DEUTERONOMIO 9 - Quichua Imbabura Bible

Taita Diosca, Canaán llactapi tiaj llactacunata tucuchingami

1Uyaichi israelcuna*, cangunaca cunanga Jordan yacuta chimbagringuichimi. Cangunata yali ashtaca gentecuna, ninan shinlli runacuna causanajuj llactacunaman yaicushpa japingapajmi chimbanguichi. Jahua jahuacaman muyundita jatun pircahuan jarcashca pueblocunata japingapajmi chimbanguichi.

2Chai pueblocunapica, Anac shuti runapaj mirai, manllanayai jatun runacunami causanajun. Paicunataca canllata rijsinguimi. Paicunamandaca, cashna ninajujtami uyashcangui: ‘¿Anac shuti runapaj miraicunapaj ñaupajpi shayaritaca, pita ushangayari?’ ninajunmi.

3Cunanga, canda Mandaj Taita Diosca, rupachishpa tucuchij ninashna canda ñaupashpa rigrijujtaca yachanami cangui. Paica, cambaj ñaupajpi tucuilla tucuchishpami, pingaichishpa urai cumuchinga. Canga, paicunataca Mandaj Dios villashcashnallatami, uchalla llujchishpa tucuchina cangui.

4Chai llactapi causajcunataca, canda Mandaj Taita Diosca cambaj ñaupajmandami llujchishpa cachanga. Chai jipara, cambaj shungupica cashna yajunguiman: ‘Ñucataca, imatapash cashcatapacha ruraj cajpimi, Mandaj Diosca cai llactata japichun pushamuhuashca’ yajunguiman. Mandaj Diosca, chai llactapi causajcunataca jatun nalicuna cajpimi, llujchishpa cachagrin.

5Imatapash cashcatapacha rurashcamanda, shungupi aliguta yarishcamandaca, na paicunapaj llactata japingapaj yaicunguichu. Ashtahuangarin canda Mandaj Taita Diosca, chai llactapi causajcunataca paita na manllajcuna cajpimi, cambaj ñaupajmanda llujchigrin. Cambaj ñaupa taita Abrahamman, Isaacman, Jacoboman carashami nishpa, Mandaj Dios juramentushcata pactachingapajmi, chashna llujchigrin.

Israelcunaca, Horeb shuti urcupimi Diosta na cazushca(Éx. 31:18—32:35)

6Shina cashcamanda, caitapash yachanami cangui. Canda Mandaj Diosca, chai juyailla ali llactata can japichunga, can imatapash cashcatapacha ruraj cashcamandaca, na cushcachu. Ashtahuangarin cangunaca, shinlliyashcapacha gentecunami canguichi.

7Jichushca pambapi cashpa, canda Mandaj Taita Diosta ninanda fiñachishcataca, na cungashpami yarina cangui. Egipto llactamanda llujshimui punllamandapacha, cai llactaman yaicumungacamanmi, Mandaj Diostaca na cazurcanguichi.

8Cangunaca, Horeb shuti urcupi cashpami, Mandaj Diostaca ninanda fiñachircanguichi. Chaimandami Mandaj Diosca, cangunata tucuchingapaj ninanda fiñarirca.

9Ñucaca, Mandaj Dios cangunahuan ari nishpa escribishca ishcai tabla rumicunata, chasquingapajmi urcuman vichai rircani. Shinamandami, imatapash na micushpa, yacutapash na ufiashpa, chuscu chunga punllata, chuscu chunga tutata chaipi carcani.

10Chaipimi Mandaj Diosca, pai Taita Diospaj maquihuanllata escribishca ishcai tabla rumicunata cuhuarca. Chai rumicunapica, urcupi cashpa ñucanchi tandanajushca punllapi nina rupajuj chaupimanda, Mandaj Dios rimashca shimicunami escribishca tiajurca.

11Chuscu chunga punlla, chuscu chunga tuta jipami, cashna tucurca: Mandaj Diosca, pai ari nishpa escribishca ishcai tabla rumicunatami cuhuarca.

12Mandaj Diosca, cashnami nihuarca: ‘Jatarishpa, caimanda ucha urai ri. Egiptomanda can llujchimushca tucuilla gentecunami, huaglicuna tucushca. Paicunaca, ñapashmi ñuca mandashca ñanmandaca anchurishca. Shina anchurishpami, orota yacuyachishca diosta rurashca’ nihuarcami.

13Mandaj Diosca, cashna nishpami villahuarca: ‘Ricui, cai gentecunataca, shinlliyashcapacha cajtami ricuni.

14Paicunata tucuchishpa, paicunapaj shutita cai pachamanda chingachingapaj saquihuailla. Ashtahuangarin ñucami, canmandaca paicunatapash yali ninan shinlli, jatun llactata mandachun churasha’ nihuarcami.

15Nina rupajuj urcumandaca, Dios ari nishpa escribishca ishcai tabla rumicunata ishcandi maquipi chaririajmi urai tigramurcani.

16Shina tigramushpa ricushpaca, cangunata Mandaj Taita Diosta fiñashpa, juchata rurashcatami ñapash ricurcani. Mandaj Dios mandashca ñanmanda ñapash anchurishpami, orota yacuyachishpa shicu diosta rurashca carcanguichi.

17Chaimandami ñucaca, ñuca ishcandi maquihuan japishpa, chai ishcai tabla rumicunataca, cangunapaj ñaupajpi shitashpa faquircani.

18Chaimandami, pundashnallata chuscu chunga punllata, chuscu chunga tutata, Mandaj Diospaj ñaupajpi cungurishpa mañajurcani. Mandaj Diospaj ñaupajpi canguna nalita rurashpa, ninanda fiñachishpa juchata rurashcamandami, imatapash na micushpa, imatapash na ufiashpa, chashna mañajurcani.

19Mandaj Diosca, ninandapacha fiñashpa cangunata tucuchigrijujpimi, ninanda manllarircani. Ashtahuangarin Mandaj Diosca, ñuca mañashcataca cutin uyahuarcarami.

20Aarondapash tucuchingapajmi, Mandaj Diosca chashnallata ninanda fiñarirca. Chai punllacunapica, paimandapash chashnallatami mañajurcani.

21Chaimandami, cangunata juchata rurachij canguna rurashca shicu diosta japishpa rupachircani. Chaitaca ali ali cutashpami, ñutu jacu tucungacaman ñuturcani. Chai jacutaca, urcumanda shamujuj larca yacupimi shitarcani.

22Shinallata Tabera, Masah, Kibrot-hataava shuti pueblocunapipashmi, Mandaj Diostaca ninanda fiñachircanguichi.

23Mandaj Diosca cangunataca, Cades-barnea shuti pueblopi cajpimi: ‘Ñuca carashca llactata japingapaj vichai richi’ nishpa cachajurca. Chashna cachajujpipash, cangunata Mandaj Taita Dios mandashcata na cazushpami quedarcanguichi. Cangunaca, paita na crishpami, pai rimashca shimitapash na cazurcanguichi.

24Cangunaca, ñuca rijsishca punllamandapachami, Mandaj Diosta napacha cazujcuna carcanguichi.

25Mandaj Diosca, cangunataca tucuchishami nircami. Shina nijpimi ñucaca, chuscu chunga punllata, chuscu chunga tutata, Mandaj Diospaj ñaupajpi cungurishpa mañajurcani.

26Mandaj Diostaca, cashna nishpami mañajurcani: ‘Mandaj Jatun Dioslla, cambajlla cachun can agllashca gentecunataca, ama tucuchipaichu. Paicunataca, cambaj ninan ushaihuan, ninan ushaita charij cambaj maquihuan Egiptomanda llujchishpami quishpichircangui.

27Canda servij Abrahamda, Isaacta, Jacobotapash yaripairi. Cai gentecuna shinlli cajtapash, paicuna can Diosta na cazushpa juchata rurashcatapash ama ricupaichu.

28Ñucanchita llujchimushca llactapi causajcunaca, cashna ninajunman: Mandaj Diosca, pai carashca nishca llactaman pushaitaca, na ushashcachu. Ashtahuangarin fiñashpa, jichushca pambapi huañuchingapajmi, caimanda llujchishca ninajungami.

29Paicunaca, cambajlla cachun can agllashca gentecunami. Paicunataca, canmari cambaj ninan ushaihuan, cambaj rigrata chutashpa llujchimurcangui’ nishpami mañarcani.