1Babilonia llactata jatun mandaj Nabucodonosor runaca, Joacim shuti runapaj churi, Judá llactata jatun mandaj Jeconías shuti runatapash, Judá llactata caishuj mandajcunatapash, imacunatalla rurajcunatapash, jirruta tacajcunatapash Jerusalenmandaca, ñami Babilonia llactaman prezu apashca carca. Chai jipami Mandaj Diosca, Mandaj Diospaj huasi ñaupajpillata tiajuj, ishcai canasta jigosta ricuchihuarca.
2Shuj canastapica, punda fucushca juyailla jigoscunami tiajurca. Caishuj canastapica, yapata ismushca cajpi na micui ushanalla, jigoscunami tiajurca.
3Chaita ricuchishpami, Mandaj Diosca: “Jeremías, canga ¿imatata ricungui?” nihuarca. Shina nijpimi ñucaca: “Jigoscunatami ricujuni. Ali jigoscunaca, juyailla jigoscunami. Ismushca jigoscunaca, na micui ushanalla, yapata ismushcami” nircani.
4Shina nijpimi Mandaj Diosca, cashna nihuarca:
5“Israelcunata Mandaj Taita Diosmi, cashna nini: Cai Judá llactamanda ñuca llujchishpa cachajpi, caldeocunapaj llactaman apai tucushcacunataca, cai ali jigoscunatashnami ricusha. Paicunataca alipajmi cacharcani.
6Paicunata alita rurangapaca, ñuca ñavihuanga ricujushallami. Cutin cai llactaman tigrachimushpami, cutin shayachisha. Shina shayachishpaca, cutinga na tucuchishachu. Ñuca tarpushca yurataca, na cutinga sapimanda llujchishachu.
7Ñucataca, Mandaj Dios cajta rijsichunmi, paicunaman ali shunguta cusha. Paicunaca, ñuca agllashcacunami canga. Ñucapash, paicunapaj Taita Diosmi casha. Paicunaca, tucui shunguhuan ñucapajman tigrarijpimi, chashna rurasha” nihuarcami.
8Mandaj Diosca, cashnatapashmi nijurca: “Ashtahuangarin cai Judá llactapi puchujcunataca, cai llactata jatun mandaj Sedequías shuti runatapash, pai churashca mandajcunatapash, Jerusalenbi causaj puracunamanda quedashcacunatapash, Egipto llactapi causajcunatapash, na micunalla, cai ismushca jigoscunatashnami ruragrini.
9Tucui cai pachapi tiaj llactacunapi causajcunapash asishpa parlanajuchun, shujcunatapash paicunashna tucushpami, ali canman nishpa nalicachijpi, pingai tucunatami ruragrini. Shinallata yarichij shimicunata paicunamanda surcunajuchun, ima llaquipash japishpaca alichari canman ni tucunajuchunmi ruragrini. Maijan llactacunaman ñuca cachajpipash, chashnallatami canga.
10Paicunapajmanmi jatun macanajuita, yarjaita, jatun ung:uita cachamusha. Paicunamambash, paicunapaj ñaupa taitacunamambash carashca llactamanda tucuringacamanmi, chashna llaquichisha” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
