NEHEMÍAS 12 - Quichua Imbabura Bible

Curacunamandapash, levitacunamandapashmi villajun

1Salatiel shuti runapaj churi Zorobabel runahuan, Jesúa shuti curahuan vichai tigramuj curacunapaj, levitacunapaj shuticunaca, caicunami: Seraías, Jeremías, Esdras,

2Amarías, Maluc, Hatús,

3Secanías, Rehum, Meremot,

4Iddo, Gineto, Abías,

5Mijamín, Maadías, Bilga,

6Semaías, Joiarib, Jedaías,

7Salú, Amoc, Hilcías, Jedaías shuti curacunami, paicunapaj huauquicunandi Jesúa causajui punllacunapi tigramurca.

8Levita puramandaca: Jesúa, Binúi, Cadmiel, Serebías, Judá, Matanías shuti runacunami tigramurca. Matanías runaca, paipaj huauquicunandimi, Diosta alicachishpa candanacunata candachinajurca.

9Bacbuquías shuti, Uni shuti levitacunapashmi, paicunapaj huauquicunandi, tucuicunallata Diospajta ruranajurca.

10Jesúa shuti runaca, Joiacim shuti churitami charirca. Joiacim runaca, Eliasib shuti churitami charirca. Eliasib runaca, Joiada shuti churitami charirca.

11Joiada shuti runaca, Jonatán shuti churitami charirca. Jonatanga, Jadúa shuti churitami charirca.

12Joiacim shuti cura causajui punllacunapica, caicunami curacunapaj familiata mandajcuna carca: Seraías shuti runapaj familiataca, Meraías shuti runami mandajurca. Jeremiaspaj familiataca, Hananías runami mandajurca.

13Esdraspaj familiataca, Mesulam shuti runami mandajurca. Amarías shuti runapaj familiataca, Johanán shuti runami mandajurca.

14Melicú shuti runapaj familiataca, Jonatanmi mandajurca. Sebanías shuti runapaj familiataca, Josemi mandajurca.

15Harim shuti runapaj familiataca, Adna shuti runami mandajurca. Meraiot shuti runapaj familiataca, Helcai shuti runami mandajurca.

16Iddo shuti runapaj familiataca, Zacariasmi mandajurca. Ginetón shuti runapaj familiataca, Mesulam runami mandajurca.

17Abías shuti runapaj familiataca, Zicri shuti runami mandajurca. Miniamín shuti runapaj familiataca, Moadías shuti runahuan, Piltai shuti runahuanmi mandanajurca.

18Bilga shuti runapaj familiataca, Samúa shuti runami mandajurca. Semaías shuti runapaj familiataca, Jonatanmi mandajurca.

19Joiarib shuti runapaj familiataca, Matenai shuti runami mandajurca. Jedaías shuti runapaj familiataca, Uzi shuti curami mandajurca.

20Salai shuti runapaj familiataca, Calai shuti runami mandajurca. Amoc shuti runapaj familiataca, Eber shuti runami mandajurca.

21Hilcías shuti runapaj familiataca, Hasabías shuti runami mandajurca. Jedaías shuti runapaj familiataca, Natanaelmi mandajurca.

22Eliasib, Joiada, Johanán, Jadúa shuti runacuna causanajui punllacunamanda, Persia llactata jatun mandaj Darío mandajui punllacunacamanmi, levitacunapaj, curacunapaj familiacunata mandajcunapaj shuticunataca, shuj libropi escribinajurca.

23Shinallata Eliasib shuti runapaj nieto Johanán shuti runa causajui punllacunacamanmi, Leví shuti runapaj mirai familiacunata mandajcunapaj shuticunataca, shuj libropi escribinajurca.

24Levitacunata mandajcunaca: Hasabías shuti runapash, Serebías runapash, Cadmiel shuti runapaj churi Jesúa shuti runapashmi carca. Paicunapaj huauquicunaca, Taita Diosta servij David escribichishcapi nijunshnallata, Diosta pashi nishpa alicachingapajmi, paicunapaj ñaupajman yaicuna horas chayajpi rishpa candanajurca.

25Matanías, Bacbuquías, Obadías, Mesulam, Talmón, Acub shuti levitacunaca cuidajcunami carca. Paicunaca, yaicuna pungucunapimi cuidanajurca.

26Paicunaca, Jesúa shuti runapaj churi Joiacim shuti runa causajui punllacunapi, Judá llactata mandaj Nehemías causajui punllacunapi, escribij Esdras cura causajui punllacunapimi cuidan carca. Joacim shuti runaca, Josadac shuti runapaj nietomi carca.

Jerusalén muyundi pircatami, Diosman mingashca

27Jerusalén muyundi jatun pircata tucuchishpa Diosman mingangapajmi, tucuilla levitacunataca maipi causanajujpipash, mascashpa Jerusalenman pushamugrirca. Paicunataca, platillocunahuan, salterio nishcacunahuan, cítara nishcacunahuan, Diosta alicachishpa candashpa, Taita Diosman minganajuchunmi pushamugrirca.

28Shina pushagrijpimi, Jerusalén muyundi llactacunapi causanajuj, Netofa shuti pueblo muyundi uchilla llactacunapi causanajuj candajcunapaj churicunapash tandanajurca.

29Gilgal shuti pueblopi causanajuj huasi ucu purapash, Geba shuti, Azmavet shuti pambacunapi causajcunapashmi shamunajurca. Chai candajcunaca, Jerusalén pueblo muyundipi uchilla llactacunata rurashpami causanajushca carca.

30Paicuna shamujpimi curacunapash, levitacunapash mapa illaj tucunajurca. Gentecunatapash, Jerusalén pungucunatapash, jatun pircatapashmi, mapa illajta ruranajurca.

31Chai jipami ñucaca, Judá llactata mandajcunataca, jatun pirca jahuaman richun mandarcani. Tandanajushca ashtaca candajcunatapash ishcaipi shicanyachishpami, ñaupashpa rinajuchun churarcani. Shuj shicanyachi tucushca candajcunataca, Mapata llujchishpa shitana pungu ladoman ali lado pirca jahuata richunmi churarcani.

32Chai candajcunapaj huashata catishpami Osaías runaca, Judá llactata mandajcunata ishcaipi shicanyachishca caishuj mandajcunahuan rinajurca.

33Azarías, Esdras, Mesulam,

34Judá, Benjamín, Semaías, Jeremías shuti mandajcunapashmi rinajurca.

35Curacunapaj churicunami, trompetata huacachishpa rinajurca. Zacariasca, Jonatanbaj churimi carca. Jonatanga, Semaías runapaj churimi carca. Semaías runaca, Matanías runapaj churimi carca. Matanías runaca, Micaías runapaj churimi carca. Micaías runaca, Zacur shuti runapaj churimi carca. Zacur shuti runaca, Asaf runapaj churimi carca.

36Paicunapaj huauqui puramandaca, Semaías, Azarael, Milalai, Gilalaia, Maai, Natanael, Judá, Hanani shuti runapashmi carca. Paicunami, Taita Diospajta ruraj Davidpaj tocanacunata tocanajurca. Chai tocajcunata ñaupashpaca, escribij Esdrasmi rijurca.

37Pugyuman llujshina punguca, paicunapaj chimba purapi cajpimi, Davidpaj puebloman vichai rina gradasta, pirca jahuaman vichai rina ñanda rinajurca. Davidpaj huasimandaca, Yacuman llujshina pungucamanmi vichai rinajurca. Chai punguca, indi llujshimuj ladomanmi.

38Caishuj chaupi candajcunaca, lluqui ladomanmi rinajurca. Ñucaca, chaupi caishuj gentecunahuanmi, Jorno shuti torrecunamanda ashtahuan ancho pircacaman paicunata catishpa, pirca jahuata rijurcani.

39Efraín nishca jatun pungumandaca, Mauca jatun pungutapash, Pijicunahuan yaicuna pungutapash, Hananeel nishca torretapash, Hamea nishca torretapash, Llamacunahuan yaicuna pungutapash yalishpami, Prezuna huasi pungupi quedarcani.

40Chai jipami, ishcaipi shicanyarishpa tandanajushca candajcunaca, Taita Diospaj huasiman chayarca. Ñucapash, ñucahuan purinajuj mandajcunandimi chayarcani.

41Trompetata huacachinajuj curacunaca, caicunami carca: Eliacim, Maaseías, Miniamín, Micaías, Elioenai, Zacarías, Hananías,

42Maasías, Semaías, Eleazar, Uzi, Johanán, Malquías, Elam, Ezer shuticunami carca. Candajcunaca, shinllitapachami candanajurca. Paicunata mandashpa candachijca, Izrahías shuti runami carca.

43Chai punllapica, ashtaca animalcunatami Diosman cushpa huañuchinajurca. Taita Diosllata samachishpa jatun cushijuita cujpimi, ninanda cushijunajurca. Chaipica huarmicunapash, huahuacunapashmi cushijunajurca. Jerusalenbi chashna ninan cushijunajuica, caru llactacamanmi uyarirca.

Curacunaman, levitacunamanmi micunata carashca

44Chai punllapica, imapash ninan valishcacunata, Diosman imatalla carangapaj apamushcacunata, punda fucushcacunata, chungamanda shujguta cushcacunata alichina ucucunapimi, cuidaj runacunata churarca. Paicunataca, pueblo muyundi pambacunapi fucushcacunata, shinallata mandashcapi nijunshnallata curacunaman, levitacunaman caranacunata apamushcacunata, chai ucucunapi tandachinajuchunmi churarca. Diosta servij curacunamanda, levitacunamandaca, Judá llactapi causajcunapaca, jatun cushijuimi tiarca.

45Curacuna, levitacunaca, paicunapaj Diostapash servishpa, juchamanda cunatapash cushpami pactachinajurca. Candajcunapash, pungucunapi cuidajcunapashmi pactachinajurca. Paicunaca Davidpash, paipaj churi Salomombash escribishpa mandashcashnallatami pactachinajurca.

46Jatun mandaj David shuti, Asaf shuti runacuna causanajui punda huatamandapachami, Taita Diosta pashi nishpa alicachishpa candanacunata candachijcunaman yachachij tiarca.

47Zorobabel shuti runapash, Nehemías runapash causajui punllacunapimi, tucuilla israelcunaca, candajcunamambash, pungucunapi cuidajcunamambash micunacunata cunajurca. Imata cuna cashpapash, punllandimi cunajurca. Shinallata levitacunaman cungapajpashmi, shuj ashata shicanyachinajurca. Chai cushcacunamandaca levitacunapashmi, Aaronbaj miraicunaman shuj ashata shicanyachinajurca.