JEREMÍAS 38 - Quichua Imbabura Bible

Jeremiastaca, yacuta tandachij jatun utujupimi churashca

1Matán shuti runapaj churi Sefatías shuti runapash, Pasur shuti runapaj churi Gedalías shuti runapash, Selemías shuti runapaj churi Jucal shuti runapash, Malquías shuti runapaj churi Pasur shuti runapashmi, tucui gentecunapaj ñaupajpi cashna nishpa, Jeremías villajujtaca uyanajurca:

2“Mandaj Diosca, cashnami nirca: ‘Maijambash cai pueblopi quedashpaca, jatun macanajuipi cashpa, yarjaihuan cashpa, jatun ung:uihuan cashpapash huañungapachami. Ashtahuangarin caimanda llujshishpa, caldeocunapaj maquipi yaicugrishpaca, macanajushpa quichushcashnami causanga. Chashna rurashpaca, causangapachami’ nircami.

3Mandaj Diosca, cashnatapashmi nirca: ‘Cai puebloca, Babilonia llactata jatun mandajpaj soldadocunapaj maquipi churai tucungapachami. Paimi, cai pueblotaca japinga’ nircami” nishpami villajurca.

4Shina villajujta uyashpami mandajcunaca, jatun mandajtaca cashna ninajurca:

—Cai runaca, cunanda huañunapachami. Paica, chashna villashpami cai pueblopi puchushca, macanajunata ali yachaj runacunapaj maquitaca shayajuchinshna saquijun. Shinallata chai shimicunata rimashpami, tucui gentecunapaj maquitapash shayajuchinshna saquijun. Cai runaca, gentecunapaj casilla ali causaitaca na mascanllu, ashtahuangarin nalitallami mascan— ninajurcami.

5Shina ninajujpimi, jatun mandaj Sedequías shuti runaca, cashna nirca:

—Ricuichi, Jeremiasca cangunapaj maquipimi. Jatun mandaj cashpapash, ñucaca cangunata imata jarcaitapash na ushanichu— nircami.

6Shina nijpimi paicuna Jeremiasta japishpaca, Hamelec shuti runapaj churi Malquías rurachishca yacuta tandachina jatun utujupi huascacunahuan urai cacharinajurca. Chai utujuca, prezuna huasi patiopimi carca. Chai jatun utujupi yacu na tiashpapash, turumi tiarca. Jeremiasca, chai turupimi pambarirca.

7Etiopía llactamanda Ebed-melec shuti eunuco nishca runami, mandana huasipi jatun mandajta servin carca. Paimi, yacuta tandachina jatun utujupi Jeremiasta shitashcataca yacharca. Jatun mandajca, Benjamín shuti pungupimi, mandajcunahuan tandanajushca tiajurca.

8Ebed-melec shuti runaca, mandana huasimanda llujshishpa rishpami, jatun mandajtaca cashna nijurca:

9—Jatun mandaj ñuca amolla. Can churashca mandajcunaca, profeta Jeremiasta, yacuta tandachina jatun utujupi shitachun mandashpaca, nalitami rurashca. Chai utujupica, yarjaimanda huañungami. Cai pueblopica, tandallapash na ashtahuan tianllu— nircami.

10Shina nijpimi jatun mandajca, Etiopía llactamanda Ebed-melec shuti runatallata, cashna nishpa cacharca:

—Shina cashpaca, quimsa chunga runacunata caimanda pushashpa rilla. Paicunata pushashpaca, profeta Jeremiastaca, nara huañujpillata chai jatun utujumanda llujchichun mandagri— nircami.

11Shina nijpimi Ebed-melec shuti runaca, chai runacunata pushashpa, jatun mandajpaj huasipi imatapash ninan valishcacunata alichina ucumandaca, ashtahuan ucuman yaicurca. Chai ucumandami, mauca finducunata, liqui churajunacunata apashpa, Jeremías japichun huascacunapi huatashpa, chai jatun utujuman shitanajurca.

12Chashna rurashpami, Etiopía llactamanda Ebed-melec runaca, Jeremiastaca cashna nirca:

—Cunanga, chai mauca finducunatapash, liqui churajunacunatapash, cambaj ishcandi rigra ucupi churashpa, cabiatapash rigra ucupi churajui— nircami.

Jeremiasca, pai nishcashnami rurarca.

13Shinami Jeremiastaca, chai yacuta tandachina jatun utujumandaca huascacunahuan llujchinajurca. Chai jipaca Jeremiastaca, prezuna huasi patiopimi saquirca.

Jatun mandaj Sedequías shuti runaca, Jeremiastami pacalla tapushca

14Utujumanda llujchishca jipami, jatun mandaj Sedequías shuti runaca, profeta Jeremiastaca, paipaj ñaupajman pushamuchun cacharca. Paica, Mandaj Diospaj huasiman yaicuna ishcaipaj cati pungu huashapimi tiajurca. Chaipimi jatun mandajca, Jeremiastaca cashna nirca:

—Shuj tapunatami tapugrini, imatapash ama pacashpa, tucuita villahuangui— nircami.

15Shina nijpimi Jeremiasca, Sedequías runataca cashna nirca:

—Can tapushcata ñuca villajpica, ñucataca huañuchinguipachami. Ali yuyaita cujpipash, na uyahuanguichu— nircami.

16Shina nijpimi jatun mandaj Sedequías runaca, Jeremiastaca cashna nishpa, pacalla juramenturca:

—Ñucanchiman cai almata cuj Mandaj Diosca, causajumbachami. Candaca, napacha huañuchishachu. Canda huañuchingapaj munanajuj chai runacunapaj maquipipash, napacha churashachu— nircami.

17Shina nijpimi Jeremiasca, Sedequías runataca cashna nijurca:

—Tucuita Mandaj Dios, israelcunapaj Taita Diosca, cashnami nin: ‘Babilonia llactata jatun mandaj churashca mandajcunapajman canllata ucha rishpa japi tucushpaca causanguimi. Shinallata cai pueblopash, na rupachi tucungachu. Cambash, cambaj huasi ucu purapash causanguichimi.

18Ashtahuangarin Babilonia llactata jatun mandaj churashca mandajcunapajman, canllata japi tucungapaj na llujshijpica, cai puebloca caldeocunapaj maquipimi, churai tucunga. Paicunami, cai pueblotaca rupachinga. Cambash, paicunapaj maquimandaca, napacha pacajui ushanguichu’ ninmi— nijurcami.

19Shina nijpimi, jatun mandaj Sedequías runaca, Jeremiastaca cashna nirca:

—Caldeocunapajman rishca, Judá llacta runacunatami manllani. Paicunapaj maquipi ñucata churajpica, na cazushpa asishpami llaquichihuanga— nircami.

20Shina nijpimi Jeremiasca, cashna nijurca:

—Na paicunapaj maquipi churangachu. Cunanga, Mandaj Dios rimashcata ñuca villajta ali uyai. Chaita uyashpaca, na imapash tucunguichu, alimi causangui.

21Ashtahuangarin canllata na paicunapaj maquipi japi tucujpica, cashna tucunatami villahuarca:

22‘Ricui, Judá llactata jatun mandajpaj huasipi puchushca tucui huarmicunami, Babilonia llactata jatun mandaj churashca mandajcunapajman llujchishpa apai tucunga. Chai huarmicunallatami, cashna ninajunga: Cambaj cumbacunallatami, candaca umachishpa mishashca. Paicunaca, cambaj chaquita turupi pambanshna saquishpaca, huashaman tigrarcallami ninajungami.

23Cambaj tucui huarmicunata, huahuacunatami, caldeocunaca caimanda llujchishpa apanga. Cambash, paicunapaj maquimandaca napacha pacajui ushanguichu. Ashtahuangarin Babilonia llactata jatun mandajpaj maquipimi, prezu japi tucungui. Cai pueblopash, rupachi tucungami’ nishpami villahuarca— nijurcami.

24Shina villajpimi Sedequías runaca, Jeremiastaca cashna nijurca:

—Cai shimicunataca, pipash ama yachachun. Pipash na yachajpica, na huañunguichu.

25Imashpapash ñuca canhuan parlanajushcata mandajcuna yachashpa, cambajman shamushpaca, cashnami tapunga: ¿Cunanga, imatapash ama pacashpa villai. Jatun mandajhuanga, ¿imatata parlajurcangui, jatun mandajca candaca imata nirca? Chaita villajpica, na huañuchishunllu’ ninajungami.

26Shina nijpica, cashna ningui: ‘Ama Jonatanbaj huasiman tigrachihuaichu. Chaipi huañungapaca, na munanichu nishpallami, jatun mandajtaca mañajurcani’ ningui— nijurcami.

27Chai jipaca, tucuilla mandajcuna shamushpami Jeremiastaca, imata parlanajushcata tapuchinajurca. Paicuna tapuchijpica, Jeremiasca jatun mandaj yachachishcashnami tigrachirca. Chaita tigrachijpimi, Jeremiastaca saquishpa rinajurca. Jatun mandajhuan Jeremías imata parlanajushcataca, pipash na yacharcachu.

28Shinami Jeremiasca, Jerusalén pueblota caldeocuna japingacaman, chai prezuna huasi patiopi tiajurca. Jerusalenda mishashpa japinajushca punllapica, chaipimi carca.