ÉXODO 9 - Quichua Imbabura Bible

Animalcunapi ung:uita cachamushpami llaquichishca

1Chai jipami Mandaj Diosca, Moisestaca cashna nirca:

—Faraonbaj ñaupajman rishpa, cashna nigri: Hebreocunata Mandaj Taita Diosca, cashnami nin: ‘Ñuca agllashcacunataca, ñucata servingapaj richun saqui.

2Richun saquingapaj na munashpa can jarcajujpica,

3ricui, Mandaj Diospaj maquihuanmi, pambapi shayanajuj cambaj animalcunataca llaquichinga. Caballocunata, burrocunata, camellocunata, huagracunata, llamacunatapashmi, ninan ung:uihuan llaquichinga.

4Mandaj Diosca, israelcunapaj animalcunatapash, Egiptopi causajcunapaj animalcunatapashmi shicanyachinga. Israelcunapaj animalcunaca, shujllapash ama huañuchunmi chashna shicanyachinga’ ninmi ningui— nircami.

5Mandaj Diosca, ima punlla llaquichinatapash villashpami:

—Cayami Mandaj Dios ñucaca, cai llactapi cashna llaquichisha— nirca.

6Shina nishca cayandi punllapica, Mandaj Dios chashna llaquichijpimi, Egiptomanda tucuilla animalcunaca huañurca. Ashtahuangarin israelcunapaj animalcunaca, shujllapash na huañurcachu.

7Shina cashcamanda Faraón ricuchun cachajpica, israelcunapaj animalcunaca shujllapash na huañushcachu carca. Ashtahuangarin Faraonbaj shungu shinlliyashpami, israelcuna richunga na saquirca.

Chupu ung:uihuanmi llaquichishca

8Mandaj Diosca, Moisestapash, Aarondapash cashnami nirca:

—Shuj jornomanda, maqui junda uchufata japichi. Chaitaca Moisesmi, Faraonbaj ñaupajpi jahuaman tsirapachinga.

9Chai uchufami, ñutu alpa tucushpa tucuilla Egipto llactapi jicharimunga. Chaimandami, chupu tugyanalla caracha ung:uica gentecunapipash, animalcunapipash, tucuilla Egipto llactapi llujshinga— nircami.

10Shina nijpimi Moisespash, Aaronbash, jornomanda uchufata japishpa, Faraonbaj ñaupajpi shayarishpa Moisesca, uchufata jahuaman tsirapachirca. Shina rurajpimi, chupu tugyanalla caracha ung:uica gentecunatapash, animalcunatapash japirca.

11Shinallata yumbucunapash, chupu ung:uihuan japi tucushca cashpami, Moisespaj ñaupajpi shayaritaca na ushanajurca. Yumbucunapipash, Egiptopi tucui causajcunapipash, tugyanalla chupu ung:ui japijpimi na ushanajurca.

12Ashtahuangarin Mandaj Diosllatami, Faraonbaj shungutaca shinlliyachirca. Shinamandami, Mandaj Dios imashna Moisesman nishcashnallata, paicunataca na uyanayachirca.

Runduhuanmi llaquichishca

13Chai jipami Mandaj Diosca, Moisestaca cashna nijurca:

—Caya tutamandata jatarishpa, Faraonbaj ñaupajpi shayaringui. Paitaca cashna ningui: Hebreocunata Mandaj Diosca, cashnami nin: ‘Ñuca agllashcacunataca, ñucata servingapaj richun saqui.

14Can na saquijpica, cunanga huañuchina tucui llaquichinacunatami, cambaj shungumambash, canda servijcunamambash, cambaj gentecunamambash cachamusha. Tucui cai pachapica, ñucashnaca pipash na tiashcata can yachachunmi, chashna cachamusha.

15Cunanga candapash, cambaj gentecunatapash, ninan llaquichinahuan llaquichingapajmi ñuca maquita chutasha. Shina rurajpimi, cai pachamandaca anchuchi tucungui.

16Napacha llullashpami nini. Ñuca ushaita cambi ricuchingapaj, shinallata ñuca shutipash tucui cai pachapi uyarijuchunmi, candaca churarcani.

17¿Cunangamanllu ñuca agllashcacuna richun saquingapaj na munashpa fiñanguira?

18Ricui, caya cai horasllatami, Egipto llacta tiaj callarishcamandapacha, cunangaman ima horapash na tiashca runduta tamiachimusha.

19Shina cashcamanda cambaj animalcunatapash, pambapi tucui imatalla can charishcacunatapash tandachinajuchun cachai. Gente cashpapash, animal cashpapash huasiman na apajpi pambapi shayanajujpica, paicunapaj jahuapi rundu urmajpimi huañunga’ ninmi ningui— nijurcami.

20Mandaj Dios imata nijujta Faraonbaj servij puracunamanda uyashpa, maijan manllajcunaca, paicunapaj servijcunatapash, paicunapaj animalcunatapashmi, huasipi pacajugrichun cacharca.

21Ashtahuangarin Mandaj Dios imata nijujta shungupi na chasquijcunaca, paicunapaj servijcunatapash, animalcunatapash, pambapi saquircallami.

22Mandaj Diosca, Moisestaca cashnami nirca:

—Tucuilla Egipto llactapi rundu urmamuchun, cambaj maquita jahua pachaman chutai. Gentecunapaj jahuapi, animalcunapaj jahuapi, shinallata Egipto llacta pamba jihua jahuacunapi rundu urmamuchun, chashna chutai— nircami.

23Shina nijpimi Moisesca, pai charijuj vara caspita jahua pachaman chutarca. Shinallata Mandaj Diospash, culun nichishpa runduchishpami, ninatapash cai pachaman cachamurca. Mandaj Diosmi, Egipto llactapica runduta tamiachimurca.

24Chashnami rundupash, ninapash ninan jatun runduhuan chapurishpa urmamurca. Gentecuna causai callarishcamandapacha, tucui Egipto llactapica, ima horapash na chashna tiashcachu carca.

25Chai rundumi, Egipto llactapica, pambapi tucui ima tiashcatapash, gentecunatapash, animalcunatapash llaquichijurca. Shinallata pambapi tucuilla jihuacunatapashmi, runduca tucuchijurca. Chai llactapi tucuilla quiru malquicunatapashmi faquijurca.

26Israelcuna causanajuj Gosén shuti llactapillami, runduca na urmarca.

27Shinamandami Faraonga, Moisestapash, Aarondapash cayachun cachashpa cashna nirca:

—Cunangarimbash juchatami rurashcani. Mandaj Diosca, imatapash cashcatapacha rurajmi. Ñucahuan, ñuca gentecunahuanga, Diosta na manllajcunami canchi.

28Taita Dios culun nichishcacunapash, rundupash jarcarichun, Mandaj Diosta mañapaichi. Chai jipaca, canguna richun saquishallami. Shinamandami, na ashtahuan shuyashpa ringuichi— nircami.

29Shina nijpimi Moisesca, cashna nishpa tigrachirca:

—Pueblomanda ñuca llujshishcandi, Mandaj Diospajman ñuca maquita chutajpimi, culun nishcacunapash jarcarishpa, rundupash na ashtahuan urmamunga. Cai pachaca, Mandaj Diospaj cajta can yachachunmi, chashna rurasha.

30Ashtahuangarin Mandaj Taita Dios ricujujtaca cambash, canda servijcunapash nara manllajtami yachani— nircami.

31Lino nishca yuracunapash, cebadapash tucuchi tucushcami. Cebadaca, ña espigashcami carca. Linopash, ña jatunmi carca.

32Ashtahuangarin trigohuan, centeno nishca granohuanllami, jipa tarpushca cashpa na tucuchi tucushca.

33Moisesca, Faraonbaj ñaupajmanda, pueblomanda canllaman llujshishcandimi paipaj maquita, Mandaj Diospajman chutarca. Shina chutajpimi, culun nijujpash, rundu urmajujpash jarcarirca. Shinallata tamiapash llactapica, na ashtahuan urmamurcachu.

34Faraonga, tamiapash, rundupash, culun nijujpash jarcarijta ricushpami, juchata rurashpa catijurca. Paipaj shungupash, paita servijcunapaj shungupashmi shinlliyarca.

35Faraonbaj shungu shinlliyashpami, Mandaj Dios imashna Moisesman nishcashnallata, israelcuna richunga na saquirca.