1Taita Dioslla, ñuca shunguca
canda candangapaj shuyajunmi.
Salmocunatami tonochishpa candasha.
Chaimi, ñuca juyailla cushijuna.
2Salteriopash, arpapash, rijcharichiyari.
Tutamandatami rijcharisha.
3Mandaj Dioslla, candaca gentecunapaj
chaupipimi alicachijusha.
Llactacunapi causajcunapaj chaupipimi,
candaca Salmocunahuan candajusha.
4Can llaquinaca, jahua pachatapash yali jatumbachami.
Can na llullaj canapash, jahua pachacamanmi.
5Taita Dioslla, jahua pachapipash
jatunyachi tucushca capailla.
Cambaj punchapambatapash, tucui cai
pachapi jatunyachinajuchun.
6Can juyashcacuna cacharichi tucuchunga,
cambaj ali lado maquihuan quishpichipairi.
Ñuca mañajujta uyashpa tigrachihuayari.
7Taita Diosca, paipajlla huasipica cashnami nijurca:
“Ñucaca ninandami cushijusha.
Siquem shuti pueblotaca chaupishami.
Sucot shuti pugru pambatapash medishami.
8Galaad llactaca ñucapajmi,
Manasés llactapash ñucapajmi.
Efraín llactaca, ñuca umapi churajuna jirrumi.
Judá llactaca, ñuca churashca mandajmi.
9Moab llactaca, yacuta japishpa ñuca maillarinami.
Ñuca chaquipi churajunataca, Edom llactapimi shitasha.
Filistea llactata mishashpaca cushijushami” nijurcami.
10Muyundi jatun pircahuan pueblomambash,
¿pita pushahuangayari?
Edom llactacamambash, ¿pita pushahuangayari?
11Taita Dioslla, ¿nachu ñucanchita jichushpa
saquij Diosllata pushana cangui?
Taita Dioslla, ¿nachu ñucanchi
soldadocunahuan llujshin carcangui?
12Ñucanchita fiñajcunata mishangapaj ayudahuayari.
Runacunalla ayudashcapash, yanga yangami.
13Taita Dioshuanga, jatun manllarinacunatami rurashun.
Paimi, ñucanchita fiñajcunataca sarunga.
Who We AreWhat We EelieveWhat We Do
2025 by iamachristian.org,Inc All rights reserved.
