1Huarmimanda huacharishca runaca, asha punllacunatalla causana cashpapash, llaquihuan shaijushcami causan.
2Sisa llujshijpi fitishcashnami tucun. Llandu ricurishpa ñapash chinganshnami tucun.
3¿Shina cajta ricushpatachu, ñuca imatalla rurashcacunata canman ricuchijuchun cayahuangui?
4Mapa cajtaca, ¿pita mapa illajta rurai ushanga? Chaitaca, pipash na ushangachu.
5Runapaj causaica, mashna punllacunacaman causanatapash, ña ricushcallami. Pai causana quillacunapash, cambaj ladollapimi. Ima punllacaman causachun can churashcamandaca, na yali ushangachu.
6Paita can cungajpica, paica huañungallami. Caipi chaipi trabashpa purij runashnami, punlla tucurinata shuyajunga.
7Quiruta fitishpapash, cutin retoñachun shuyanrami. Retoñajpica, mushuj malquicunaca, napacha illangachu.
8Alpa ucupillata sapi chaquishpapash, alpapillata tronco ismushpapash,
9yacuta chupashpaca, cutin verdeyangallami. Mushuj yurata tarpushcashnami, fanga junda tucunga.
10Ashtahuangarin runa huañushpaca, fiti tucushcashnami chinganga. Runa ña huañushpaca, ¿paica maipishi ricuringa?
11Mama cuchamanda yacu rishpa, asha asha chaquishpa chinganshnami tucun.
12Chashnami runa huañushpa sirijushcamandaca, na cutin jatarin. Jahua pacha tucuringacaman napacha rijcharingachu, puñujushcamandaca napacha jataringachu.
13¡Maijan cashpapash, Seolpi pacajugri nishpachari ali cahuanman! Can ninanda fiñarishca ali tucungacaman, chaipi pacajui nishpachari ali canman. Ashata shuyashpaca, ñucata cutin yarishpachari, ali canguiman.
14¿Runa huañushpaca, cutin causaringachu? Ñuca causai punllacunapica, ñucapaj quishpirina chayamungacamanmi shuyajushalla.
15Chashna shuyajujpi can cayajpimi tigrachisha. Chaipica, cambaj maquihuan rurashcataca juyanguimi.
16Ashtahuangarin cunanga, ñuca purishcatapashmi cuentajungui. Ñuca juchamandaca, napacha samachihuanguichu.
17Yachashpata na cazushpa, nalita rurashcataca, costalpi sirashcashnami sellashca charijungui.
18Urcu urmashpaca, tucuillapachami chingan. Jatun rumicunapashmi, tiajushca pushtumandaca suchurin.
19Ashtaca yacu shamushpa, ñutu alpacunata apajpica, rumicunapash maucayanllami. Runa imata japisha yashpa shuyajushcatapash, canga chashnallatami tucuchingui.
20Canga, causaita causaicamanmi runata yali shinlli cangui, paica chingangallami. Paipaj ñavita shujman tigrachishpaca, cayacaman nishpa cachanguillami.
21Paipaj churicuna alicachi tucushcatapash, paica na yachangachu. Na cashpaca, paicuna ñavita urai cumuchi tucushcatapash na yachangachu.
22Ashtahuangarin paipaj cuerpotaca, paillatami nanachinga. Paipaj almallatami, ninanda llaquiringa” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
