ISAÍAS 23 - Quichua Imbabura Bible

Tiro shuti pueblota llaquichinatami villashca

1Tiro shuti pueblota llaquichinata Dios villashcatami villashca: Tarsis shuti pueblomanda jatun barcocunalla, huacaichiyari. Tiro shuti puebloca, maipi yaicungapaj shuj huasillapash na quedangacamanmi, tucuilla tucuchi tucushca. Quitim shuti llactamandapachami, chaitaca villanajurca.

2Mama cucha manñapi causajcunapash, Sidón shuti pueblopi jatushpa randishpa causajcunapash, upalla caichiyari. Cangunamanga, paicunaca mama cuchata yalimushpami, imatapash jatunajun carca.

3Paicunaca, Nilo shuti ashtaca yacuta jichashpa fucuchishca granocunatami apamun carca. Shinamandami, shuj llactacunamanda randishpa jatuj gentecunapash, chaiman shamun carca.

4Sidón shuti pueblopi causajcuna, pingai tucuichiyari. Mama cucha manñapi tiaj, jatun pircahuan muyundi jarcashca puebloca, cashnami nirca: “Ñucaca, ima horallapash unguna nanaitaca na rijsinichu, shuj huahuatallapash na ungushcanichu. Shuj churitallapash na viñachishcanichu, jarihuan nara tacarishca shuj ushitallapash na charishcanichu” nircami.

5Tiro shuti pueblota llaquichishcata, Egiptopi causajcuna yachashpaca, ninandami llaquirinajunga.

6Tarsis shuti pueblopipash villagrichi. Mama cucha manñapi causajcunalla, tucuicuna huacaichiyari.

7Cai puebloca, ¿nachu punda huatacunamandapacha cangunapaj ninanda cushijuna pueblo carca? Paicunapaj chaquihuan llujshishpa rishpami, carucunapi causagrinajunga.

8Coronacunata churachij cai juyailla Tiro shuti pueblotaca, ¿pita cashna llaquichinajuchun mandarca? Cai pueblopi jatushpa, randishpa purijcunaca mandajcunami carca. Llactacunapi jatungapaj, randingapaj rijcunaca, tucui llactapi alicachi tucushcacunami carca.

9Paicunata tucuchinajuchunga, Mandaj Diosmi mandarca. Ninanda alicachi tucushpa jariyajcunata yangapi churangapaj, cai llactapi jatun tucushcacunata pingaichingapajmi, chashna mandarca.

10Tarsis shuti pueblopi causajcunalla, jatun yacushna cangunapaj llactaman tigraichilla. Cangunaca, na ashtahuan ushaita chari ushanachu canguichi.

11Mandaj Diosca, paipaj maquita mama cucha jahuata chutashpami, llactacunataca chujchuchirca. Canaán llactapi tiaj, jatun pircahuan muyundi jarcashca pueblocunata tucuchinajuchunga, paimi mandarca.

12Paica cashnami nirca: “Sidón shuti pueblopi llaquichi tucushca causajcunalla, cangunaca jarihuan nara tacarishca cuitsashna cashpapash, na ashtahuan cushijunachu canguichi. Quitim shuti llactaman chimbangapaj jatarichiyari. Chaipipash aliguta samashpa causaitaca, napacha ushanachu canguichi” nircami.

13Caldeocunapaj llactata ricuichiyari, chai llactaca na tiarcachu. Chai llactataca, jichushca pambacunapi causajcunamanmi, Asiria llacta runacuna callarichirca. Shinlli torrecunata, mandana huasicunatami shayachinajurca. Ashtahuangarin Diosmi, tucuillata urmachirca.

14Tarsis shuti pueblomanda shamuj jatun barcocunalla, caparishpa huacaichiyari. Cangunapaj shinlli torrecunaca tucurishcamari.

15Chai punllapica, cashnami tucunga: Tiro shuti puebloca, jatun mandaj causana huatacunatashnami, canchis chunga huatata cungai tucushca canga. Chai canchis chunga huata jipami, Tiro shuti pueblopi causajcunaca, culquimanda huainayaj huarmishna candanajunga.

16Culquimanda huainayaj huarmilla, candaca tucuicunami cungashca. Cunanga, canda yarichunga cambaj arpata japishpa juyailla tonoguta tocashpa, cutin cutin candashpa tucui pueblota puriyari.

17Canchis chunga huata jipaca, cashnami tucunga: Mandaj Diosmi, Tiro shuti pueblotaca ricuj shamunga. Shinamandami, cutin randishpa, jatushpa causanajunga. Shina causashpami, cai pachapi tiaj tucui llactacunahuan cutinllata huainayanajunga.

18Shina cashpapash paicuna jatushpa, randishpa charijyashcacunaca, Mandaj Diospajlla shicanyachishcami canga. Paicuna jatushpa, randishpa charishcacunataca na alichinajungachu, na mirachinajungachu. Ashtahuangarin chaicunaca, Mandaj Diospaj ñaupajpi alita rurashpa causajcunapajmi canga. Chai alita rurajcuna imata cashpapash na munajta micuchun, juyailla churajunacunata churajuchunmi canga.