ISAÍAS 26 - Quichua Imbabura Bible

Mandaj Dios cuidajujta yariashpa candanami

1Chai punllami, Judá llactapica cai candanacunata candanajunga: “Jatun pircahuan jarcashca pueblotami charinchi. Taita Diosmi ñucanchita quishpichingapaca, jatun pircacunata muyundi shayachirca.

2Diosta cazushpa, imatapash cashcatapacha rurashpa causajcuna yaicumuchunga, pueblo pungucunata pascaichi.

3Mandaj Dioslla, canda na cungashpa yariajlla causajcunataca, canmi cuidashpa casilla ali causaipi charingui. Paicunaca, candami yariajlla causanajun.

4Mandaj Diostaca, tucui causaipi yariajlla causaichiyari. Mandaj Jatun Diosca, causaita causaicamanmi ushaita cunga.

5Paimi, ali pushtupi tianajujcunataca urmachirca. Jatumbi churai tucushca paicunapaj pueblotapashmi, urai cumuchirca. Paicunataca, pingaichishpa alpaman urai cumuchishpami, ñutu alpapi shitarca.

6Chaitaca, llaquilla causajcuna, imagupash illajcunami cutin cutin sarushpa purinajunga. Paicunapaj chaquihuanmi sarunajunga” nishpami candanajunga.

7Imatapash cashcatapacha rurajpaj causaipica, imata juchachinapash na tianllu. Can Diosca, imatapash cashcatapacha ruraj cashpami, imatapash cashcatapacha rurajpaj causaitaca ricujungui.

8Mandaj Dioslla, candaca imatapash cashcatapacha rurachunmi, shuyashpa causarcanchi. Cambaj shutita na cungashpa causangapajmi, ñucanchica tucui almahuan munanchi.

9Tutapash candallami, tucui shunguhuan yariajurcani. Ñucapi causai tiashcacamanga, tutamandata jatarishpami candaca mañajusha. Cai pachataca can llaquichijpimi, cai pachapi causajcunaca imatapash cashcatapacha rurashpa causanata yachajun.

10Nalita ruraj runaca, paita llaquishpa na llaquichijpica, imatapash cashcatapacha rurashpa causanataca na yachajungachu. Aliguta rurajcunapaj llactapi causashpapash, nalitaca rurajungallami. Can Mandaj Dios mandana ushaita charijtaca, na rijsingachu.

11Mandaj Dioslla, llaquichingapaca cambaj maquita chutashcallami shuyajungui. Shina cajpipash, paicunaca na ricunllu. Can agllashcacunata ricushpa paicunashna cangapaj munajcunaca, jipalla ricushpami, pingai tucunajunga. Canda fiñajcunataca, ninami tucuchinga.

12Mandaj Dioslla, casilla ali causaitaca, canmi ñucanchiman cungui. Tucui imatalla ñucanchi rurashcatapash, canmi rurachircangui.

13Ñucanchita Mandaj Taita Dioslla, shuj mandajcunarami can Diospaj randi ñucanchita mandashpa charin. Shina cajpipash candallami, cambaj shutipi yariashpa causashun.

14Paicunaca huañushcami, ña na causangachu. Huañushcamandaca, na cutin causaringachu. Paicunataca ninanda llaquichishpami tucuchircangui. Ima yarinatallapash na saquishpami, tucuillata tucuchircangui.

15Mandaj Dioslla, can agllashcacunataca ashtahuanmi mirachircangui. Ashtahuanmi paicunata mirachircangui. Shinamandami, ninanda alicachi tucurcangui. Cai pacha tucui manñacunacamanmi jundachircangui.

16Mandaj Dioslla, jatun llaquihuan cashpami, canda mascanajurca. Can llaquichijpica, ninandapachami mañanajurca.

17Vijsayu huarmita unguna nanai japijpi nanachishpaca, aij nishpami ninanda caparin. Mandaj Dioslla, ñucanchica chashnami cambaj ñaupajpica cashcanchi.

18Ñucanchica, vijsayu tucushpa, unguna nanai japijpishnami, huairatalla ungunshna tucurcanchi. Cai llacta quishpirichunga, imatallapash na rurashcanchica. Cai pachapi causajcunaca, huacharinshna nara miranajurcachu.

19Cambaj huañushcacunaca, cutin causangami. Huañushca cuerpocunaca causaringami. ¡Ñutu alpa ucupi samajcunalla, rijcharishpa candaichiyari! Huañushcacunaca, paramuhuan granocuna viñanshnami, alpamanda llujshinajunga. Cai pachaca, huañushcacunata tigrachimungami.

20Ñuca llactapi causajcunalla, cangunaca ucucunaman yaicushpa, punguta vicharichi. Dios fiñarishcata yalichingacaman, shuj ashaguta pacajuichi.

21Ricuichi, Mandaj Diosca cai pachapi causajcuna paita fiñashpa, nalita rurashcamandami, pai mandashpa tiajushcamanda jatarishpa llaquichinga. Alpapash, paipaj jahuapi huañuchishpa yahuarta jichashcataca ricuchingami. Huañuchishcacunataca, na ashtahuan pacangachu.