1 SAMUEL 20 - Quichua Imbabura Bible

1Chai jipami Davidca, Ramá shuti pueblopi tiaj Naiot shuti pushtumanda pacajushpa, Jonatanbajman shamushpaca, cashna nirca: —¿Ñucata huañuchingapaj mascanajuchunga, ñucaca, imatata rurashcani? Cambaj taitata fiñachingapaca, ¿ima nalitata rurashcani, na cashpaca ima juchatata rurashcani?— nircami.

2Shina nijpimi Jonatanga, cashna nirca: —Ricui, canga napacha huañunguichu. Ñuca taitaca ali cajpipash, yangalla cajpipash, imata rurana cashpapash ñucaman na villashpaca, na rurangachu. ¿Imashpata chaitaca, ñuca taitaca na villahuangayari? Napacha chashna cangachu— nircami.

3Shina nijpipash Davidca, cutinmi juramentushpa cashna nirca: —Cambaj taitaca, cambaj ñaupajpi ñuca ali ricurishcataca, alimi yachan. Chaimandami canda ama llaquichingapaj, na villashcanga. Mandaj Diosca causajumbachami, cambash causajunguimi. Na llullashpami, cashna nini: Ñuca huañunaca, ñami quichijiyamujun— nircami.

4Shina nijpimi Jonatanga, Davidtaca: —Cambaj shungu imata munashcatapash, canmandaca rurashallami— nirca.

5Chashna nijpimi Davidca, Jonatandaca cashna nijurca: —Ricui, cayapaca luna llullu cashcamanda, chai punllapica jatun mandajhuanmi, ñucaca micungapaj tiarini. Ashtahuangarin canga ñucataca, quimsa punlla chishangacaman pambapi pacajuchun saquihuailla.

6Cambaj taita ñucata tapujpica, cashna nipangui: ‘Paipaj tucui familiacunami, Belén pueblopi Taita Diosman animalta cushpa huañuchishpa, huatapi huatapi fiestata ruranata yachan. Chaimandami, chai puebloman ucha richun saquihuai nishpa, cutin cutin mañahuarca’ nipangui.

7Cambaj taitaca: ‘Shina cashpaca alimi’ nijpica, canda servij ñucaca, casilla ali causaitami charisha. Ashtahuangarin pai fiñarijpica, ñucata huañuchinatapacha yarijushcatami yachangui.

8Canda servij ñucata llaquishpaca, chashna rurapairi. Canda servij ñucataca, ali cumbacuna cangapaj nishpami, Mandaj Dioshuambash ari nichircangui. Ashtahuangarin ima nalita ñuca rurashca cajpipash, canllata huañuchihuailla. Imapajta cambaj taitapajmanga pushahuanguipash— nijurcami.

9Shina nijpimi Jonatanga, cashna nirca: —Chashna ruranaca, ima horallapash ama tiachun. Ashtahuangarin ñuca taitaca, jatun nalita ruranatapacha yarijushcata yachashpaca, ¿nachu canman villaiman?— nircami.

10Shina nijpimi Davidca, Jonatandaca cashna nirca: —Cambaj taita fiñarishpa canman tigrachijpica, ¿pita ñucaman villagrin?— nircami.

11Shina nijpimi Jonatanga, Davidtaca: —Shamui, pambaman llujshishun— nishpami, pambaman ishcandi llujshirca.

12Chaipimi Jonatanga, Davidtaca cashna nijurca: —Israelcunata Mandaj Taita Diosca ricujunmi. Caya cai horas cashpa, na cashpaca cayandi punlla cashpapash, ñuca taitata imashnallapash tapuchishpa yachashpaca, cambaj ali cajpica villachun cachamushallami.

13Ashtahuangarin ñuca taita canda llaquichisha nijujta yachashpata, can casilla aliguta richun, ñuca na villachun cachajpica, Mandaj Diosllata llaquichihuachun. Paica, chashnatapacha rurachunlla. Mandaj Diosca, ñuca taitahuan imashna purishcashnallata, canhuambash purishpami ali canman.

14Ñuca causajujpipash, Mandaj Dios llaquishcashnallata llaquihuangui. Ñuca huañujpipash,

15ñuca familiacunataca, tucui causaipi llaquipangui. Davidta fiñajcunata, Mandaj Dios cai pachamanda shuj shuj chingachijpipash, Davidpaj familia puramanda Jonatanbaj miraicuna chingachunga, ama saquipanguichu.

16Mandaj Diosca, canda fiñajcunataca llaquichishpapachami ali canman— nishpami Jonatanga, Davidpaj familiacunahuambash ari ninajurca.

17Jonatanga, pai juyarinshnallata juyaj cashpami, chaitaca pactachinajuchun nishpa, Davidtaca cutin juramentuchirca.

18Chai jipami Jonatanga, cashna nijurca: —Cayapaca, luna llullu cajpimi micuita ruranga. Chaipica, cambaj tiarina pushtuca chushaj cajpimi, candaca nalicachinga.

19Quimsa punllataca pacajungui. Chai jipaca, punda imashna cunambishnallata llaquipi cashpa pacajushca carcangui, chaimanllata urai shamushpa, Ezel shuti rumi huashapi shuyanguilla.

20Chaimanmi ñucaca, alipacha chayachinata yachajujunshnalla, quimsa flechacunata shitamusha.

21Chashna shitamushpami, shuj servijtaca: ‘Chai flechacunata mascangapaj ri’ nishpa cachasha. Shinallata: ‘Ricui, flechaca ashtahuan cai ladomanmi’ nijpica, canga shamunguilla. Chaica, ima llaquitapash na apashpa, casilla ali causaita charinatami yachangui. Mandaj Diosca causajumbachami.

22Ashtahuangarin chai servij huambrataca: ‘Ricui, flechaca canmanda ashtahuan chai ladomanmi rirca’ nijpica, canga ringuilla. Mandaj Diosmi, candaca cachanga.

23Ñucahuan, canhuan caita cashna parlanajushcataca, Mandaj Diosmi, tucui ñucanchi causaipi ricunga— nijurcami.

24Chai jipaca Davidca, pambaman pacajungapaj rircallami. Ña luna llullu chayajpica, jatun mandaj Saulpash micungapajmi tiarirca.

25Jatun mandajca, pai maipi tiarinapillatami, pata ladolla tiarinapi tiarirca. Jonatán jatarijpimi Abner runaca, Saulpaj ladopi tiarirca. Ashtahuangarin David tiarinaca, chushajmi quedarca.

26Chai punllapica, David illajta ricushpapash, Saulca nimata na nircachu. “Taita Diospaj ñaupajpi imatapash nalita rurashca cashpami, nara ali tucushca canga” yajurcami.

27Luna llullu cayandi, cati punllapica cashnami tucurca: Davidpaj tiarinaca, chushajllatami quedarca. Chaimandami Saulca, paipaj churi Jonatandaca: —¿Imashpata Isaí runapaj churica cainapash, cunambash micungapaj na shamun?— nishpami tapurca.

28Shina tapujpimi Jonatanga, Saultaca cashna nirca: —Davidca, ñucatami Belenman richun saquihuai nishpa, ninandapacha mañahuarca.

29Paica cashnami nihuarca: ‘Ñucanchi familiacunami, chai pueblopica Taita Diosman animalta cushpa huañuchishpa fiestata ruran. Chaimandami, ñuca huauquipash ñucata shamuchun nishca. Shina cashcamanda ñuca cambaj ñaupajpi ali ricurishca cajpica, cunanga ñuca huauquicunata ricungapaj richun saquihuayari’ nihuarcami. Chaimandami jatun mandajhuan micungapaca, na shamushca— nircami.

30Shina nijpimi Saulca, Jonatanhuan ninanda fiñarishpa cashna nirca: —Jatun nalita ruraj, na cazuj huarmipaj churi. Canllatapash musparishpa, cambaj mamatapash muspachishpa ninanda pingaichingapaj, Isaí runapaj churihuan ali cumbacuna tucushcataca, ¿nachu ñucaca ali yachani?

31Isaipaj churi cai pachapi causaicamanga, cambaj causaipash, can mandanapash nalichu canga. Chashna cashcamanda, cunanda mascachun cachashpa caiman apamui. Paitaca huañuchinapachami— nircami.

32Shina nijpimi Jonatanga, paipaj taita Saultaca: —¿Imashpata huañungayari? ¿Imatata rurashcayari?— nirca.

33Shina nijpimi Saulca, Jonatanda chugrichishpa huañuchishapacha yashpa, lanzata shitarca. Chaimandami Jonatanga, paipaj taita Saulca, Davidtaca huañuchishapacha yajujta yacharca.

34Shinamandami Jonatanga, tiajushca mezamandaca ninandapacha fiñarishpa jatarirca. Chaimandami luna llullu cati punllapica, na micurca. Davidta paipaj taita rimashpa pingaichishcamandami, ninanda llaquirirca.

35Cayandi tutamandatami Jonatanga, Davidhuan ima horas tuparishun nishca horasllata, shuj uchilla huambraguta catichishpa, pambaman llujshirca.

36Chaipimi chai huambragutaca: —Ñucami, flechacunata cachagrini. Ucha calpashpa mascamugringui— nirca. Chai huambragu ña calpashpa rijujpimi, Jonatanga flechacunataca yalijta yalijta shitajurca.

37Flechacunata Jonatán maiman shitashca pushtuman chai huambragu chayajpimi, Jonatanga: —¿Nachu flechacunaca, ashtahuan chai ladomanyari?— nishpa caparirca.

38Jonatanga, cutinmi chai huambragutaca, cashna nishpa caparirca: —Ucha calpai, ama shayarichu— nijpimi, Jonatanda servij huambraguca, flechacunata tandachishpa paipaj amopajman shamurca.

39Ashtahuangarin chai huambraguca, imapaj chashna rurajtapash na yacharcachu. Jonatanhuan, Davidhuanllami imamanda chashna ruranajushcataca yacharca.

40Chai jipami Jonatanga, paipaj macanajunacunataca, paita servij huambraguman cushpa: —Canga, caita apashpa, puebloman ñaupailla— nirca.

41Chai servij huambragu rishca jipallami, Davidca ura ladomanda jatarishpaca, cungurishpa quimsa viajecaman alpaman chayajta cumurirca. Chai jipami, ishcandimanda ñavi ladopi mucharishpa ishcandi huacanajurca. Ashtahuanga Davidmi yali huacajurca.

42Chai jipami Jonatanga, Davidtaca cashna nirca: —Imatapash na manllashpa rilla. Ñucanchica ishcandimi, Mandaj Diospaj shutipi cashna nishpa juramenturcanchi: ‘Mandaj Diosca canhuambash, ñucahuambash, cambaj miraicunahuambash, ñucapaj miraicunahuambash, tucui causaipi ñucanchihuan cachun’ nircanchimi— nircami. Shina nijpimi Davidca, jatarishpa rirca. Shinallata Jonatanbash, puebloman tigrarcallami. Saulta, pacajushpami Davidca rishca