1 SAMUEL 28 - Quichua Imbabura Bible

1Chai punllacunami, cashna tucurca: Filisteocunaca, israelcunahuan macanajungapajmi paicunapaj soldadocunata tandachinajurca. Chaipimi Aquis runaca, Davidtaca cashna nirca: —Canllata ali yachanguimi. Canga, cambaj runacunandi ñucahuan tandanajushpami, macanajuiman rina cangui— nircami.

2Shina nijpimi Davidca, Aquis runataca cashna nirca: —Canda servij ñuca imata ruranatapash, canllata alimi yachangui— nircami. Shina nijpimi Aquis runaca, Davidtaca cashna nirca: —Shina cashpaca, ñuca tucui causaipimi, ñucata cuidaj cachun churasha— nircami. Saulmandapash, Endor pueblopi causajuj yachaj huarmimandapashmi villajun

3Samuelca, ñami huañushca carca. Chaimandami tucuilla israelcuna huacashpa, pai causajushca Ramá shuti pueblopillata pambashca carca. Ashtahuangarin Saulca, yumbucunata, yachajcunataca llactamanda llujchishpa cachashcami carca.

4Shina cajpimi filisteocunaca tandanajushpa, Sunem shuti pueblo ladoman shamushpa, carpacunata shayachishpa tianajurca. Shinallata Saulpash, tucuilla israelcunata tandachishpami, Gilboa shuti urcupi carpacunata shayachishpa tianajurca.

5Filisteocuna, carpacunata shayachishpa tianajujta ricushpami, Saulca ninanda manllashpa, paipaj shungupi ninanda musparijurca.

6Chaimandami Saulca, Mandaj Diosta tapujurca. Shina tapujpipash Mandaj Diosca, muscuipishna ricurishpallapash, Urim nishcapi suerteta rurajpipash, profetacunahuambash, imatallapash na tigrachircachu.

7Chaimandami Saulca, paita servijcunataca: —Yachana ayata charij huarmita mascagrichi. Chai huarmipajman ñuca rishpa, paita tapusha— nijpimi, paita servijcunaca: —Ricui, Endor shuti pueblopimi, yachana ayata charij shuj huarmi causan— ninajurca.

8Shina nijpimi Saulca, paita ama rijsichun shuj churajunacunata churajushpa, ishcai runacunata pushashpa, yachaj huarmipajman tuta shamushpaca, cashna nirca: —Ñucami, cambaj yachana ayahuan ñuca ima tucunatapash yachapai nipani. Shinallata maijanda ñuca cayamui nishcatapash, vichai cayamupangui— nircami.

9Shina nijpimi chai huarmica, cashna nirca: —Ricui canga, Saúl imatalla rurashcatapash yachanguimi. Paimi, huañushcacunata cayajcunatapash, yachajcunatapash, cai llactamanda llujchishpa cacharca. ¿Imashpata ñucata huañuchihuachun, chashna pandachij shamungui?— nircami.

10Shina nijpimi Saulca, Mandaj Diospaj shutipi cashna nishpa juramenturca: —Mandaj Diosca causajumbachami. Can caita rurashcamandaca, ima llaquipash na japingachu— nircami.

11Shina nijpimi, chai huarmica: —¿Pitata cayai ningui?— nijpi Saulca: —Samuelta cayamui— nirca.

12Chai jipami, Samuelta chai huarmi ricushpaca, ninanda caparishpa Saultaca cashna nirca:

13—¿Imashpata umahuarcangui? Canga, Saulmari cangui— nircami. Shina nijpimi jatun mandajca, cashna nirca: —Ama manllaichu. ¿Imatata ricurcangui?— nircami. Shina nijpimi, chai huarmica: —Alpa ucumanda, dioscuna vichai shamunajujtami ricuni— nirca.

14Shina nijpimi, Saulca: —¿Imaman rijchajta ricurinyari?— nishpa tapujpi chai huarmica, cashna nirca: —Shuj rucu runagumi, jahualla churajunahuan pillurishca shamujun— nircami. Shina nijpimi Saulca, Samuelmi canga yashpa, paita manllashpa alpaman chayajta urai cumurirca.

15Chaipimi Samuelca, Saultaca: —¿Imapajta ñucata cayashpa fiñachihuangui?— nijpi Saulca, cashna nirca: —Ñucaca, ninan llaquipimari cani. Filisteocunami, ñucata fiñashpa macanajungapaj shamushca. Taita Diospashmi, ñucamanda anchurishca. Shina cashpami ñuca tapushcataca, profetacunahuambash, muscuipillapash na ricurishpa, imatallapash na tigrachihuan. Chaimandami, ñuca imata ruranatapash villahuachun, candaca cayarcani— nircami.

16Shina nijpimi Samuelca, cashna nijurca: —Mandaj Dios canmanda anchurishpa, canda fiñaj tucushca cajpica, ¿imapajta ñucataca tapuhuanguiyari?

17Mandaj Diosca, ñucaman villashcashnallatami candaca rurashca. Mandaj Diosllatami, can mandajushcatapash quichushpa, cambaj cumba Davidman cushca.

18Canllatami, Mandaj Dios rimashcataca na cazurcangui. Shinallata amalecitacunata Dios ninandapacha fiñashpa, tucuillata huañuchi nishcatapash, na pactachircanguichu. Chaimandami Mandaj Diosca, cunanga candaca chashna rurashca.

19Shinallata israelcunatapash, candapashmi Mandaj Diosca, filisteocunapaj maquipi churanga. Shina churajpimi cayapaca cambash, cambaj churicunapash ñucahuan canguichi. Mandaj Diosca, Israel soldadocunatapash filisteocunapaj maquipimi churanga— nijurcami.

20Samuel chashna villajta uyashpami Saulca, jatun runa cashpapash ninanda manllashpa, alpaman urmarca. Shinallata tucui chai punllapash, tutapash imatallapash na micushca cashcamandami, shinlli tucuitaca napacha ushajurca.

21Saúl ninanda manllarishpa, imata ruraitapash na ushajujta ricushpami, chai huarmi shamushpaca cashna nirca: —Ricui, canda servij ñucaca, can rimashcatami cazurcani. Can imata rurai nishcatapash uyashpami, huañunatapash na manllashpa tucuita rurarcani.

22Chaimanda cunanga, canda servij ñuca imata nishcatapash uyapai nipanimi. Can shinlli tucushpa ñanda japishpa richunmi, asha micunaguta can micuchun caragrini— nircami.

23Shina nijpipash, Saulca: —Na munanichu— nishpami, na micungapaj munarca. Ashtahuangarin paita servijcunapash, chai huarmipash micuillayari ninajujpillatami, paicunata cazushpa alpamanda jatarishpaca, cama jahuapi tiarirca.

24Chai huarmica, paipaj huasipimi shuj racu shicuta charirca. Chaitami huañuchirca. Chai jipaca, jacuta japishpa masashpami, levadura illaj tandata rurarca.

25Shina rurashpami Saulmambash, paita servijcunamambash apamushpa cararca. Ña micushca jipaca, jatarishpami paicunaca chai tutallata rirca. Filisteocunaca Davidtami manllashca