PROVERBIOS 7 - Quichua Imbabura Bible

Culquimanda huainayaj huarmi imashna umachijtami villajun

1Ñuca huahualla, ñuca yachachishca

yuyaicunataca, aliguta huacaichingui.

Imapash ninan valishcatashna alichingui.

2Ñuca mandashcacunatapash, aliguta huacaichingui.

Chaita rurashpami causangui.

Ñuca mandashca shimitapash, ricujuj

cambaj ñavitashna cuidangui.

3Caicunataca, maquipi huatashcashna, tablapi

escribishcashna shungupi charingui.

4Cai ali yachaitaca: “Canmi ñuca

pani cangui” niyari.

Ali yuyaitaca: “Ñuca familia purami cangui” niyari.

5Shujpaj huarmimanda cuidachunmi,

chashna nina cangui.

Na rijsishca huarmi mishquilla shimicunahuan

parlashcamanda cuidachunmi, chashna nina cangui.

6Ashtahuangarin ñucaca, ñuca huasi ventanamanda,

ventanapi churashca caspi huashamandami ricujurcani.

7Na yachajushca purapi ricushpaca, chairalla

viñai purata ricushpami yarijurcani.

Chaipica, na yachajushca huambratami ricurcani.

8Chai huambrami ñanda chimbashpa, ñan tigrana

ladota rishpa, chai huarmipaj huasiman rijurca.

9Paica, ña chishashpa amsayajujpimi rijurca.

Ña yanayashcapi, yana yana tutapimi rijurca.

10Chai huarmica, culquimanda huainayaj

huarmishnallata churajushcami, umachinata alipacha

yachaj shunguhuan tuparingapaj ñapash llujshirca.

11Chai huarmica, imatapash nirijushpa

fiñachij, shimi cacharishca cashpami,

huasipi tiaitaca na ushan.

12Huaquimbica ñangunapi, huaquimbica plazacunapimi,

ñan tigranacunapi pacalla chapajun.

13Chai huarmica, chai huambrata japishpami mucharca.

Shinallata imatallapash na pingashpami, cashna nijurca:

14“Dioshuan ali cangapajmi, animalta

huañuchishpa carashapachami nijurcani.

Diosman carashapachami nishcataca,

cunanmari pactachircani.

15Chaimandami, canda tuparingapaj llujshimurcani.

Cambaj ñavita ricunayaimanda ucha

mascaj shamushpami, cunanga tuparini.

16Ñuca camataca, Egiptomanda caupushca

puchahuan juyailla bordashca fachacunahuanmi

juyaillaguta alichircani.

17Ñuca puñuna ucupipash, mirra nishcata,

áloe nishcata churashpa, canelatapash churashpami,

mishquillagu ashnajuchun alichircani.

18Shamuilla, pacaringacaman ninandapacha juyarinajushun.

Ninanda juyarishpa cushijunajungapaj shamuilla.

19Ñuca cusaca na huasipichu,

caru llactatamari puringapaj rirca.

Chaimandami chashna cushijushun.

20Muchila culquita apashpami rirca.

Pai shamusha nishca punllapimi

shamunga” nijurcami.

21Mishquilla shimicunahuan ninandapacha

parlajushpallatami misharca.

Juyailla shimicunahuan parlajushpallatami,

na uyajujpita ari nichirca.

22Paica, ñapash catishpa rircallami.

Huagrata huañuchingapaj apajpishnami rijurca.

Shinlli shungu runata llaquichingapaj,

prezu apajpishnami rijurca.

23Alasyu animal linllipi japi

tucungapaj ucha rinshnami rijurca.

Paillata huañuipi yaicujushcataca, paipaj

shunguta flecha chaupingacaman na yacharcachu.

24Cunanga huahuacuna, uyahuaichi.

Ñuca cushca yuyaicunataca, aliguta uyahuaichi.

25Chai huarmi purijuj ñangunata catinataca,

cambaj shungupica na yarinachu cangui.

Chai huarmi purina ñangunata catishpa,

na pandanachu cangui.

26Paica, ashtacacunatami chugrichinshna urmachishca.

Paica, ashtahuan ninan shinlli

runacunatapashmi huañuchishca.

27Chai huarmipaj huasica, Seolman apaj ñanmi.

Chai ñanga, huañui tiaj ucucunamanmi chayachin.