JOB 6 - Quichua Imbabura Bible

Job runaguca, paipaj cumbacunatami rimashca

1Shina nijpimi Jobca, cashna nishpa tigrachirca:

2“¡Ñuca llaquicunandi, ñuca nanaicunandi tandachishpa pezashpachari ali canman! Balanzapi churashpa tandachishpa pezashpachari ali canman.

3Shina pezajpica, mama cuchapi tiaj t'iyu alpatapash yalimi pezanman. Shinamandami ñucaca, na aliguta yarishpa ñapash rimashcanilla.

4Tucui Ushaita Charij Diospaj flechacunami, ñucapi tianajun. Chai venenotami, ñuca espirituca ufiajun. Taita Dios cachamushca ninan manllaimi, ñucahuanga macanajujun.

5¿Urcu burroca, jihuapi cashpaca huacanllu? ¿Huagrapash, jihuata micujushpaca huacanllu?

6¿Cachi illaj aminda micunataca, micurinllachu? ¿Lulunda micujushpa yurajtalla micujpica, mishquillaguchu canga?

7Ñuca alma na munashcacunatami, cunanga micujuni.

8¡Ñuca mañashcata pipash carangapaj shamushpami ali canman! ¡Taita Diosca, ñuca munashcata carashpami ali canman!

9Taita Diosca, ñucata ñutushpaca cushijushpami ali canman. ¡Paipaj maquita chutashpa, ñucata tucuchishpami ali canman!

10Na llaquishpa, jatun nanaihuan ñucata huañuchijpipash cushijuimanmi. Jucha illaj Dios rimashcataca, na pacarcanichu.

11¿Ima ushaihuanda, ñucaca shuyanara cani? ¿Imapaj cashna tucushcata yachashpata shuyajusha?

12¿Ñuca ushaica rumishnachu? Na cashpaca, ¿ñuca cuerpoca bronceshnachu?

13¿Nachu ñucallatapash na ushajuni? Tucui imapilla ñucata ayudajpash, na tianllu.

14Llaquita apaj runaca, paipaj cumbahuanmi cushichi tucun. Tucuita Rurai Ushaj Diosta manllanata saquij runapashmi, cushichi tucun.

15Ashtahuangarin ñucataca, ñuca huauquicunallatami yacu ñapash jundashpa yalinshna umachihuarca. Manllanayai jatun yacu yalinshnami llaquichihuarca.

16Paicunaca, tutamanda casa quilpashcashnami tianajun. Rasu quilpashcashnami tianajun.

17Tutamanda casaca, rupai shamujpica yacuyanllami. Punlla cunujyajpica, maipi cashcamandaca chinganllami.

18Paicunaca, tandanajushca rinajushpapash, caita chaita rinllami. Shina rinajushpallatami, asha asha chaquishpa chingan.

19Chai yacucunataca, Temán shuti llactamanda purij runacunapash ricunajurcami. Sabá shuti llactamanda purij runacunapash, chai yacucunataca shuyanajurcami.

20Ashtahuangarin paicuna shuyanajushca na ricurijpimi, pingai tucunajurca. Chai yacucuna tiaj pushtucaman chayashpapash, yacutaca na tarishpami musparinajurca.

21Cunanga cangunapash, chashnapachami canguichi. Jatun llaquita ricushpaca, manllaritarami manllarircanguichi.

22¿Ñucaca, cangunataca cashnachu nircani?: ‘Cangunapaj jazindamanda imatallapash apamushpa, ñucaman carahuaichiyari.

23Ñucata ninanda llaquichishpa charij runapaj maquimanda cacharichihuaichi. Na llaquishpa huañuchij runacunapaj maquimanda quishpichihuaichi’ ¿nircanichu?

24Ñuca upalla tiajungapaca, yachachihuaichiyari. Imapi ñuca pandashcatapash yarichihuaichiyari.

25¡Ali rimashca shimicunaca, cushichimbachami! Ashtahuangarin canguna rimashcacunaca, imatapash na jarcanllu.

26¿Imata ruraitapash na ushashpa rimashca, huairashna chingaj shimicunatachu jarcashpa rimangapaj yarinajunguichi?

27Cangunaca, taita mama illaj huahuatapash tandanajushpa japinguichillami. Cangunapaj cumballata huashajuchumbash, utujuta allanguichillami.

28Cunanga, ñuca ñavita ricungapaj munashpaca, ricuhuaichilla. Cangunapaj ñaupajpi, ima llullata rimashca cajpipash ricuhuaichilla.

29Cunanga, ali yuyaita cutin japishpa, ima nalitapash na rimanachu canguichi. Ñucataca, imatapash cashcatapacha ruraj cashcata cutin yarihuaichiyari.

30¿Ñuca jalluhuanga, nali shimicunatachu rimajuni? Nali shimicuna cajtaca, ¿nachu ñuca shimillata yachai ushan?