EZEQUIEL 37 - Quichua Imbabura Bible

Chaquishca tullucuna tiaj pugru pambatami villajun

1Mandaj Diosmi, paipaj maquita ñuca jahuapi churarca. Shina churashpami Mandaj Diosca, paipaj Espirituhuan shuj pugru pambaman pushashpa, tullucunalla junda chaupipi churahuarca.

2Chaiman pushashpaca, tullucunalla muyundi junda chaupitami yalichihuarca. Chai tullucunaca, pamba junda ashtacapachami carca. Ninandapacha chaquishca tullucunami carca.

3Chaipimi cashna nihuarca: “Huañuna aichayu runa. ¿Cai tullucunaca, causaita chari ushangachu?” nijpimi, ñucaca: “Mandaj Dioslla, canmi yachapangui” nircani.

4Chaimandami cashna nihuarca: “Cai tullucunaman, cashna nishpa villai: Chaquishca tullucuna, Mandaj Dios imata nishcata uyaichi.

5Mandaj Jatun Diosca, cai chaquishca tullucunataca cashnami nin: ‘Ricuichi, ñucami cangunapica ñuca Espirituta churani. Chaimandami causaita charinguichi.

6Cangunapica, angucunata churashpa, aichata jundachishpami, carahuan jahualla quilpasha. Chai jipami, cangunapica ñuca Espirituta churasha. Shina rurajpimi, causaita charinguichi. Chaita ricushpami ñucataca, Mandaj Dios cajta yachanguichi’ nishpa villai” nihuarcami.

7Ñucata mandashcashnallatami, chai tullucunaman villajurcani. Chashna villajujpillatami, ninanda huacamushpa, alpa mama ñapash chujchurca. Chaipimi chai tullucunaca, tucuilla paipura tandanajurca.

8Chaita ricujujpimi tullucunapica, angucuna ñapash ricurishpa, chai jahuapica aicha llujshirca. Chai jahuataca carami quilparca, ashtahuangarin paicunapica Espirituca na tiarcachu.

9Chaimandami cashna nihuarca: “Huañuna aichayu runa. Espirituman cashna nishpa villai: Espiritulla, Mandaj Jatun Diosca cashnami nin: ‘Espíritu, cai pacha chuscundi ladomanda shamushpa, cai huañushcacunapaj jahuapi fucui. Shina fucujpica, cutin causangallami’ nishpa villai” nihuarcami.

10Chaitaca, imashna mandashcashnallatami villarcani. Chaimandami, espíritu paicunapi yaicujpi causarishpaca, jatarishpa shayarinajurca. Paicunaca, ashtaca ashtaca soldadocunashnami carca.

11Chai jipami, cashna nihuarca: “Huañuna aichayu runa. Tucui cai tullucunaca, israelcunami. Ricui, paicunaca cashnami ninajun: ‘Ñucanchi tullucunaca chaquishcami. Ñucanchipaca, imata shuyanapash ña tucurishcami. Ñucanchica, tucuillami tucuchi tucushcanchi’ ninajunmi.

12Shina cashcamanda paicunaman, cashna nishpa villai: Mandaj Jatun Diosca, cashnami nin: ‘Ñuca agllashcacunalla. Ricuichi, ñucami cangunata pambashca utujucunata pascasha. Chai pambashca utujucunamanda llujchishpami, Israel llactaman pushamusha.

13Ñuca agllashca gentecunalla. Cangunata pambashca utujucunata pascashpa, chai utujucunamanda cangunata llujchijpimi ñucataca, Mandaj Dios cajta yachanguichi.

14Ñuca Espirituta cangunapi churajpimi, causaita charinguichi. Cangunapaj llactapillatami, cangunataca samachisha. Shina rurajpimi, Mandaj Dios ñucallata shina rurashami nishpa pactachishcata yachanguichi’ ninmi Mandaj Diosca ni” nihuarcami.

Judá llactahuan Israel llactahuan tandachinatami villajun

15Mandaj Diosca cai shimicunatami, cashna nishpa villahuarca:

16“Huañuna aichayu runa. Cunanga, shuj caspita japishpa, chai caspipica: ‘Judá llactapaj, paipaj ali cumba israelcunapajmi’ nishpa escribingui. Chai jipaca, cutin shuj caspitapash japishpa, chai caspipica: ‘Efrainbaj miraicunapaj caspica Josepaj miraicunapajpash, paicunapaj cumba tucui israelcunapashmi’ nishpa escribingui.

17Chai jipaca shujlla tucuchun, ishcandi caspicunata tandachingui. Cambaj maquipica, shujllami tucunga.

18Cambaj llactapi causajcuna chaita ricushpaca: ‘Caita chashna rurashpaca, ¿imata yachachingapajta munangui? ¿Nachu ñucanchiman villanguiman?’ nishpami tapunajunga.

19Chashna tapujpica, cashna nishpa villangui: Mandaj Jatun Diosca, cashnami nin: ‘Ricuichi, ñucami Efrainbaj miraicunapaj maquipi charijuj Josepaj miraicunapaj caspitapash, paipaj ali cumba israelcunapaj caspitapash japishpa, Judá shuti runapaj miraicunapaj caspihuan tandachishpa shujllata rurasha. Shina rurajpimi ñuca maquipica, shujlla caspi tucunga’ ninmi ningui.

20Can escribishca caspicunataca, paicuna ricujta cambaj maquipi charijunguilla.

21Paicunataca cashna ningui: Mandaj Jatun Diosca, cashnami nin: ‘Ricuichi, israelcunataca, paicuna rishca shuj llactacunamandaca, tucui ladocunamanda pushamushpa tandachishpami, paicunapaj llactapillata churasha.

22Paicunataca, Israel llacta urcucunapimi, shujlla jatun llactata rurasha. Chaipica paicunataca, shujlla jatun mandajmi mandanga. Ima horapash na ishcai llacta cangachu. Ima horapash na shicanyashca mandajuj llacta cangachu.

23Paicunapaj yanga dioscunahuambash, na ashtahuan mapayanajungachu. Na ashtahuan ima millanayaicunata rurashpa mapayanajungachu, na ashtahuan na cazujcuna cangachu. Ashtahuangarin ñucata na cazushpa nalita rurashcamandaca, quishpichishami. Paicunamandaca, tucui juchatami fichasha. Paicunaca, ñuca agllashcacunami canga, ñucapash paicunapaj Taita Diosmi casha.

24Ñucata servij Davidmi, paicunata jatun mandaj canga. Tucuicunami, shujlla michijta charinga. Paicunaca, ñuca imatalla rurachun nishcatami rurashpa purinajunga. Shinallata pactachinajuchun ñuca cushca shimicunata cazushpami, chaicunata pactachishpa causanajunga.

25Ñucata servij Jacoboman carashca llactapimi causanajunga. Chai llactapimi, cangunapaj ñaupa taitacunapash causanajurca. Chai llactapillatami paicunapash, paicunapaj huahuacunapash, chai huahuacunapaj huahuacunapash, causaita causaicaman causanajunga. Ñucata servij Davidmi paicunapaca, causaita causaicaman mandaj canga.

26Casilla aliguta causangapajmi, paicunahuanga ari nisha. Paicunahuanga tucui causaipajmi, ari nijusha. Paicunata chaipi causanajuchun churashpaca, ashtacatami mirachisha. Ñucapajlla huasitapash, tucui causaipajmi paicunapaj chaupipi shayachisha.

27Ñucapajlla jatun carpapash, paicunapaj chaupipimi canga. Ñucaca, paicunapaj Taita Diosmi casha, paicunaca ñuca agllashcacunami canga.

28Ñucapajlla huasita, paicunapaj chaupipi tucui causaipaj shayachijpimi, shuj llactacunapi causajcunaca, israelcunata ñucapajlla cachun shicanyachishcata yachanajunga’ nishpa villai” nihuarcami.