1Mandaj Diosmi mandajun.
Cai pachapi causajcuna, ninanda cushijuichi.
Mama cucha manñacunapi tiaj ashtaca
llactacuna, cushijuichi.
2Paipaj muyundipica fuyupash,
yana tutapashmi tian.
Pai mandangapaj tiarinaca, imatapash
cashcatapacha rurashpa, aliguta ricushpa
mandanami, callari rumishna shinllipacha tiajun.
3Ninami, paita ñaupashpa ringa.
Chai ninami, paita fiñajcunataca,
muyundi tucuchinga.
4Pai punchapambata shitamushpami,
cai pachataca punchayachirca.
Chaita ricushpami cai pachaca, manllashpa chujchurca.
5Urcucunapash virashnami, Mandaj Diospaj
ñaupajpica yacuyarca.
Tucui cai pachata mandajuj Jatun
Diospaj ñaupajpimi, chashna tucurca.
6Paica, imatapash cashcatapacha ruraj
cajtami jahua pachaca villajurca.
Pai punchapamba cajtapash,
tucui gentecunami ricunajurca.
7Labrashpa rurashca imamambash rijchaj dioscunata
tucui servijcuna, yanga dioscunahuan
cushijujcuna, pingai tucuichiyari.
Tucuilla dioscuna, paita cungurichiyari.
8Sionbi causajcunaca, chaita uyashpami cushijurca.
Mandaj Dioslla, Judá llacta pueblocunapi
causajcunapash, can chashna llaquichijujpimi
ninanda cushijunajurca.
9Can Mandaj Diosmi, tucui cai
pachapica, tucuita yali mandaj cangui.
Tucui dioscunata yali jatumbi churai
tucushcami capangui.
10Mandaj Diosta juyajcunaca, nalita
ruranataca millanayachinami canguichi.
Paimi, paipajlla causajcunapaj almataca cuidajun.
Paita na manllajcunapaj maquimandapashmi cacharichin.
11Imatapash cashcatapacha rurajcunapaca,
punchapamba michami tarpushcashna tiajun.
Shungupi alitalla yarijcunapaca, cushijuimi tiajun.
12Imatapash cashcatapacha rurajcunaca,
Mandaj Dioshuan cushijuichiyari.
Paitaca, jucha illaj cajta yarishpa alicachinajuichi.
Who We AreWhat We EelieveWhat We Do
2025 by iamachristian.org,Inc All rights reserved.
