MARCOS 15 - Quichua Imbabura Bible

Jesustaca, Pilatopaj ñaupajmanmi apanajushca(Mat. 27:1-2,11-14; Luc. 23:1-5; Juan 18:28-38)

1Narapash ali punllayajllapitami, curacunata mandajcunaca, mandaj rucucunandi, mandashca shimita yachachijcunandi, mandaj puracunalla tandanajuj runacunandi, yuyaita cungapaj tandanajurca. Chai jipami, Jesustaca huatashpa apashpa, mandaj Pilatopaj ñaupajpi saquigrirca.

2Chaipimi Pilatoca, cashna nishpa tapurca:

—¿Canllu Judea llactapi causajcunata jatun Mandaj cangui?— nircami.

Shina nijpimi, Jesusca:

—Canllata ñamari chashna ningui— nirca.

3Shina nijpimi curacunata mandajcunaca, Jesusta ninanda juchachinajurca.

4Chashna juchachijpimi, Pilato cutin tapushpaca:

—Ricui, canda cashna ninanda juchachijpipash, ¿nachu imatallapash nina cangui?— nircami.

5Shina nijpipash Jesusca, imatapash na tigrachircachu. Chashna upalla uyajujpimi, Pilatoca manllarirca.

Jesustaca huañuchinapachami ninajushcami(Mat. 27:15-31; Luc. 23:13-25; Juan 18:38—19:16)

6Pascua fiesta punllapica, prezu tiajuj runacunamanda maijanda cashpapash cacharipai nishpa mañajpica, cacharinllami carca.

7Barrabás shuti runaca, macanajungapaj callarichishpami, genteta huañuchishca carca. Shina cashpami paipaj cumbacunandi, prezuna huasipi tiajurca.

8Chashna cacharijlla cajpimi, ashtaca gentecuna Pilatopajman shamushpa, cashna mañai callarirca:

—Canga, cashna fiesta chayamujpica, shuj prezutami cacharinata yachangui. Cunan huatapash, shuj runata cacharipai ninchimi— ninajurcami.

9Shina nijpimi chai gentecunataca, Pilatoca:

—¿Judea llactapi causajcunata jatun Mandajtachu cacharipai nishpa mañanguichi?— nishpami tapurca.

10Curacunata mandajcunaca, Jesustaca ninanda na ricunayachinamandalla, paipaj ñaupajman apamushcatami, Pilatoca yacharca.

11Ashtahuangarin: “Jesuspaj randica, Barrabás runata cacharipai” nishpa caparinajuchunmi, curacunata mandajcunaca gentecunata yachachinajurca.

12Gentecunataca, Pilatoca:

—Judea llactapi causajcunata jatun Mandajmi nishpa, canguna ninajushca runataca, ¿imatata rurachun munanguichi?— nishpami, cutin tapurca.

13Shina nijpimi:

—¡Chai runataca, chacatashpa huañuchilla!— nishpa, gentecunaca caparinajurca.

14Chashna caparinajujpimi:

—Cai runaca, ¿imatata nalitaca rurashcayari?— nishpa, Pilatoca tapurca.

Shina tapujpicarin:

—¡Chai runataca chacatailla!— nishpami, ashtahuan ninanda caparinajurca.

15Shina caparinajujpimi Pilatoca, gentecunata cushichingapaj munashpa, Barrabás shuti runatara cacharirca. Ashtahuangarin Jesustaca, ninanda astichishpami, chacatangapaj apachun, soldadocunaman curca.

16Shina cujpimi soldadocunaca, Pilato mandashpa tiajuj huasi canlla patioman Jesusta llujchirca. Chashna llujchishpaca, tucuilla soldadocuna tandanajuchunmi cayarca.

17Paicunaca, morado fachata fachalichishpami, cashacunata pillushpa Jesuspaj umapica churachirca.

18Chashna churachishpami:

—¡Judea llactapi causajcunata jatun Mandaj, canga juyaillagumari ricujungui!— nishpa, capari callarinajurca.

19Shina caparishpami Jesustaca, caspihuan umapi huactashpa, t'ucashpa churanajurca. Shinallata paipaj ñaupajpi cungurishpami, mañaj tucunajurca.

20Chashna na cazushpa asishca jipami, morado fachataca llujchishpa, paipaj churajunatallata churachirca. Chashna rurashpami Jesustaca, chacatangapaj llujchinajurca.

Jesustaca chacatashcatami villajun(Mat. 27:32-56; Luc. 23:26-49; Juan 19:17-30)

21Jesusman cruzta apachishpa rinajushpami, pambamanda tigramujuj shuj runata, cruzta apachun mandarca. Chai runamanmi, cruztaca apachinajurca. Paica, Cirene shuti pueblomanda Simón shuti runami carca. Paica, Alejandro shuti, Rufo shuti runacunapaj taitami carca.

22Gólgota shuti lomamanmi, Jesustaca apashpa rinajurca. Gólgota nishpaca: “Uma Tullu” nishpami shina nijun.

23Chai lomaman chayashpami, mirra nishcahuan chapushca vinotaca, Jesusman ufiachun cunajurca. Ashtahuangarin Jesusca, na ufiarcachu.

24Jesusta cruzpi chacatashpaca, paicuna purapi ima urmajpipash, Jesuspaj churajunata chaupirishpa apangapajmi, suerteta ruranajurca.

25Tutamanda ña iscun horas cajpimi, Jesustaca chacatanajurca.

26Imamanda chacatashcatapash, tablapi escribishcatami churanajurca. Chai tablapimi: “CAICA, JUDEA LLACTAPI CAUSAJCUNATA JATUN MANDAJMI” nijurca.

27Paipaj ladopica, ishcai shuhua runacunatapashmi, shujtaca ali ladoman, shujtaca lluqui ladoman churashpa chacatanajurca.

28Chashna chacatajpimi: “Nalita rurajcunahuanmi, tandachi tucunga” nishpa, Dios escribichishca Shimipi nijushca pactarca.

29Cruzpi Jesús chacatariajuj ladota yalinajujcunaca, umata cuyuchishpami nalicachishpa, cashna rimanajurca:

—¡Jajai! Canga: ‘Diospaj huasita urmachishpapash, quimsa punllapilla shayachishallami’ nircanguica.

30Can ama huañungapaca, cruz jahuamanda uriajushpa, canllata quishpiriyari— ninajurcami.

31Shinallatami curacunata mandajcunapash, mandashca shimita yachachijcunapash, Jesustaca na cazushpa asishpa, paicunapura cashna nishpa rimarinajurca:

—Shujcunataca quishpichircallami. Paillata quishpiritaca, na ushashcami huarcuriajun.

32Israelcunata jatun Mandaj, Quishpichij Cristo cashpaca, cunanllata cruz jahuamanda uriajumui. Chashna ricushpaca, crishunchimi— ninajurcami.

Jesushuan chacatariajuj runacunapash, chashnallatami paitaca nalicachishpa rimanajurca.

33Chaupi punllamandaca, chishi ña quimsa horascamanmi, tucui cai pachaca, yana yana tucurca.

34Ña quimsa horas tucujhuanmi: “Eloi, Eloi, ¿lama sabactani?” nishpa Jesusca, ninanda caparirca. Cai shimicunaca: “Ñuca Taita Dios, ñuca Taita Dios, ¿imashpata ñucatalla saquihuangui?” nijunmi.

35Chashna caparijta uyashpaca, huaquin chaipi shayanajujcunaca:

—Ricuichi, profeta Eliastami cayajun— ninajurcami.

36Jesús chashna caparijujhuanmi, shuj runaca calpashpa, jayaj vinopi esponjata mutiyachirca. Chaitaca, caspi pundapi churashpami, Jesús chupachun shimipi churarca. Shina rurashpaca:

—Elías paita uriajuchingapaj shamunllu, imami ricushunchi— nijurcami.

37Ashtahuangarin Jesusca, ninanda caparishpaca huañurcallami.

38Jesús huañujhuanga, Diospaj huasi ucupi huarcushca tiajuj jatun fachami, jahuamanda uraiman llujshijta chaupipi liquirirca.

39Jesús chacatariajuj cruz ñaupajpica, patsaj soldadota mandajmi shayajurca. Paimi, Jesús imashna caparishpa huañujtapash ricujurca. Shina ricushpami:

—Cai runaguca, Taita Diospaj Churipachamari cashca— nijurca.

40Shinallata huaquin huarmicunapash, Jesustaca carumandallami ricunajurca. Chai huarmicunahuanga, Magdala shuti pueblomanda Mariapash, jipa Jacobopaj, Josepaj mama Mariapash, Salomé shuti huarmipashmi chaipi shayanajurca.

41Chai huarmicunami, Galilea llactapi Jesús purijujpica, ayudashpa purinajurca. Chai huarmicunahuanga, ashtahuan shuj huarmicunapashmi, Jerusalenman Jesús shamujujpica, catishpa shamunajurca.

Jesusta pambashcatami villajun(Mat. 27:57-61; Luc. 23:50-56; Juan 19:38-42)

42Ña tutayashcapimi cayandipaca, samana punlla cajpi, imacunatapash tucuillata alichinajurca. Ña chishashcami carca.

43Shina cajpimi Arimatea shuti pueblomanda Joseca, Pilatopajman rirca. Paica, mandaj puracunalla tandanajujpura cashpa, ninanda alicachi tucushcami carca. Shinallata Taita Dios mandana punllacuna chayamunatapash, cushijushpami shuyajurca. Shina cashpami Pilatota na manllashpa, Jesuspaj cuerpoguta mañangapaj yaicurca.

44Jesusca, ñami huañurca nijpimi, shinaca ñachari huañurca yashpa, Pilatoca manllarirca. Shinamandami, patsaj soldadocunata mandajta cayachun cachashpa tapurca.

45Patsaj soldadocunata mandajpash: “Ari, ñami huañurca” nishpa villajpimi, Jesuspaj cuerpogutaca José pambachun saquirca.

46Shina saquijpimi Joseca, jatun fachata randirca. Jesús huañushcaguta cruz jahuamanda uriajuchishpami, chai fachahuan pilluchirca. Shina pilluchishpami, jatun jacapi utujushca utujupica churarca. Shina churashpami, shuj jatun rumitapash suchuchishpalla, chai utuju punguta jarcarca.

47Magdala shuti pueblomanda Mariandi, Josepaj mama Mariandimi, maijan utujupi Jesusta churajtapash ricunajurca.