DEUTERONOMIO 21 - Quichua Imbabura Bible

Maijan huañuchishcata na yachashca juchamanda, Diosman cunatami villajun

1Cambaj cachun canda Mandaj Taita Dios, canman carashca llactapi cashpaca, pambapi huañushca sirijujta taringuipashchari. Paitaca, pi huañuchishcatapash na yacharingachu.

2Shina cajpica, canda mandaj rucucunapash, juezcunapashmi, chai huañushca sirijushca ashtahuan ladolla muyundi pueblocunacaman, imashna caru cajta medishpa ricungapaj llujshinga.

3Chaita ricushpaca, chai huañushcata tarishca ladomandaca, ashtahuan ladolla pueblopi causanajuj mandaj rucucunami, huarmi huagra puramanda nara yapushca, nara yugushca huarmi shicuta japinga.

4Chai pueblopi mandaj rucucunaca, chai huagrataca yacu tiaj pugru pambamanmi apanga. Chai pambaca, nara yapushca, nara imatapash tarpushcami canga. Chai pugru pambapimi, huarmi shicupaj cunga tulluta faquinga.

5Chai jipaca, levita nishca runapaj churi curacunami chaiman shamunajunga. Canda Mandaj Taita Diosca, paicunatami paita servishpa causanajuchun, Mandaj Diospaj shutipi bendicianajuchun agllashca. Ima fiñanajui tiajpipash, ima llaquicuna tiajpipash, paicuna ricushpa mandajpimi, imata cashpapash ruranajunga.

6Huañushca sirijushcata tarishca ladomandaca, ashtahuan ladolla pueblopi causaj mandaj rucucunami, huarmi shicupaj jahuapi maquita maillanajunga. Chai shicutaca pugru pambapimi, cunga tulluta faquishpa huañuchirca.

7Chaipaj jipaca, cashnami ninajunga: ‘Cai runapaj yahuartaca, na ñucanchi maquihuan jichurcanchichu. Ñucanchi ñavihuambash, na ricurcanchichu.

8Mandaj Dioslla, can agllashpa can quishpichishca israelcunapaj juchataca cungapairi. Cai runapaj yahuarmandaca, ima nalita rurashcapash na ricurij israelcunataca ama juchachipaichu’ ninajungami. Shinamandami, yahuarta jichashpa juchata rurashcataca cunganga.

9Mandaj Diospaj ñaupajpi imapash alitalla can rurashpami, ima nalita rurashcapash na ricurishca runapaj yahuarta jichashcata cangunapaj chaupimanda anchuchingui.

Shican shican mandashcacunami

10Canda fiñajcunahuan macanajuiman llujshijpimi, canda Mandaj Taita Diosca, paicunataca cambaj maquipi churanga. Shina churajpimi, paicuna puramanda huaquingunataca prezu japingui.

11Chai, prezu japi tucushca puracunapi, maijan huarmitapash juyaillagu cajta ricushpa munashpaca, cambaj huarmi cachun japinguilla.

12Shina japishpa cambaj huasiman pushajpimi, chai huarmica ajchatapash ruturishpa, sillutapash ruturinga.

13Shinallata prezu cashpa churajushca churajunata llujchishpa, shuj churajunata churajushpami, cambaj huasipi causanga. Paipaj taita mamamandaca, shuj quillacamanmi huacanga. Chaipaj jipaca, chai huarmipi chayanguilla. Canga, paipaj cusami cangui. Paipash, cambaj huarmimi canga.

14Chai huarmita na munashpaca, canllata cacharishpa richun saquinguilla. Culquipaca na jatunachu cangui, gañandapash na ruranachu cangui. Paita pingaichishcamandami, na chashna rurana cangui.

15Shuj runa, ishcai huarmita charishpaca, shujtaca juyangami, shujtaca na ricunayachingachu. Shina cajpipash juyashca huarmipash, na ricunayachishca huarmipashmi, churicunata paiman ungunga. Na ricunayachishca huarmimi, punda churita ungunga.

16Imatalla charishcata churicunaman chaupina punllapica, na ricunayachishca huarmihuan charishca punda churiman cunata na cushpa, juyashca huarmihuan charishca churimanlla cuitaca na ushangachu. Na ricunayachishca huarmihuan charishca churimi, paipaca punda churi.

17Ashtahuangarin tucui churicunaman cunamanda, chaupita yalishpa cungapaca, na ricunayachishca huarmipaj churimanmi, paipaj punda churi cajta yarishpa tucuita cunga. Paimi, shinllipacha cashpa chari callarishca churi. Punda churi japina cashcata japinaca, paipajmi.

18Maijanga, taita mama rimashca shimitapash na cazuj, shinlli shungupacha tucushca, na cazuj churitami charinga. Paita llaquichijpipash, na cazungachu.

19Shina cajpica, paipaj taita mamami, paicuna causanajuj pueblota mandaj rucucunapajman llujchishpa apanga. Puebloman yaicuna pungupi paicuna tianajuj ñaupajmanmi apanga.

20Pueblota mandaj rucucunamanmi, cashna ninajunga: ‘Cai ñucanchi churica, ñucanchi rimashca shimitapash na cazuj, shinlli shungupacha tucushca, na cazuj churimi. Paica ninanda micushpa, machashpallami purin’ ninajungami.

21Shina villajpimi, pai causajuj pueblopi causanajuj tucui runacuna rumicunahuan huañuchijpi, paica huañunga. Shina rurashpami, nalita rurajcunataca cangunapaj chaupimanda anchuchingui. Chaita uyashpaca, tucui israelcunami ninanda manllaringa.

22Maijan runapash jatun nalita rurashcamanda huañunapacha cajpi huañuchishpaca, caspipi huarcungui.

23Chai runapaj cuerpotaca, caspipi huarcushca tucui tuta pacarichunga, na saquinachu cangui. Caspipi huarcushca runataca, Taita Dios ninanda nalicachishcamandami, na cungashpa chai punllallata pambana cangui. Cambaj cachun canda Mandaj Taita Dios canman carashca llactataca, na mapayachinachu cangui.