1Shinlli shungu runaca, paipaj shungupica:
“Taita Diosca na tianllu” yajunmi.
Huaglicuna tucushpami, millanayai
juchacunatalla ruranajun.
Alita ruraj runaca, pipash na tianllu.
2Mandaj Diosca, huañuna aichayu
runacunataca, jahua pachamandami ricujurca.
Taita Diosta mascaj, ali yuyaita
charij runaca maijanllapash tiambashchari
yashpami ricujurca.
3Tucuicunami Diosmanda anchurishpa,
huaglicuna tucushca.
Alita ruraj runaca, pipash na tianllu,
shujllapash na tianllu.
4Jatun nalita rurajcunaca, tucuicunallata
ima ali cajta, ima nali cajtapash na yachanllu.
Ñuca llacta puracunataca, tandata
micushpa langanshnami tucuchinajun.
Paicunaca, Mandaj Diostaca na mañanllu.
5Paicunaca, ninanda manllarishpami chujchunajurca.
Imatapash cashcatapacha rurajcunapaj
miraicunata, Taita Dios cuidajujpimi
chashna chujchunajurca.
6Imagutapash na charij runagu ali
yuyaita cujujpica, asishpami uyanajurca.
Shina cajpipash paica, Mandaj Diostami shuyajun.
7¡Israelcunapaj quishpirinaca,
Sion urcumanda llujshipashcanman!
Pai agllashcacunata prezu apai tucushcamanda,
Mandaj Dios tigrachimujpimi, Jacobopaj
mirai israelcunaca, ninanda cushijunga.
Who We AreWhat We EelieveWhat We Do
2025 by iamachristian.org,Inc All rights reserved.
