DANIEL 3 - Quichua Imbabura Bible

Quimsa runacunatami, rupajuj jornomanda quishpichishca

1Jatun mandaj Nabucodonosor shuti runaca, oromanda rurachishca shuj shayachinatami rurachirca. Chaica, ishcai chunga canchis metro jatunmi carca. Anchomambash, ishcai metro canchis chunga centimetromi carca. Chaitaca, Babilonia llactapi tiaj Dura shuti pambapimi shayachirca.

2Chaita rurachishca jipaca, jatun mandaj Nabucodonosor runaca, sátrapa nishca mandajcunata, shuj mandajcunata, soldadocunata mandajcunata, uyajcunata, culquita alichijcunata, ali yuyaita cujcunata, juezcunata, tucui llactacunapi mandajcunatami tandachimuchun mandarca. Paicunataca, pai jatun mandaj Nabucodonosor shuti runa rurachishpa shayachishcata mañai callaringapaj shamuchunmi, chashna tandachirca.

3Chaipica satrapacuna, mandajcuna, soldadocunata mandajcuna, uyajcuna, culquita alichijcuna, ali yuyaita cujcuna, juezcuna, tucui llactacunapi mandajcunapashmi tandanajurca. Paicunaca, jatun mandaj Nabucodonosor runa rurachishpa shayachishcata mañai callaringapajmi shamunajurca. Shina shamushpami, jatun mandaj Nabucodonosor runa rurachishpa shayachishcapaj ñaupajpi shayanajurca.

4Chaipi shayanajujpimi, caparishpa villaj shuj runaca shinllita caparishpa, cashna nirca: “Shuj shuj llactamanda, shican shican rimaita rimaj tucui gentecunalla, cangunataca caitami mandani:

5Tucui cangunaca, bocinata, gaitata, tamborilta, arpata, salteriota, zampoñata, tucui shuj tocanacunata tocaj uyarijpica, jatun mandaj Nabucodonosor runa, oromanda rurachishpa shayachishcata cungurishpa ninanda alicachinguichi.

6Maijambash chaita alicachingapaj na cungurishpaca, nina rupajuj jornopimi, ñapash shitai tucunga” nircami.

7Shina nijpimi, bocinata, gaitata, tamborilta, arpata, salteriota, zampoñata, tucui shuj tocanacunata tocajta tucui gentecuna uyashpaca, cungurishpa alicachinajurca. Shican shican llactacunamanda, shuj shuj rimaita rimaj tucui runacunami, jatun mandaj Nabucodonosor runa, oromanda rurachishpa shayachishcata cungurishpa ninanda alicachinajurca.

8Chai punllacunapillatami, caldeo puramanda huaquingunaca, jatun mandajpajman shamushpa, Judá llactamanda runacunataca, nali yuyaihuambacha juchachishpa villanajurca.

9Jatun mandaj Nabucodonosor runataca, cashnami ninajurca:

—Jatun mandajlla, canga causaita causajupailla.

10Jatun mandajlla, canga tucui runacunamanmi, shuj mandashcata curcangui. Paicunataca, bocinata, gaitata, tamborilta, arpata, salteriota, zampoñata, tucui shuj tocanacunata tocajta uyashpaca, oromanda rurashpa shayachishcapaj ñaupajpi cungurishpa, ninanda alicachinajuchunmi mandarcangui.

11Shinallata maijambash chaita alicachingapaj na cungurishpaca, nina rupajuj jornopi shitai tucuchun nircanguimi.

12Cai Babilonia llactapi imatapash ricushpa mandachun, can churashca Sadrac, Mesac, Abed-nego shuti, Judá llactamanda runacunami, candaca napacha cazunajun. Jatun mandajlla, chai runacunaca, cambaj dioscunatapash, oromanda rurachishpa can shayachishcatapash, napacha alicachinajunllu— ninajurcami.

13Chaita villajpimi Nabucodonosor runaca ninanda fiñarishpa, Sadrac, Mesac, Abed-nego shuti runacunata pushamuchun cacharca. Shina cachajpimi, chai runacunataca, jatun mandajpaj ñaupajman ucha pushamunajurca.

14Paicunataca, Nabucodonosor runaca cashnami nijurca:

—Sadrac, Mesac, Abed-nego. Cangunataca, ñuca diosta napacha alicachinllu nijtami uyani. Oromanda rurachishpa ñuca shayachishcatapash, na alicachinllu nijtami uyani. Chaica, ¿shinapachachu imata?

15Cunanga bocinata, gaitata, tamborilta, arpata, salteriota, zampoñata, tucui shuj tocanacunatapash tocaj uyarijpica, ¿ñuca rurachishpa shayachishcapaj ñaupajpi cungurishpa, ninanda alicachinallachu canguichi? Canguna napacha alicachishpaca, chai horasllatami nina rupajuj jornopi shitai tucunguichi. ¿Maijan diosta ñuca maquimandaca cacharichi ushanga?— nijurcami.

16Shina nijpimi Sadrac, Mesac, Abed-nego shuti runacunaca, jatun mandaj Nabucodonosor runataca, cashna ninajurca:

—Can chaita nishcamandaca, imatapash na tigrachinachu capanchi.

17Ricui, ñucanchi Taita Diosca, paita servij ñucanchitaca, nina rupajuj jornomandapash llujchingallami. Jatun mandajlla, cambaj maquimandapash cacharichingapachami.

18Pai na quishpichijpipash, jatun mandajlla, ñucanchica cambaj dioscunataca na servishunllu. Can rurachishpa shayachishcatapash, napacha alicachishunllu. Chaitaca, yachanapachami capangui— ninajurcami.

19Shina nijpimi Nabucodonosor runaca, Sadrac, Mesac, Abed-nego shuti runacunahuan ninanda fiñarishpa, paipaj ñavipash shuj tucurca. Shina fiñarishpami, jornota rupajyachin cashcamandaca, canchis viaje yalicaman rupajyachinajuchun mandarca.

20Chai jipaca, paipaj soldado puramanda ashtahuan shinlli soldadocunatami, Sadrac, Mesac, Abed-nego shuti runacunata huatashpa, nina rupajuj jornoman shitachun mandarca.

21Shinamandami chai runacunaca, paicunapaj churajunacunandi, chaquipi churajushcacunandi, turbante nishcacunandi, jahualla churajunacunandi huatai tucurca. Chai jipami, nina rupajuj jornopi shitai tucurca.

22Jornota ucha rupajyachijuchun, jatun mandaj mandajpimi, ninandapacha rupajyachishca carca. Shinamandami Sadrac, Mesac, Abed-nego shuti runacunata shitajcunatapash, chai ninaca huañuchirca.

23Sadrac, Mesac, Abed-nego shuti quimsa runacunapash, huatai tucushcami nina rupajuj jorno ucuman shitai tucurca.

24Chaimandami, jatun mandaj Nabucodonosor runaca, ninanda manllarishpa uchalla jatarishpaca, paiman ali yuyaita cujcunata cashna nishpa tapurca:

—Nina rupajuj jornopica, ¿nachu quimsa runacunatalla huatashpa shitarca?— nijpimi, paicunaca:

—Ari jatun mandajlla, shinapachami carca— nishpa tigrachinajurca.

25Shina nijpimi jatun mandajca, cashna nirca:

—Ricuichi, ñucaca chuscu runacunatami, nina chaupipi imapash na tucushpa, cacharishca purinajujta ricuni. Chai chuscumanda shujcarin, dioscunapaj churiman rijchajmi— nircami.

26Shina nishpami Nabucodonosor runaca, rupajuj jorno ñaupajman quimirishpa cashna nirca:

—Jahua pachapi causajuj Taita Diosta servij Sadrac, Mesac, Abed-nego shuti runacunaca, chai ucumanda llujshishpa shamuichi— nircami.

Shina nijpimi Sadrac, Mesac, Abed-nego shuti runacunapash, nina chaupimanda llujshirca.

27Shina llujshijpica satrapacuna, llactacunata mandajcuna, soldadocunata mandajcuna, jatun mandajman ali yuyaita cujcunapashmi tandanajurca. Imashnami ninaca, na rupachi ushashcata ricungapaj, shuj ajchatallapash na rupachishcata ricungapajmi tandanajurca. Paicunapaj churajunacunaca, yanayaitallapash na yanayashcachu carca. Ninallapash na ashnanajurcachu.

28Chaimandami Nabucodonosor runaca, cashna nijurca: “Sadrac, Mesac, Abed-nego shuti runacunapaj Taita Diosca, aligupachamari cangui ni tucushca cachun. Paica, paita yariashpa causaj paita servijcunata quishpichingapajmi, paipaj angelta cachamushca. Paicunaca, ñucataca jatun mandaj cajpipash, ñuca mandashcataca na cazunajurcachu. Paicunapaj Taita Diosta na mañashpa, shuj diosta servishpa alicachingapaj randica, quiquin cuerpota rupachinajuchun saquircallami.

29Shinamanda cunanga, caitami mandani: Sadrac, Mesac, Abed-nego shuti runacunapaj Taita Diosta maijambash fiñashpa nalicachijtaca, causajtallata changatapash, rigratapash fitichun. Paicunapaj huasipash, mapata shitana pushtu tucuchun. Cashna llaquimanda quishpichij Dioshuan chimbapurangapaca, maijan shuj diospash na tianllu” nijurcami.

30Chai jipami, Babilonia llactapica jatun mandajca, Sadrac, Mesac, Abed-nego shuti runacunataca jatunyachijurca.