JOB 5 - Quichua Imbabura Bible

1Cunanga, shinllita capariyari. ¿Shina caparijpipash, pipash tigrachingachu? ¿Maijan, jucha illajpajmanda tigragringui?

2Shinlli shungu runataca, ninanda fiñarinaca huañuchinshnami charin. Imatapash ninandapacha munaj runataca, imapash ñucapajlla cashcaman yajuna yuyaimi tucuchin.

3Ñucaca, shinlli shungu runataca, sapiyashcashna cajtami ricurcani. Shinamandami, pai causajuj huasitaca chai punllallata, ima llaquipash japishpaca alimi canman nircani.

4Paipaj huahuacunapash, imatapash na manllashpa aliguta causaitaca, na ushangachu. Puebloman yaicuna pungupillatami, llaquichi tucunajunga. Paicunata cacharichingapaca, pipash na tiangachu.

5Paipaj granocunataca, yarjaimanda purijcunami micunajunga. Casha chaupicunamanda llujchishpami apanajunga. Yacunayachishpa purijcunami, paipaj jazindapi tiashcataca ufianshna tucuchinajunga.

6Llaquica, na ñutu alpamanda llujshinllu. Ninan llaquita apanaca, na alpa ucumanda vichi llujshinllu.

7Shina cajpipash, imashnami rupajuj ninamanda jamzi ninan jatarishpaca huairapi rin, chashnallatami runaca llaquipajlla huacharin.

8Ñucaca, Taita Diostachari mascaiman, paimanllari ñuca llaquitaca mingaiman.

9Paica, pipash na rurai ushanalla manllarinacunatami ruran. Shinallata na cuentai ushanalla juyaillacunatami ruran.

10Cai pachapica, tamiatami caran. Tarpushca pambacunamambash, yacutami cachamun.

11Na jariyashpa causajcunataca, alipimi churan. Llaquilla causajcunataca, ama manllashpa aliguta causachunmi churan.

12Umachinata ali yachajcuna yarinajushcataca, paicunapaj maquihuan ama imatapash rurachunmi pandachin.

13Ali yachajcunatapash, umachinata ali yachajushcallatami japin. Jatun nalita rurajcuna yarinajujtapashmi pandachin.

14Punllapipash, yana tutapishnami nitijanajun. Chaupi punllapipash, yana yana tutapishnami tacarishpalla purinajun.

15Shinami Diosca, imagutapash na charij runataca, espadapi huañuchi tucunamanda cacharichin. Diosta na manllajcuna rimashcamandapash, ninandapacha llaquichij runacunapaj maquimandapashmi quishpichin.

16Imagutapash na charij runa shuyanaca, Diosmi. Nalita rurajcunataca, nalita rurashcallatami shimita quilpan.

17Ricui, Taita Dios llaquichijpi, llaquita apaj runaca, ninandami cushijun. Chaimandami, Tucui Ushaita Charij Dios llaquichijpica, na yangapi churana cangui.

18Paimi, caracha ung:uitaca churan. Chaitaca, paillatami jambishpa huatachinga. Pai chugrichishcataca, paipaj maquihuanllatami jambin.

19Sucta llaquicuna japijpipash, cacharichingallami. Ña canchis llaquica, candaca na japingachu.

20Yarjaimanda huañunatapash quishpichingallami. Jatun macanajuipi, espadahuan huañuchi tucunamandapash quishpichingallami.

21Astinshna llaquichij jallumandapash pacajunguillami. Tucuchij llaquicuna shamujpipash, na manllanguichu.

22Canga, tucuchij llaqui japijpipash, yarjai japijpipash asitami asingui. Sacha animalcunatapash, na manllanguichu.

23Canga, alpapi sirij rumicunahuambashmi, ali cangapaj ari ningui. Sachapi causaj animalcunapash, canhuanga casilla aligutami causanga.

24Cambaj carpapipash, casilla ali causai tiajtami yachangui. Can causana huasita ricungapaj yaicujpipash, imapash na illangachu.

25Shinallata cambaj miraicunaca, ashtacapacha cajtami ricungui. Cambaj miraicunaca, pambapi jihuashnami canga.

26Can rucuyashpaca, trigota tandachina punllacunapi trigota tandachishpa huatashcashnami, huañushcata pambana utujuman apai tucungui.

27Ricui, cai tucuitami yachajushcanchi. Chaica chashnapachami. Canga, chaita uyashpa, cambaj alipajllata ali yachajuyari” nijurcami.