1Job runaguca, cashna nishpami tigrachirca:
2“Ushaita na charij runataca, ¿imahuanda ayudarcangui? Ushai illaj rigrataca, ¿imashnata ayudarcangui?
3Imatapash na yachajushca runamanga, ¿ima ali yuyaitata curcangui? ¿Ima alipacha yachajunatata rijsichircangui?
4Cambaj shimicunataca, ¿pimanda villashcangui? ¿Canmanda llujshijuj samaica pipajta?
5Huañushcacunapaj almaca, cai pacha alpa ucupimi chujchujun. Mama cucha yacucunapash, chaipi imalla tiajcunapashmi chujchunajun.
6Paipaj ñaupajpica, Seolpash ricunallami. Abadonbash, na imahuambash quilpashcachu.
7Paica, jahua ladoman tiaj jahua pachataca chushajpimi churarca. Cai pachataca, imapillapash na huarcurcachu.
8Yacucunataca, paipaj fuyupimi huatarca. Chai tucui yacucunahuan cashpapash, fuyuca na liquirinllu.
9Paimi, pai mandangapaj tiarinataca pacan. Chai tiarina jahuapica, paipaj fuyutami churan.
10Maicamanlla yacucuna tiachumbash, paimi linderota churarca. Michapash, yana yana tutapash tucurina manñacamanmi, yacucunataca churarca.
11Pai jarcashpa rimashcata uyashpaca, jahua pachata charij pilarcunapashmi ninanda manllarishpa chujchun.
12Paipaj ushaihuanmi, mama cuchatapash cuyuchijun. Paica, alipacha yachajuita charishpami, manllanayaita yacu jatarijpipash jarcan.
13Paipaj Espirituhuanmi jahua pachataca, juyaillata rurarca. Paipaj maquihuanmi, quingushpa purij culebratapash rurarca.
14Ricuichi, cai rurashcacunaca ashata callaricunallami. ¡Paimanda parlajtaca, asha ashallami uyashcanchi! Ashtahuangarin culun nichij paipaj jatun ushaitaca, ¿pita yachai ushangayari?” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
