JOSUÉ 24 - Quichua Imbabura Bible

Josueca, tucuri shimicunatami parlajushca

1Josueca, tucuilla Israel aillucunatami, Siquem shuti pueblopi tandachirca. Shinallata paicunata mandaj rucucunata, mandajcunata, juezcunata, caishuj mandajcunatapash cayajpimi, Taita Diospaj ñaupajpi tandanajurca.

2Chaipimi Josueca, tucui gentecunata cashna nijurca:

—Israelcunata Mandaj Taita Diosca, cashnami nin: ‘Cangunapaj ñaupa taitacunaca, jatun yacu chimba ladopimi, punda huatacunaca causanajurca. Paicuna puramandaca, Taré shuti taitapashmi carca. Paimi Abrahambaj, Nacorpaj taita carca. Paicunaca, shuj dioscunata servishpami causanajurca.

3Chai jatun yacu chimba ladomandami, cangunapaj taita Abrahamdaca tucui cai Canaán llactata pushamurcani. Isaac shuti churita carashpami, paipaj miraicunataca ashtacata mirachircani.

4Isaacmambash, Jacobo shuti, Esaú shuti churicunatami cararcani. Esaú shuti runa japichunga, Seir shuti llactapi urcutami cararcani. Ashtahuangarin Jacoboca, paipaj churicunandimi, Egiptoman urai rirca.

5Ñucaca, Moisesta, Aaronda cachashpami, Egiptopi causajcunataca, paicunapaj llacta chaupipi llaquichishcashnallata llaquichircani. Chai jipami, cangunataca llujchimurcani.

6Cangunapaj taitacunataca, Egiptomandami llujchimurcani. Shina llujshishpa mama cuchaman ña chayamujpimi, Egiptopi causajcunaca, cangunapaj taitacunataca, carretacunahuan, caballocunahuan, Puca Cuchacaman catimurca.

7Mandaj Dios ñucata caparishpa israelcuna mañajpimi cangunapaj, Egiptomanda runacunapaj chaupipi amsa fuyuta churarcani. Shinallata paicunapaj jahuapica, mama cuchatami cacharircani. Chai yacumi, paicunataca quilparca. Egiptopi chashna rurajtaca, cangunapaj ñavihuambachami ricurcanguichi. Chai jipaca, tauca punllacunatami jichushca pambapi causarcanguichi.

8Chaimandaca ñucami, Jordán yacu chimba ladoman causaj amorreocunapaj llactaman pushamurcani. Paicunami, cangunahuan macanajurca. Ashtahuangarin paicunataca, cangunapaj maquipi ñuca churajpimi, paicunapaj alpacunataca cangunapaj cachun japircanguichi. Shinallata paicunataca, cangunapaj ñaupajpimi tucuchircani.

9Chai jipaca, Zipor shuti runapaj churi, moabitacunata jatun mandaj Balac shuti runami, israelcunahuan macanajungapaj jatarirca. Chai Balac shuti runami, Beor shuti runapaj churi Balaam shuti runataca, cangunataca ima llaquipash japishpami ali canman nichun, cayachun cacharca.

10Shina cajpipash Balaam runa mañashcata na uyashpami, cangunataca cutin cutin bendiciarcani. Chashnami cangunataca, paicunapaj maquimanda quishpichircani.

11Chai jipaca, Jordán yacuta chimbashpami Jericó puebloman chayamurcanguichi. Shinallata chai Jericó pueblopi causajcunapashmi, cangunahuan macanajurca. Paicunaca: Amorreo, ferezeo, cananeo, heteo, jergeseo, heveo, jebuseo nishca gentecunami carca. Paicunatapash, cangunapaj maquipi ñuca churajpimi misharcanguichi.

12Amorreocunata ishcai jatun mandajcunataca, cangunapaj espadahuambash, cangunapaj arcohuambash na llujchishpa cachashcachu canguichi. Ñucami, canguna nara chayamujpi, tábano nishca chuspicunata cacharcani. Chai chuspicunami, paicunataca llujchishpa cacharca.

13Shinami, canguna na tarpushca chagracunandi alpacunata curcani. Canguna na shayachishca pueblocunatapashmi curcani. Chai pueblocunapimi causanajunguichi. Canguna na tarpushca uvasta, olivostami micunajunguichi’ ninmi.

14Cunanga, Mandaj Diosta manllashpa, ima nalitapash na rurashpa, na llullashpa, paitalla servishpa causaichi. Canguna puramandaca, cangunapaj ñaupa taitacuna jatun yacu chimba ladopi causanajushpa servinajushca dioscunata, Egiptopi causanajushpa servinajushca dioscunataca anchuchinami canguichi. Shina anchuchishpami, Mandaj Diostalla servishpa causana canguichi.

15Mandaj Diosta servishpa causana cangunapi nali ricurijpica, maijan diosta servina cashpapash, cangunallata agllaichilla. Cangunapaj ñaupa taitacuna, jatun yacu chimba ladopi causanajushpa servinajushca dioscunata, na cashpaca cunan canguna causanajuj amorreocunapaj dioscunata servina cashpapash agllaichilla. Shina cajpipash ñucahuan, ñuca familiacunahuanga, Mandaj Diostami servishpa causashun— nijurcami.

16Shina nijpimi israelcunaca, cashna nishpa tigrachinajurca:

—Mandaj Diosta saquishpa, shuj dioscunatara servishpa causanaca, ima horallapash ama chashna tucuchun.

17Ñucanchita Mandaj Taita Diosmi ñucanchitapash, ñucanchi taitacunatapash, Egipto llactamanda llujchimushca. Egiptopi gañan causanajujtami, shuj jatun ricuchinacunata rurashpa ricuchishpa llujchimushca. Paimi, ñucanchitaca chai tucui ñangunata shamunajujpipash, chai tucui gentecunapaj chaupita yalishpa shamunajujpipash cuidashca.

18Tucui chai gentecunataca, Mandaj Diosmi ñucanchi ñaupamanda llujchirca. Cai llactapi causanajuj amorreocunatapashmi llujchirca. Chaimanda ñucanchipash, Mandaj Diostami servishun. Paica, ñucanchi Taita Diosmi— ninajurcami.

19Shina ninajujpimi Josueca, chai gentecunataca cashna nirca:

—Cangunaca, Mandaj Diosta servishpa causaitaca, na ushanachu canguichi. Paica, jucha illaj Taita Diosmi. Paipajlla causachun munaj Taita Diosmi. Chaimandami, canguna paita na cazushcata, canguna juchacunata rurashcataca, na yanga ricunga.

20Mandaj Diosta saquishpa, shuj dioscunatara servinajujpica, cangunata fiñashpa llaquichishpami tucuchinga. Cangunaman alicunata rurashca cashpapash, cangunataca tucuchingami— nircami.

21Shina nijpimi israelcunaca, Josuetaca cashna ninajurca:

—Na chashnaca rurashunllu. Ashtahuangarin Mandaj Diostami servipashun— ninajurcami.

22Shina ninajujpimi Josueca, chai gentecunaman cashna nishpa tigrachirca:

—Mandaj Diosta servinataca, cangunallatami agllarcanguichi. Chaita na pactachishpa llaquichi tucunatapash, cangunallata yachanguichimi— nircami.

Shina nijpimi, israelcunaca:

—Ari, ñucanchillata yachapanchimi— nishpa tigrachinajurca.

23Shina ninajujpimi Josueca, cashna nirca:

—Shina cashpaca, cunanga canguna purapi tiaj shuj dioscunata anchuchishpa, israelcunata Mandaj Taita Diostalla tucui shunguhuan cazushpa causaichi— nirca.

24Shina nijpimi israelcunaca, Josueman cashna nishpa tigrachirca:

—Ñucanchica, ñucanchita Mandaj Taita Diostami servishun. Pai imatalla nishcatami cazushun— ninajurca.

25Shina nijpimi Josueca, chashna rurangapaj israelcunahuan chai punllallata ari ninajurca. Shinallata pactachinajuchun cushca shimicunatapash, mandashca shimicunatapashmi, Siquem shuti pueblopi curca.

26Josueca cai shimicunataca, Taita Dios mandashca shimicunata escribina libropimi escribirca. Chai jipaca, jatun rumita japishpami, Mandaj Diospaj carpa ladopi tiaj encina nishca quiru ucupi churarca.

27Chaipimi Josueca, tucui israelcunata cashna nirca:

—Ricuichi, ñucanchi caita rurashcataca, cai rumimi yachan. Cai rumimi, Mandaj Dios ñucanchita tucui imatalla mandajtaca uyarca. Cangunapaj Taita Diosta fiñashpa ama llullachunmi, cai rumica cangunata llaquichijuchun yarichishpa tiajun— nircami.

28Chai jipaca, Josueca tucui israelcunatami, paicunapaj alpacunaman cacharca.

Josué huañushcatami villajun(Jue. 2:6-10)

29Chashna tucushca jipacunami, Mandaj Diosta servij Josueca huañurca. Josueca, Nun shuti runapaj churimi carca. Paica, patsaj chunga huatacunata charishpami huañurca.

30Josuetaca, Efraín shuti urcupi Timnat-sera shuti paipaj alpapillatami pambarca. Chai alpaca, Gaas shuti urcumandaca jahua ladomanmi carca.

31Israelcunaca, Josué causajui tucui huatacunapica, Mandaj Diostalla servishpami causanajurca. Shinallata Josué huañushca jipapi, mandaj rucucuna causanajushca punllacunapipashmi, Diosta servishpa causanajurca. Chai runacunami, israelcunaman Mandaj Dios tucui imatalla rurashcataca ricushca carca.

Josepaj tullucunataca, Siquem shuti pueblopimi pambashca

32Israelcuna Egiptomanda apamushca Josepaj tullucunataca, Siquem shuti pueblo ladopimi pambarca. Chai asha alpacunataca, taita Jacobomi, Siquem shuti runapaj taita Hamor shuti runata patsaj culquipaj randishca carca. Chai alpatami, Josepaj churicunaca paicunapaj cachun japinajurca.

Eleazar shuti huañushcatami villajun

33Shinallata Aaronbaj churi Eleazar shuti runapashmi huañurca. Paitaca, paipaj churi Finees shuti runapaj alpapi tiaj lomapimi pambarca. Chaitaca, Efraín shuti urcupimi cushca carca.