ISAÍAS 61 - Quichua Imbabura Bible

Sion shuti pueblopi causajcunata quishpichina ali villaimi

1Mandaj Jatun Diospaj Espiritumi, ñucapica causajun. Mandaj Diosmi ñucataca, aceiteta talishpa javihuarca. Ñucataca, llaquilla causajcunaman ali villaita villachun, shungu faquirinshna llaquirijcunata ayudachun, prezu causajcuna cacharichi tucuna cashcata villachun, prezuna huasipi tianajujcunamambash, paicuna ña llujshina chayamushcata villachunmi cachamuhuarca.

2Mandaj Dios quishpichina huata chayamushcata, ñucanchi Taita Dios llaquichina punlla chayamushcata villachumbash, llaquilla tucui causajcunata cushichijuchumbashmi cachamuhuarca.

3Sion shuti pueblopi llaquilla causajcuna, uchufata shitarichun mandanapaj randica, ninanda alicachi tucunata carachun, yanata churajunapaj randica, mishquillagu ashnajuj aceitetashna cushijuita carachun, llaquilla shunguhuan causanapaj randica, jahualla churajunaguta churachinshna, cushijuita carachunmi cachamuhuarca. Paicunaca: “Mandaj Dios tarpushca, imatapash cashcatapacha ruraj quirucuna” ni tucunajungami. Dios ninanda alicachi tucujuchunmi, chashna ninajunga.

4Punda huatacunamanda urmashca sirijushcatami, cutin shayachinajunga. Callari huatacunamanda llaquinayaita tucuchi tucushca sirijushcatami, cutin alichinajunga. Urmashca sirijushca pueblocunatami, cutin alichinajunga. Ashtaca miraicunacaman rumi mundungunalla sirijushcatami, cutin shayachinajunga.

5Shuj llactacunamanda runacunami, cangunapaj llamacunataca michinajunga. Na rijsishca runacunami, cangunapaj pambacunatapash yapunajunga, uvas yuracunatapash tarpunajunga.

6Cangunaca: “Mandaj Diospaj curacuna, ñucanchi Taita Diosta servijcuna” ni tucunguichimi. Shuj llactacunapi causajcuna, imatalla charishcacunatami micunguichi. Paicuna juyailla imatapash charishcamandami, jatunyachi tucunguichi.

7Ninanda pingaichi tucushpa, nalicachi tucushpa causangapaj randica, quiquin llacta alpacunapillatami, cangunataca alicachinajunga. Shinamandami, cangunapaj llactacunapica chaitapash yali alicachi tucushpa, causaita causaicaman cushijunguichi.

8Mandaj Dios ñucaca, imatapash aliguta ruranatami juyani. Shuhuashpa ñucaman cushpa tucuillata rupachijcunataca, na ricunayanllu. Shinamandami, alita rurajcuna imata rurashcatapash, na llullajpacha cachun churasha. Paicunahuanga, causaita causaicamanmi ari ninajushun.

9Paicunapaj miraicunaca, tucui llacta puracunapi rijsishcami canga. Retoño llujshishcashna paicunapaj huahuacunaca, gentecunapaj chaupipi rijsishcami canga. Chaita tucui ricujcunami, Mandaj Dios bendiciashca miraicuna cajta rijsinajunga.

10Mandaj Diospimi, ninandapacha cushijusha. Ñuca Taita Diospimi, tucui almahuan cushijusha. Paica, churajunata churachinshnami quishpichihuarca. Jahualla churajunata churachinshnami, imatapash cashcatapacha rurarca. Cazaragrijuj huambraman juyaillaguta churachinshnami churachihuarca. Cazaragrijuj cuitsaman, juyailla orota churachinshnami churachihuarca.

11Alpapimi retoñocuna viñan. Huertapimi, muyu viñashpa vichai llujshin. Shinallatami Mandaj Jatun Diosca, imatapash cashcatapacha ruranatapash, alicachi tucunatapash, tucui shuj llactacunapaj ñaupajpi ricuchinga.