1 SAMUEL 19 - Quichua Imbabura Bible

1Saulca, paipaj churi Jonatandapash, paita tucui servijcunatapashmi, Davidta huañuchinajuchun mandarca. Ashtahuangarin Saulpaj churi Jonatanga, ninandapachami Davidtaca juyan carca.

2Chaimandami, cashna nishpa Davidman villachun cacharca: —Ñuca taita Saulca, candaca huañuchingapajmi yarijun. Chaimanda, caya tutamandacaman maipi cashpapash, pipash na rijsishca pushtupi ali pacajungui.

3Ñucami, ñuca taitahuan pambaman llujshigrini, can maipi cajpipash ladollapimi cashun. Chaipimi, can imashna cajtapash, ñuca taitaman parlagrini. Pai imata nishcatapash, canman villachun cachamushallami— nijurcami.

4Jonatanga, Davidmandaca alitallami paipaj taita Saulman parlashpa, cashna nijurca: —Can jatun mandajca, canda servij Davidta llaquichishpa, ama juchata ruraichu. Paica, ima nalitapash candaca na rurashcachu. Ashtahuangarin imata cashpapash, alitallami canman rurashca.

5Paica, huañunatapash na manllashpami, chai filisteo runataca huañuchirca. Chashna rurajpimi Mandaj Diosca, tucui israelcunata quishpichirca. Canga, chaita ricushpami cushijurcangui. ¿Imashpata ima nalitapash na rurajpita, Davidtaca yangamanda huañuchishpa, yahuarta jichashpa juchata ruragringui?— nijurcami.

6Jonatán chashna nijta uyashpami, Saulca: —Mandaj Diosca causajumbachami, Davidtaca na huañuchishachu— nishpa juramenturca.

7Chai jipami Jonatanga, Davidta cayashpaca imatalla parlashcacunata tucuilla villarca. Paillatami Davidtaca, Saulpajman pushamurca. Chaimandami Davidca, pundashnallata Saulta servingapaj quedarca.

8Chai jipamambash, cutinllatami macanajui tiarca. Chaimandami Davidca, filisteocunahuanga macanajungapaj llujshirca. Paicunata mishashpa, ashtacacunata chugrichishpa huañuchijpimi, paipaj ñaupajmanda pacajungapaj calpanajurca.

9Mandaj Diosmandami nali ayallata, Saultaca cutin japirca. Paica, paipaj huasipimi lanzata paipaj maquipi chaririaj tiajurca. Chaipimi Davidca, arpata tocajurca.

10Saulca, Davidpi lanzata shitashpa pircaman yalijta cusha yashpami, Davidpajman lanzata shitarca. Ashtahuangarin Davidca, Saulpaj ñaupajmanda anchurijpimi, pircapilla chayachirca. Chaimandami Davidca, chai tutallata pacajushpa upalla rirca.

11Chai jipami Saulca, Davidpaj huasipi chapashpa, tutamandata Davidca huañuchigrichun, paipaj runacunata cacharca. Ashtahuangarin paipaj huarmi Micalmi, cashna nishpa Davidman villarca: —Cunan tutallata na pacajushpa rishpaca, cayapaca huañunguimi— nirca.

12Shina nishca jipami Mical huarmica, Davidtaca ventanata huarcushpa urai llujchirca. Shina llujchijpimi Davidca, pacajungapaj calpashpa rirca.

13Chai jipami Mical huarmica, rurashcalla shuj diosta japishpa, Davidpaj camapi sirichirca. Shina sirichishpami, chivo milma ahuashcata saunachishpa, jahualla shuj churajunata churachirca.

14Saúl cachashca runacuna Davidta japingapaj chayajpimi, Mical huarmica: —Davidca huañujunmari— nirca.

15Shina villagrijpimi Saulca, paipaj runacunataca: —Caipi huañuchingapaj, camandi caiman apamugrichilla— nishpa, cutin Davidta ricugrichun cacharca.

16Chai cachashca runacuna huasiman yaicushpa ricujpica, rurashcalla shuj diosllami camapi carca. Paica, chivo milma ahuashcata saunashcami carca.

17Chaimandami Saulca, Mical huarmitaca cashna nirca: —¿Imashpata chashna llullashpa, ñucata fiñaj runa pacajushpa richun saquircangui?— nijpimi Mical huarmica, Saultaca cashna nirca: —Paica: ‘Ñuca richun saquihuai. Richun na saquijpica, huañuchishami’ nijpimi, richun saquircani— nircami.

18Chashna pacajushpa calpashpa rishpami Davidca, Ramá shuti pueblopi causajuj Samuelpajman shamurca. Chaipimi, tucui imatalla Saúl paita rurashcata parlajurca. Chai jipami Davidpash, Samuelpash, Naiot shuti pushtupi causangapaj rirca.

19Chaitami Saulman cashna villarca: “Ricui Davidca, Ramá shuti pueblopi tiaj Naiot shuti pushtupimi causajun” nishpami villarca.

20Chaimandmi Saulca, Davidta pushamuchun shuj runacunata cacharca. Chaiman chayashpami, profetacuna tandanajushpa, villanajujta ricunajurca. Chai villajcunataca, Samuel mandajujtami ricunajurca. Chaipimi Saúl cachashca runacunapajman, Taita Diospaj Espíritu shamujpi, paicunapash Diosmanda villanajurca.

21Chaita yachashpami Saulca, shujcunata cutin cacharca. Paicunapashmi, villai callarinajurca. Chaimandami Saulca, shuj runacunatapash, caihuanga quimsa cutin cacharca. Paicunapashmi, chashnallata villanajurca.

22Chaimandami Saulca, Ramá shuti puebloman paipacha rishpa, Secú shuti pueblopi tiaj jatun pugyuman chayashpaca: “¿Samuelpash, Davidpash maipita?” nishpa tapurca. Shina tapujpimi, shuj runaca: “Ricui paica, Ramá shuti pueblopi tiaj Naiot shuti pushtupimi” nishpa villarca.

23Ramá shuti pueblopi tiaj Naiot shuti pushtuman Saúl ña rijujpimi, Taita Diospaj Espirituca paipajmambash shamurca. Chaimandami Saulpash, Ramá shuti pueblopi tiaj Naiot shuti pushtuman chayangacaman, Diosmanda villashpandi rijurca.

24Saulca, paipaj churajunacunatapash llujchirishpami, paipash caishuj runacunashnallata, Samuelpaj ñaupajpi villajurca. Shina villajushpaca tucui punlla, tucui tutatami lluchulla carca. Shina tucushcamandami: “¿Saulpash, profeta purallatachu?” ninajurca. Davidhuan, Jonatanhuanga ali cumbacunami cashca