1Mandaj Diosca cashna nishpapashmi, Job runaguman tigrachirca:
2“¿Canga, alipacha yachajushca cashpachu, Tucui Ushaita Charij Dioshuan chimbapurangapaj munangui? Taita Dioshuan chimbapurangapaj maijambash munashpaca, chaicunatara tigrachihuachun” nircami.
3Mandaj Dios shina nijpimi Job runaguca, cashna nishpa tigrachirca:
4“Ricui, ñucaca imapajpash na valij runami cani. ¿Imatata tigrachi ushapashayari? Ashtahuangarin ñuca maquihuanmi, shimita llapirisha.
5Ñucaca, ñami callaripi rimarcani, ashtahuan na tigrachishachu. Cutimbashmi rimarcani, na ashtahuan tigrashpa rimashachu” nircami. Taita Diosca, paipaj ninan ushaitami ricuchishca
6Mandaj Diosca, jatun acapana chaupimandami Job runaguman, cashna nishpa tigrachirca:
7“Cunanga, cambaj cinturasta shinlli huatarishpa shayari. Ñuca tapujpimi, canga tigrachina cangui.
8¿Canllu ñuca llaquichinataca, yangapi churagringui? ¿Canga, imatapash cashcatapacha rurashca ricuringapajchu, ñucatara juchachingapaj munangui?
9¿Canga, Taita Dios ñucashnachu shinlli rigrata charingui? Can rimashcapash, ¿ñuca rimashcashnachu culun nishpa uyarin?
10Cunanga, jatun cashcahuan, alicachi tucushcahuan alichiriyari. Alicachi tucushcatapash, juyailla canatapash churajuyari.
11Nina japirinshna, ñapash fiñarishpa rimayari. Jariyashcacunata ricushpa, tucuillata tucuchiyari.
12Jariyashpa jatun tucujcunata ricushpa, tucuillata pingaichiyari. Diosta na manllajcunatapash, paicuna tianajuj pushtupillata llaquichiyari.
13Paicunataca, tucuillata ñutu alpapi quilpayari. Ñavi ama ricuchumbash, yana yanapi vichayari.
14Shina rurajpica ñucapash, cambaj ali lado maquihuanllata quishpiri ushanatami villasha.
15Cunanga, ricui behemot nishca animaltaca, candashnallatami rurarcani. Chai animalca, huagrashnami jihuata micun.
16Ricui paica, ninan ushaitaca huashapimi charin. Ninan shinlli canataca, vijsa aichapimi charin.
17Paipaj chupatapash, cedro caspitashnami cuyuchin. Changapi tiaj angucunapash, caiman chaiman huatarishcashnami.
18Paipaj tullucunaca, bronceshna shinllipachami. Paipaj cuerpopi imalla tiashcapash, jirru barrashnami.
19Taita Dios ñucaca, paitami tucui animalcunamanda punda rurarcani. Paita ruraj ñucaca, paitaca espadahuan huañuchinajuchun saquishallami.
20Urcucunapi jihuacunapash, paipajllami viñan. Tucui urcu animalcunami, chaipica pugllashpa fahuanajun.
21Paica, llandulla ucucunapimi siririn. Yacu llujshijuj pambacunapi viñashca sucus ucucunapimi pacajun.
22Paitaca, jatun quirucunami llandun. Yacu manñapi tiaj sauce quirucunami, muyundi jarcan.
23Ricui, paica jatun yacu manllanayaita mirajpipash, na manllanllu. Jordán yacu jatarishpa, paipaj shimipi huactajujpipash, na manllashpa casilla shayajunllami.
24¿Pai chapajujpica, pipash japi ushangachu? ¿Paipaj singatapash utujui ushangachu?
Who We AreWhat We EelieveWhat We Do
2025 by iamachristian.org,Inc All rights reserved.
