paipaj yachajujcunaca, ninanda yarjachishpami, trigo umata fitishpa micui callarinajurca.

2Chaita ricushpami fariseocunaca, Jesusta cashna ninajurca:

—Ricui: ‘Samana punllapica, na chashna ruranachu’ nishpa mandashcata na cazushpami, cambaj yachajujcunaca chashna ruranajun— ninajurcami.

3Ashtahuangarin Jesusca, cashnami nijurca:

—Jatun mandaj David, paihuan purijcunandi ninanda yarjachinajushpa imatalla rurashcataca, ¿nachu leyishcanguichi?

4Paicunaca yarjachishpami, Taita Diospaj huasiman yaicushpa, Diosman carashca tandacunataca micunajurca. Chaitaca, mandashca shimipi nijunshnaca Davidpash, paihuan purijcunapash na micui ushanallachu carca. Chaitaca, curacunallami micui ushana carca.

5Samana punllapica, yanga punllapishnallata Diospaj huasi ucupi imata rurashpapash, curacunaca na juchayu tucunllu. Mandashca shimipi chashna nijujtaca, ¿nachu leyishcanguichi?

6Cangunataca, cashnami nini: Diospaj huasitapash ashtahuan yali alimi caipi.

7Escribishcapica cashnami nijun: ‘Shujcunata llaquishpa causachunmi munani. Animalcunata cushpa huañuchinajuchunga, na munanichu’ nijunmi. Imamanda chashna nijujta yachashpaca, ima nalitapash na rurajcunataca, na yangamanda ninanda llaquichinguichimanllu carca.

8Runa Aichayu tucushca ñucami, samana punllatapash mandaita ushani— nijurcami.

Maqui chaquishpa curparishca runatami, Jesusca alichishca(Mar. 3:1-6; Luc. 6:6-11)

9Chai pambata Jesús yalimushpaca, tandanajuna huasimanmi shamurca.

10Chai ucupimi, maqui chaquishpa curparishca runapash tiajurca. Chai ucupi tianajuj huaquin runacunaca, Jesusta juchachingapajmi, cashna nishpa tapunajurca:

—Mandashcapi nijunshna, samana punllapi shuj huañujuj runata alichinaca, ¿alichu canga?— ninajurcami.

11Shina nijpimi Jesusca, cashna nirca:

—Shujlla llamaguta canguna purapi charijujpi, samana punlla cajpipash utujupi huashajujpica, ¿maijan runashi na japishpa saquinman?

12¡Gentecarin, llamagutapash yali ashtahuan alimari! Samana punlla cajpipash, aliguta ruranaca alimi— nircami.

13Jesusca cashna nishpallami, chai huañujuj runagutaca:

—Maquita chutai— nirca.

Shina nijpi maquita chutajpica ali tucurcallami, caishuj lado maquishnallatami ali tucurca.

14Chai ucumanda fariseocuna llujshishpaca, Jesusta huañuchingapajmi tandanajushpa parlanajurca.

Dios agllashca servijmandami villajun

15Huañuchingapaj parlarinajujta yachashpami Jesusca, chai pueblomanda llujshishpa rirca. Ashtaca gentecunami catinajurca. Huañujujcunatapash tucuillatami alichijurca.

16Shina alichishpami, pai chashna alichishcataca, pimambash ama villachun nishpa, shinllitapacha rimarca.

17Profeta Isaías villashca pactachunmi, Jesusca chashna rimarca. Isaiasca cashnami nijurca:

18“Ñucata servij runaguca, caimi.

Paitami agllarcani.

Ñuca Juyashca cajpimi, paimandaca ninanda cushijuni.

Ñucapaj Espiritutaca, paimanmi carasha.

Pai aliguta ricushpa mandanatami, na israelcunaman villajunga.

19Paica, pihuambash na fiñanajushpa rimarijungachu.

Paitaca, ñangunapi caparishpa rimajujtallapash na uyangachu.

20Paica, vishtuyashpa urmajuj sucustapash na faquingachu.

Huañuj huañujlla rupashpa cushnijuj michatapash na huañuchingachu.

Pai aliguta ricushpa mandana punllacamanmi, na chashna ruranga.

21Paipaj shutipimi, tucui na israelcuna shuyanajunga” nijurcami.

Diospaj Espiritutami, nali shimicunata rimashca(Mar. 3:20-30; Luc. 11:14-23)

22Chai jipami, aya jundashca, ñausa, na rimai ushaj runaguta Jesuspajman apamunajurca. Ñausa, na rimai ushaj chai runaguta Jesús alichijpica, paica ricuitapash, rimaitapash usharcallami.

23Chashna rurajpimi, tucui gentecuna ninanda manllarishpa, cashna ninajurca:

—¿Cai runaca, Davidpaj Churichu, imashi?— ninajurcami.

24Ashtahuangarin shina ninajujta fariseocuna uyashpami, cashna ninajurca:

—Cai runaca, ayacunata mandaj Beelzebú shuti diablopaj ushaihuanmi, ayacunataca llujchishpa cachan— ninajurcami.

25Paicuna chashna yarinajujta Jesús yachashpami, cashna nijurca:

—Shuj llactapi mandajcuna, paicunapura fiñanajushpa macanajushpaca shicanyarishpami, chai llactaca llaquinayaita tucurinman. Shinallata pueblopi causajcuna cashpa, huasi ucu puracuna cashpapash fiñanajushpaca, shicanyarishpami tucurinman.

26Satanasllata, Satanasta llujchishpa cachajushpaca, pai purapash shicanyarishcami canman. Chashna cashpaca, ¿imashnamanda pai mandashpa tiajunaca tiajunmanllayari?

27Beelzebú shuti diablopaj ushaihuan ayacunata ñuca llujchishpa cachajujpica, ¿pipaj ushaihuanda cangunapaj yachajujcunaca, ayacunata llujchishpa cachan? Shina cashcamandami, cangunapaj yachajujcunallata cangunapaj juezcuna tucunga.

28Ashtahuangarin Taita Diospaj Espiritupaj ushaihuan ayacunata ñuca llujchijushpaca, Taita Diospacha mandajujpi causana ña chayamushcatami ricuchijuni.

29Shuj ninan shinlli runapaj huasiman shuhuangapaj yaicushpa, chai runata nara huatashpaca, ¿imashnata shuhuaita ushangayari? Paita huatashpallami, imata charishcatapash shuhuai ushanga.

30Maijambash na ñucahuan cashpaca, ñucata fiñajmi. Maijambash na ñucahuan tandachishpaca, ñuca tandachingapaj munashcatapash, calpachishpami saquin.

31Shinamandami cangunataca, cashna nini: Runacuna ima juchata rurashcatapash, ima nali shimicunata rimashcatapash Diosca cungangami. Ashtahuangarin Diospaj Espirituta nali shimicunata rimashcataca, napacha cungangachu.

32Runa Aichayu tucushca ñucata maijambash nalicachishpa imata rimashcatapash, Diosca cungangami. Ashtahuangarin Diospaj jucha illaj Espirituta ninanda nalicachishpa rimashcataca, cai causaipipash, jipa causaipipash napacha cungangachu.

33Ali yuragupica, ali granogu fucujta yarichi. Na cashpaca, nali yurapica nali grano fucujta yarichi. Fucujta ricushpami, ima yura cajtapash rijsinchi.

34¡Culebrashna nali miraicunamari canguichi! Cangunallata nalicuna cashpaca, ¿imashnata aliguta rimaitaca ushanguichiyari? Imata rimachumbash shungupi ninanda yarichijujpimi, shimica riman.

35Ali runaguca, paipaj shungupi aligutalla alichishca tiajujpimi, imatapash aligutalla riman. Ashtahuangarin nali runaca, paipaj shungupi nalitalla yarichijujpimi, imatapash nali shimicunatalla riman.

36Ashtahuangarin cangunataca, ñucami cashna nini: Dios llaquichijui punllapimi, gentecuna nalita yarishpa yangata rimashca shimicunataca, tucuita ricuchinajunga.

37Can imata rimashca shimicunamandami, imatapash cashcatapacha rurashca ricuringui. Shinallata can imata rimashca shimicunamandami, ninanda llaquichi tucungui— nijurcami.

Jatun nali miraicunaca, imatapash rurashpa ricuchijuchunmi munashca(Mar. 8:12; Luc. 11:29-32)

38Chai jipami, huaquin fariseocunapash, mandashca shimita yachachijcunapash Jesustaca, cashna ninajurca:

—Yachachij, imagutapash juyailla can rurajta ricungapajmi ninanda munanchi— ninajurcami.

39Shina nijpimi Jesusca, cashna nishpa tigrachirca:

—Cunan cai nali miraicunaca, cazarashca jahua shujcunahuan causaj, nali miraicunamari. Chaimandami, imatapash juyailla rurashcata ricungapaj munashpapash napacha ricunga. Ashtahuangarin Profeta Jonás ima tucushcatallami ricunga.

40Jonasca, quimsa punlla, quimsa tutatami, jatun pijipaj vijsa ucupi tiajurca. Shinallatami Runa Aichayu tucushca ñucapash, quimsa punlla, quimsa tutata, alpa ucupi pambashca casha.

41Nínive shuti pueblopi causajcunaca, Jonás villajpimi, ninanda llaquirishpa Diospajman tigrarirca. Dios llaquichijui punllapimi, Nínive shuti pueblopi causashca gentecunaca, cunan miraicunataca ninanda llaquichi tucunapachami canguichi nishpa jataringa. Ñucami, Jonás runatapash yali caipi cani.

42Salomón runaguca, alipacha yachajushcami carca. Pai alipacha yachajushcata uyangapaca, urai llactata mandajuj huarmimi, caru caru llactamanda shamurca. Chai huarmimi, Dios llaquichijui punllapica, cunan miraicunataca ninanda llaquichi tucunapachami canguichi nishpa jataringa. Ñucami, Salomondapash yali caipi cani.

Mapata rurachij ayata llujchishpa cachajpipash, cutin tigranllami(Luc. 11:24-26)

43Mapata rurachij ayata shuj runamanda llujchijpica, jichushca pambacunapimi samanata mascashpa purijun. Shina mascashpapash, na tarinllu.

44Chai jipaca, cashnami nin: ‘Ñuca maipi causajushca runapajmanllata tigrashalla’ nishpami tigran. Shina tigrashpaca aliguta fichashca, juyailla alichishca, chushaj huasitashnami tarin.

45Chashna tarishpaca, chai ayaca paitapash yali millai ayacunata canchis purata pushangapajmi rin. Chai ayacunaca, tucuilla chai runapi yaicushpaca, punda causajushcatapash yali ashtahuan nalimanmi tigrachin. Chashnallatami cunan nali miraicunaca, ashtahuan naliman tigranga— nijurcami.

Jesuspaj mamamandapash, huauquicunamandapashmi villajun(Mar. 3:31-35; Luc. 8:19-21)

46Chai gentecunaman Jesús villajujpillatami, paipaj mamapash, huauquicunapash shamurca. Paicunaca, parlangapaj munashpami canllapi shuyanajurca.

47Chaimandami shuj runaca:

—Ricui, cambaj mamapash, huauquicunapash canhuan parlangapajmi shamushca. Canllapimi shuyanajun— nishpa, Jesusman villarca.

48Chaita villaj shamuj runaman Jesús tigrachishpaca:

—¿Pita ñuca mama? ¿Pita ñuca huauquicuna?— nircami.

49Shina nishpallami Jesusca, paipaj yachajujcunata maquihuan ricuchishpa, cashna nirca:

—Ricuichi, caicunami ñuca mama, caicunami ñuca huauquicuna.

50Jahua pachapi tiajuj ñuca Taita munashcata tucuilla rurajcunallami, ñuca huauqui, ñuca pani, ñuca mama— nircami.