JOSUÉ 2 - Quichua Imbabura Bible

Josueca, Jericó pueblota pacalla ricuchunmi cachashca

1Nun shuti runapaj churi Josueca, Sitim shuti jichushca pambamandami, pacalla richun, ishcai runacunata pacalla cachashpa, cashna nirca: “Chai llactatapash, Jericó pueblotapash rijsishpa tigramugrichi” nircami.

Shina nijpi paicuna rishpaca, culquimanda huainayaj Rahab shuti huarmipaj huasimanmi chayarca. Chaipimi, mingarishpa pacarirca.

2Chaitami, Jericó pueblota jatun mandajman cashna nishpa villanajurca:

—Ricui, Israel runacuna cunan tutami, cai llactata pacalla ricungapaj shamushca— ninajurcami.

3Shina villajpimi, Jericó pueblota jatun mandajca, Rahab shuti huarmipajman, cashna nigrichun cacharca:

—Cambaj huasiman shamushca runacunata, canllaman llujchi. Paicunaca, tucui llactata pacalla ricungapajmi shamushca— nichunmi cacharca.

4Ashtahuangarin chai huarmica, chai ishcai runacunataca pacashpami, cashna nirca:

—Ari, shuj runacunaca ñuca huasiman shamurcapashmi. Ashtahuangarin paicuna maimanda cashcatapash, na yacharcanichu.

5Ña tutayashcapi pueblo punguta vichanallapimi, caimandaca llujshirca. Paicuna maiman rishcatapash na yachanichu. Ucha calpashpa catishpaca, japigringuichimi— nircami.

6Ashtahuangarin chai huarmica, chai ishcai runacunataca, huasi jahuaman vitsiachishpami, lino nishcacunata asha asha huatashpa alichishca ucupi pacashca carca.

7Chai runacunaca, Jordán yacuman rina ñanda rishpami, chai yacuta chimbanalla ladocaman catishpa rinajurca. Catishpa rinajuj chai runacuna llujshijhuanmi, pueblo pungutaca vicharca.

8Rahab shuti huarmica, paicuna nara puñujpillata, huasi jahua patioman vitsiashpami, cashna nijurca:

9—Cangunata ninandapacha manllana, ñucanchi jahuapi shamushcamandami, Mandaj Dios cai llactata cangunaman carashcataca yachani. Cangunata manllashpami, cai llactapi tucui causajcunaca shaijushpa, imata ruraitapash na ushanajun.

10Egiptomanda canguna llujshimujpi, Puca Cuchata canguna chimbachun, Mandaj Dios chaquichishcatapash uyarcanchimi. Shinallata Jordán yacu chimba ladoman causanajushca amorreocunata jatun mandaj Sehón shuti, Og shuti ishcai runacunata imashna tucuchishcatapash uyarcanchimi.

11Chaita uyashpami, ñucanchi shungupica ninanda shaijushcashna tucurcanchi. Cangunata manllashpami, tucui runacuna ña huañugrinajun. Cangunata Mandaj Taita Diosca, jahua pachapipash, cai pachapipash Taita Diosmi.

12Shina cashcamandami cunanga, cangunata Mandaj Diospaj shutipi juramentuchun mañapani: Ñuca taitapaj huasipi causajcunataca, ñuca cangunata llaquishcashnallata llaquipanguichiyari. Chaitaca, chashnapacha canata yachangapajmi, shuj ricuchinaguta ricuchina cahuanguichi.

13Shinallata ñuca taitapaj, ñuca mamapaj, ñuca turicunapaj, ñuca ñañacunapaj causaitapash quishpichishunmi. Tucui imalla paicunapaj cashcataca, imatallapash na rurashunllu. Cangunapaj causaitaca, huañunamanda quishpichishunmi nipaichiyari— nijurcami.

14Shina nijpimi paicunaca, cashna nishpa tigrachinajurca:

—Ñucanchimanda, canguna na villashpa upalla cajpica, cangunata huañuchigrijujpipash, ñucanchimi huañushun. Cai llactata ñucanchiman Mandaj Dios carajpi japishpaca, ñucanchica canda llaquishpa, na llullashpami pactachishun— ninajurcami.

15Rahab shuti huarmi causajuj huasica, pueblo muyundi jatun pirca jahuapimi carca. Chaimandami, paicunataca cabiahuan huatashpa, ventanata uriajuchirca.

16Chai jipaca, cashnami nirca:

—Mascashpa catijcuna cangunahuan ama tuparichun, urcuman richi. Cangunata catijcuna tigramungacaman, quimsa punllata chaipi pacajunguichilla. Chai jipaca, cangunapaj ñanda catishpa ringuichilla— nircami.

17Shina nijpimi paicunaca, cashna ninajurca:

—Ñucanchita can juramentuchijpi ñucanchi juramentushcamandaca, ima llaquitapash na apanami quedashun.

18Ricui, cai llactaman ñucanchi yaicumujpica, ñucanchita uriajuchishca ventanapi racuta caupushca cai puca puchata huatangui. Cambaj taita mamata, turicunata, cambaj taitapaj familiacunatapash, tucuillata cambaj huasipi tandachingui.

19Cambaj huasimanda maijambash llujshijpi huañuchijpica, paipaj yahuarca paipaj jahuallatami canga. Ñucanchica, na juchachi tucushunllu. Ashtahuangarin maijambash cambaj huasipi cajpita maquihuan huañuchijpica, chai huañujpaj yahuarca ñucanchi jahuami canga.

20Can ñucanchimanda imatapash villajpica, ñucanchita juramentuchishcata na pactachishpapash, ima llaquitapash na apashunllu— ninajurcami.

21Shina nijpimi, Rahab shuti huarmica:

—Canguna nishcashnallatami pactachisha— nirca.

Shina nishca jipaca, shuj punllacaman nishpa cachajpimi, chai runacunaca rinajurca. Chai jipami chai huarmica, racuta caupushca puca puchata ventanapi huatarca.

22Paicunaca, chaimanda rishpa urcuman chayashpami, paicunata mascajcuna tigramungacaman quimsa punllata pacajushpa tianajurca. Paicunata mascajcunaca, tucuilla ñangunata mascashpapash, na tarishpami tigranajurca.

23Chai jipami, chai ishcai runacunaca, urcumanda uriajushpa, Jordán yacuta chimbashpa, Nun shuti runapaj churi Josuepajman tigramurca. Shina tigramushpami, paicuna ima tucushcatapash tucuita parlanajurca.

24Cashnami Josueman ninajurca: “Mandaj Diosca, chai tucui llactatami ñucanchi maquipi churashca. Chai llactapi tucui causajcunaca, ninanda shaijushcashnami ñucanchi ñaupajpica tucunajun” ninajurcami.