2 REYES 5 - Quichua Imbabura Bible

Eliseomandapash, Naamán runamandapashmi villajun

1Siria llactata jatun mandajpaj soldadocunata mandaj Naamán runaca, paipaj amopaj ñaupajpica, ninandapacha alicachi tucushca runami carca. Mandaj Diosca, Siria llactataca, Naamán runamandallami mishachin carca. Chaimandami paitaca, ninanda alicachin carca. Paica, ali shinlli runapachami carca. Chashna cashpapash, lepra ung:uihuanmi carca.

2Siria llactamandami, tandanajushca shuhua runacunaca, macanajunacunahuan alichirishca llujshimushca carca. Paicunaca, Israel llactamandami shuj cuitsaguta apashpa rishca carca. Chai cuitsaguca, Naamán runapaj huarmita servishpami causarca.

3Chai cuitsagumi, paita mandaj huarmitaca cashna nirca:

—Dios ima nishcata villaj runaguca, Samaria pueblopimi causan. Cai ung:uimanda alichihuai ningapaj ñuca amo rijpica, cai lepra ung:uimandaca, paica alichinmanmi— nircami.

4Shina nijpimi Naamán runaca, paipaj amopajman rishpaca, Israel llactamanda shuj cuitsaguca, cashna chashnami parlashca nishpa villarca.

5Shina villajpimi, Siria llactata jatun mandajca, cashna nirca:

—Shina cashpaca rilla, ñucami Israel llactata jatun mandajman cartacunata escribishpa cachagrini— nircami.

Shina nijpimi Naamán runaca, sucta quintal chaupi yalita pezaj culquita, sucta huaranga oro culquicunata, chunga mudana churajunata apashpa rirca.

6Shinallata cartacunatapash, Israel llactata jatun mandajman apashpami rirca. Chai cartacunapica, cashnami nijurca: “Cai cartacuna cambajman chayamujpica, ñucata servij Naamán runata, paipaj lepra ung:uimanda alichipangui nishpa, ñuca cachajushcata yachachunmi cachamuni” nijurcami.

7Israel llactata jatun mandajca, chai cartacunapi chashna nijujta ricushpami, paipaj churajushcatapash liquirishpa, cashna nirca:

—Cai runata paipaj lepra ung:uimanda alichi nishpami cachamushca. Causaita cungapaj, causaita quichungapaca, ¿ñucaca Taita Dioschu cani? Cunanga, imashna ñucata llaquichingapaj munajujtapash, cangunallata aliguta yarishpa ricuichi— nircami.

8Israel llactata jatun mandajca fiñarishpa, paipaj churajushcacunatapash liquirishcata Taita Diospaj runa Eliseo yachashpami, jatun mandajman cashna nichun cacharca: “¿Imashpata can churajushcacunata liquircangui? Cunanga, chai runaca ñucapajman shamuchunlla. Shina shamushpami Israel llactapica, Dios ima nishcata villaj runa tiajta yachanga” nichunmi cacharca.

9Shina nijpimi Naamán runaca, paipaj caballocunandi, carretandi shamushpaca, Eliseopaj huasi pungupi shayarirca.

10Chaipi shayajujpimi Eliseoca, shuj runata cashna nichun cacharca: “Jordán yacupi canchiscaman armangapaj rilla. Chashna armajpimi, cambaj aichaca ali tucushpa, ima ung:uipash illaj quedangui” nichunmi cacharca.

11Shina nijpimi Naamán runaca, fiñarishpa cashna nishpa rirca:

—Ricui, paipacha ñucata tuparingapaj llujshimushpami, ñuca ladopi shayarishpa, paita Mandaj Taita Diospaj shutipi mañanga yarcanimi. Shina mañashpaca, maipilla lepra ung:ui tiaj pushtupi paipaj maquihuan tacarishpami alichinga yarcanimi.

12¿Nachu, Damasco pueblopi tiaj Abana shuti, Farfar shuti jatun yacucunallata, cai Israel llactapi tiaj tucui yacucunata yali ashtahuan ali? Chai yacucunapillata armashpaca, ¿nachu ali tucuimanlla carcani?— nishpami, fiñarishpa tigrashpa rijurca.

13Ashtahuangarin paita servijcuna paipaj ladoman quimirishpami, cashna ninajurca:

—Ñuca taitalla. Dios ima nishcata villaj runa, imatapash na rurai ushanallata rurachun mandajpica, ¿nachu chaita ruranguiman carca? Ashtahuangarin cambaj ung:ui anchurichun armagri nishcatacarin, ¿imashpata na ruranguiyari?— ninajurcami.

14Shina nijpimi Naamán runaca, Taita Diospaj runagu mandashcashnallata, Jordán yacupi canchiscaman pambarigrirca. Chashna rurajpimi, paipaj aichaca chairalla huahuapaj aichashna, ima ung:uipash illaj quedarca.

15Chai jipami Naamán runapash, paita cumbaj tucui runacunapash, Taita Diospaj runagupajman tigramurca. Paica, paipaj ñaupajpi shayarishpami, cashna nirca:

—Ricui, tucui cai pachapica, Taita Diosca na tianllu. Ashtahuangarin Israel llactapillami tian. Chaitaca cunanmi yachani. Chashna cashcamanda, canda servij ñuca imaguta carashcatapash chasquipai nipanimi— nircami.

16Ashtahuangarin Eliseoca, cashnami nirca:

—Mandaj Diosca causajumbachami, ñucaca paipaj ñaupajpimi cani. Shina cashcamanda, imatallapash na japishachu— nircami.

Naamán runaca, chasquipaillayari nijujpipash, Eliseoca napacha japingapaj munarcachu.

17Chaimandami Naamán runaca, cashna nirca:

—Shina cashpaca, cai llactamanda alpata ishcai mulapi apachun, ¿canda servij ñucataca nachu saquihuanguiman? nipanimi. Canda servij ñucaca, cunanmandaca tucuillata rupachina animaltapash na huañuchishachu. Shuj dioscunamambash, na animalta cushpa huañuchishachu. Ashtahuangarin Mandaj Diosmanllami cusha.

18Mandaj Diosca, canda servij ñucataca cai nalita rurashcata cungapachun: Rimón shuti diospaj huasimanmi, jatun mandaj ñuca amoca paipaj diosta ninanda alicachingapaj yaicunga. Chaiman yaicushpaca, ñuca rigrapimi marcaringa. Shina marcarijpimi, Rimón shuti diospaj huasipica, ñucapash cungurina tucunga. Chashna rurajpica Mandaj Diosca, canda servij ñuca nalita rurashcataca cungapachun nipanimi— nircami.

19Shina nijpimi, Eliseoca:

—Ama manllaichu rilla— nishpa cacharca.

Chashna cachajpimi Naamán runaca, carullaguta ña rijurca.

20Shina rijujpimi, Taita Diospaj runa Eliseota servij Giezi shuti runaca, pailla cashna yarijurca: “Ricui ñucata mandajca, Siria llactamanda Naamán runataca, pai imatalla carangapaj apamushcacunata, paipaj maquimanda na chasquishpami llaquichirca. Mandaj Diosca causajumbachami. Naamán runata catishpa calpashpaca, imagullatapash japigrishami” yajurcami.

21Shina yajushpami Giezi shuti runaca, Naamán runata catishpa rirca. Shina catishpa calpamujujta Naamán ricushpami, tuparingapaj carretamanda uriajurca. Ña chayajpimi, Naamán runaca:

—¿Alillachu cangui?— nishpa tapurca.

22Chashna tapujpimi Giezi shuti runaca, cashna nirca:

—Alillami cani. Ñucata mandajmi cashna nichun cachamuhuan: ‘Ricui, Dios ima nishcata villangapaj yachajuj ishcaipura huambracunami, Efraín urcumanda cunan horas ñucapajman shamurca. Paicunaman carangapaj quimsa chunga chuscu kilota pezaj culquita, ishcai mudana churajunata cachamupai’ nichunmi cachamuhuarca— nircami.

23Shina nijpimi Naamán runaca, cashna nirca:

—Shuj quintal yalita pezaj culquita apapai nipanimi— nijushpallatami, shuj quintal yalita pezaj culquitaca, ishcai muchilapi huatarca.

Shinallata ishcai mudana mushuj churajunatapashmi cacharca. Tucui chaicunataca, paita servij ishcai runacuna apashpa, Giezi runata ñaupashpa richunmi curca.

24Shinami pacalla ladoman chayashpaca, chai runacunapaj maquimanda japishpa huasipi alichirca. Chai jipami, chai runacunataca tigrachun mandarca.

25Paicuna ña rijpi, paita mandaj Eliseopajman Giezi shuti runa yaicujpimi, Eliseoca:

—Giezi, ¿maimandata shamungui?— nishpa tapurca.

Shina tapujpimi paica:

—Canda servij ñucaca, maimambash na riparcanichu— nirca.

26Shina nijpimi Eliseoca, cashna nirca:

—Carretamanda uriajushpa, chai runa canhuan tuparij shamujujpica, ¿nachu ñuca shungupash chaipi carca? ¿Culquita, churajunacunata, olivos chagracunata, uvas chagracunata, llamacunata, huagracunata, servij runacunata, servij huarmicunata japina punllacunami yanguichu?

27Can chashna rurashcamandaca, Naamán runapaj lepra ung:uica, cambajman chimbashpami candapash, cambaj miraicunatapash llaquichijungalla— nircami.

Shina nijpimi, lepra ung:ui japijpi, chai runaca rasushna yurajpamba, Eliseopaj ñaupajmanda llujshishpa rirca.