2 REYES 15 - Quichua Imbabura Bible

Azarías shuti runami mandajushca(2 Crón. 26:3-5,16-23)

1Israel llactata jatun mandaj Jeroboam shuti runaca, ishcai chunga canchis huatata ña mandajujpimi, Judá llactata jatun mandaj Amasías shuti runapaj churi Azariasca, mandai callarirca.

2Azariasca, chunga sucta huatata charishpami, mandai callarirca. Paica, picha chunga ishcai huatatami, Jerusalenbi mandajurca. Paipaj mamaca, Jerusalenmanda Jecolías shutimi carca.

3Azariasca, Mandaj Diospaj ñaupajpica, paipaj taita Amasías tucui alicunata rurashpa causashcashnallatami, alitalla rurajurca.

4Tucuita chashna rurashpapash, lomacunapi altarcunataca na anchuchircachu. Chai altarcunapimi, gentecunaca animalcunata huañuchishpa, inciensotapash cushnichishpa catinajurca.

5Ashtahuangarin Mandaj Diosca, jatun mandajtaca lepra ung:uihuanmi llaquichijurca. Paica, pai huañuna punlla chayangacamanmi, chai lepra ung:uihuanga, shuj huasipi pailla causajurca. Mandana huasipica, jatun mandajpaj churi Jotam shuti runami, gentecunata mandashpa tiajurca.

6Azarías runa imatalla ashtahuan rurashcacunapash, tucui imatalla rurashcapash, ¿nachu Judá llactata jatun mandajcuna imatalla rurashcacunata escribishca libropi tiajun?

7Azarías runa huañushpa, paipaj ñaupa taitacunahuan tandanajujpica, paipaj ñaupa taitacunata pambashca ladopillatami, Davidpaj pueblopi pambarca. Paipaj randica, paipaj churi Jotam shuti runami mandajurca.

Zacarías runami mandajushca

8Judá llactata jatun mandaj Azariasca, quimsa chunga pusaj huatata ña mandajujpimi, Jeroboam runapaj churi Zacariasca, Israel llactata mandai callarirca. Paica, sucta quillatallami mandajurca.

9Paica, paipaj ñaupa taitacuna nalicunata rurashcashnallatami, Mandaj Diospaj ñaupajpica, nalita rurajurca. Paipash, Nabat shuti runapaj churi Jeroboam runa, israelcunata juchacunata rurachishcatallatami rurashpa catijurca. Chai juchacunamandaca, na anchurircachu.

10Zacariastaca, Jabes shuti runapaj churi Salum shuti runami, shujcunahuan pacalla parlarishpa, paipaj gentecunapaj ñaupajpi chugrichishpa huañuchirca. Chashna huañuchishpami, paipaj randica paillata mandai callarirca.

11Zacarías imatalla ashtahuan rurashcacunaca, Israel llactata jatun mandajcuna imatalla rurashcacunata escribishca libropimi tiajun.

12Mandaj Diosca, cai shimicunatami Jehú shuti runaman cashna nishca carca: “Cambaj huahuacunaca, chuscu miraicamanmi, Israel llactataca mandashpa tianajunga” nishcami carca. Chashna nishca shimicunami pactarca.

Salum shuti runami mandajushca

13Judá llactata, jatun mandaj Uzías shuti runaca, quimsa chunga iscun huatata ña mandajujpimi, Jabes shuti runapaj churi Salum shuti runaca, Israel llactata mandai callarirca. Paica, shuj quillatallami Samaria pueblopi mandajurca.

14Gadi shuti runapaj churi Manahem shuti runaca, Tirsa shuti pueblomanda Samaria pueblomanmi vichai shamurca. Jebes runapaj churi Salum shuti runataca, chai Samaria pueblopimi chugrichishpa huañuchirca. Chashna huañuchishpami, paillata paipaj randi mandajurca.

15Salum shuti runa ashtahuan imatalla rurashcacunapash, Zacariasta huañuchingapaj huashalla shujcunahuan parlarishcapash, Israel llactata jatun mandajcuna imatalla rurashcacunata escribishca libropimi tiajun.

16Manahem shuti runaca, Tifsa shuti pueblopi tucui imalla tiashcacunatapash, chai pueblopi causaj tucui gentecunatapashmi aparca. Tirsa shuti pueblomanda callarishpaca, Tifsa shuti pueblo muyundipi tiaj pueblocunamandapashmi quichushpa aparca. Chai pueblo pungucunata na pascashcamandami, chashna quichushpa aparca. Shinallata chaipi causanajuj vijsayu tucuilla huarmicunatapashmi, vijsata pascashpa huañuchirca.

Manahem shuti runami mandajushca

17Judá llactata jatun mandaj Azariasca, quimsa chunga iscun huatata ña mandajujpimi, Gadi shuti runapaj churi Manahem shuti runaca, Israel llactata mandai callarirca. Paica, chunga huatatami Samaria pueblopi mandajurca.

18Paica, Mandaj Diospaj ñaupajpica, nalita rurashpami causajurca. Nabat shuti runapaj churi Jeroboam runa, israelcunata juchacunata rurachishca chai juchacunataca, paipaj tucui causaipi na saquircachu.

19Shinallata Asiria llactata jatun mandaj Pul shuti runami, Israel llactapi macanajungapaj shamurca. Chaimandami Manahem runaca, shinllitapacha mandangapaj ayudachun, jatun mandaj Pul runaman sucta patsaj pusaj chunga quintal culquita curca.

20Manahem shuti runaca, Israel llactapica ushaita tucui charijcunata, ninan charij runacunatami, chai culquita cuchun mandashpa japirca. Asiria llactata jatun mandajman cungapaca tucuicunatami, chaupi kilo yalita pezaj culquita cuchun mandarca. Chai culquita cujpica, Asiria llactata jatun mandajca, Israel llactapica na ashtahuan shuyashpa rircallami.

21Manahem shuti runa ashtahuan imatalla rurashcacunapash, tucui imatalla rurashcapash, ¿nachu Israel llactata jatun mandajcuna imatalla rurashcacunata escribishca libropi tiajun?

22Manahem shuti runa huañushpa, paipaj ñaupa taitacunahuan tandanajujpica, paipaj randica, Pekaía shuti paipaj churimi mandajurca.

Pekaía shuti runami mandajushca

23Judá llactata jatun mandaj Azariasca, picha chunga huatata ña mandajujpimi, Manahem shuti runapaj churi Pekaía shuti runaca, Israel llactata mandai callarirca. Paica, ishcai huatatami Samaria pueblopi mandajurca.

24Paica, Mandaj Diospaj ñaupajpica, nalita rurashpami causarca. Nabat shuti runapaj churi Jeroboam runa, israelcunata juchata rurachishcatallatami rurashpa catijurca. Chai juchacunamandaca, na anchurircachu.

25Pekaía shuti runataca, paipaj soldadocunata mandaj Peka shuti runami, shujcunahuan pacalla parlarishpa, Samaria pueblopillata mandana huasipi huañuchirca. Peka shuti runaca, Remalías shuti runapaj churimi carca. Paica, Argob shuti, Arie shuti runacunahuan, Galaad llactamanda picha chunga runacunahuan, cumba tucushpami huañuchirca. Chashna huañuchishpaca, paimi Pekaía shuti runapaj randi mandajurca.

26Pekaía shuti runa ashtahuan imatalla rurashcacunapash, tucui imatalla rurashcapash, Israel llactata jatun mandajcuna imatalla rurashcacunata escribishca libropimi tiajun.

Peka shuti runami mandajushca

27Judá llactata jatun mandaj Azarías shuti runaca, picha chunga ishcai huatata ña mandajujpimi, Remalías shuti runapaj churi Peka shuti runaca, Israel llactata mandai callarirca. Paica, ishcai chunga huatatami, Samaria pueblopi mandajurca.

28Paica, Mandaj Diospaj ñaupajpica, nalita rurashpami causajurca. Nabat shuti runapaj churi Jeroboam runa, israelcunata juchacunata rurachishca chai juchacunamandaca na anchurircachu.

29Israel llactata jatun mandaj Peka shuti runa mandajui huatacunami, asiriocunata jatun mandaj Tiglat-pileser shuti runa shamushpaca, Ijón, Abel-bet-maaca, Janoa, Cedes, Hazor shuti pueblocunata, Galaad, Galilea, Neftalí shuti tucui llactacunata quichushpa, chaipi causajcunatapash Asiria llactaman prezu aparca.

30Ela shuti runapaj churi Oseas runaca, shujcunahuan pacalla parlarishpami, Remalías shuti runapaj churi Peka shuti runataca chugrichishpa huañuchirca. Peka shuti runata huañuchishpaca, paimi Peka shuti runapaj randi mandajurca. Uzías runapaj churi Jotam shuti runa ishcai chunga quimsa huatata Judá llactata ña mandajujpimi, chashna tucurca.

31Peka shuti runa ashtahuan imatalla rurashcacunapash, tucui imatalla rurashcapash, Israel llactata jatun mandajcuna imatalla rurashcacunata escribishca libropimi tiajun.

Jotam shuti runami mandajushca(2 Crón. 27:1-9)

32Remalías shuti runapaj churi Peka shuti runaca, ishcai huatata Israel llactata ña mandajujpimi, Uzías runapaj churi Jotam shuti runaca, Judá llactata mandai callarirca.

33Paica, ishcai chunga picha huatata charishpami, mandai callarirca. Paica, chunga sucta huatatami, Jerusalenbi mandajurca. Paipaj mamaca, Sadoc shuti runapaj ushi Jerusa shutimi carca.

34Jotam shuti runaca, Mandaj Diospaj ñaupajpica, paipaj taita Uzías tucui alicunata rurashpa causashcashnallatami alitalla rurajurca.

35Tucuita chashna rurashpapash, lomacunapi altarcunataca, na anchuchircachu. Chai altarcunapimi, gentecunaca animalcunata huañuchishpa, inciensotapash cushnichishpa catinajurca. Paimi, Mandaj Diospaj huasipica ashtahuan jatun punguta rurachirca.

36Jotam shuti runa ashtahuan imatalla rurashcacunapash, tucui imatalla rurashcapash, ¿nachu Judá llactata jatun mandajcuna imatalla rurashcacunata escribishca libropi tiajun?

37Jotam shuti runa mandajui huatacunapimi Mandaj Diosca, Judá llactapi causajcunata fiñashpa llaquichinajuchun, Siria llactata jatun mandaj Rezín shuti runata, Remalías shuti runapaj churi Peka shuti runata cachai callarirca.

38Jotam runa huañushpa, paipaj ñaupa taitacunahuan tandanajujpica, chai taitacunata pambashca ladopillatami, paipaj taita Davidpaj pueblopi pambarca. Paipaj randica, Acaz shuti paipaj churimi mandajurca.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help