PROVERBIOS 20 - Quichua Imbabura Bible

1Vinoca, na cazushpa asichunmi ruran.

Sidrapash, ninanda caparishpa rimachunmi ruran.

Chaicunahuan machashpa pandarij runaca,

na alipacha yachajushcachu.

2Jatun mandaj ninanda fiñarishpaca,

león huacanshnami manllachin.

Ñapash fiñarishpaca, paillatami juchata ruran.

3Fiñanajunata saquij runaca, alicachi tucunmi.

Ashtahuangarin juizu illajcunaca,

tucuicunami chai fiñanajuipi yaicun.

4Imata ruranatapash na munaj runaca,

tamiajunmi nishpami na yapun.

Chai runaca, cozechana punllapi

mañashpapash, imatapash na taringachu.

5Shungupi charishca yuyaicunaca,

ucu ucucaman yacushnami.

Ashtahuangarin ali yachajushca runallami,

chaitaca taringa.

6Taucacunami, alitami ruranchi nirinajun.

Ashtahuangarin na llullaj runataca, ¿pita taringayari?

7Imatapash cashcatapacha ruraj runaca,

ima nalitapash na ruranllu.

Paipaj jipaca, huahuacunapash cushijushcami causan.

8Aliguta ricushpa mandangapaj tiarinapi tiarij

jatun mandajca, tucui nalita rurashcataca ñavi

ricuihuanllatami llujchishpa cachanga.

9¿Pita: “Ñuca shungupica, mapa illajmi cani.

Ñami jucha illaj cani” ni ushangayari?

10Nali pezanatapash, nali medinatapash,

ishcanditallatami Mandaj Diosca millanayachin.

11Alita rurajtapash, na mapata rurashpa,

aligutalla rurajtapash huambrara cajpillata ricunallami.

12Ricuj ñavitapash, uyaj rinritapash,

ishcanditallatami Mandaj Dios churashca.

13Ama imagupash illaj causangapaca,

puñuitaca na juyanachu cangui.

Puñuita saquishpa ñavita pascashpaca, na ushajtami micungui.

14Randij runaca: “Nalichu, nalichu” ninllami.

Ashtahuangarin ña ricushpaca, alicachirishpami cushijun.

15Oropash, punchapamba juyailla ashtaca rumicunapashmi tian.

Ashtahuangarin aligutapacha yarishpa parlajcunapaj

shimica, juyaillaguta rurashca oroshnami.

16Na rijsishca runapaj garante

tucuj runapaj churajunata japinguilla.

Na rijsishcacunapaj garante tucuj runapajtaca,

imatallapash prenda japingui.

17Umachishpalla micunata japij runapaca, mishquillagumi.

Ashtahuangarin chai jipaca, cascajo rumicunata

shimipi jundachishcashnami canga.

18Imata yarijushcapash, aliguta yarichishcahuanmi

ali llujshin.

Alipacha yachajushca yuyaihuan mandashpami,

jatun macanajuitapash ruran.

19Imatapash parlajlla runaca,

na parlanallatapash parlanllami.

Shina jallu cacharishca runahuanga, ama tandanajunguichu.

20Paipaj taitata, na cashpaca paipaj mamata,

ima llaquipash japishpami ali canman nij runaca,

manllanayai yana yana tutapi lámpara

micha huañunshnami tucunga.

21Callaripi ñapash muspaita japishpa charishcacunaca,

jipamanmi na bendiciai tucunga.

22Ama: “Ñucapash llaquichishapachami” ninguichu.

Ashtahuangarin Mandaj Diostalla shuyangui, paimi quishpichinga.

23Nali pezanacunataca, Mandaj Diosca millanayachinmi.

Nali pezaj balanzaca, napacha alichu.

24Gentecunapaj causaica, Mandaj Diospajmi.

Runaca, paipaj causaitaca, ¿imashnata yachangayari?

25Diosman imagutapash carashami nishpa,

ñapash ari nishca jipara aliguta yarinaca,

runapaca lazupi japi tucunashnami.

26Alipacha yachajushca jatun mandajca,

Diosta na manllajcunataca huairachinshna,

ruedacunahuan llapichinshnami llaquichin.

27Runapaj espirituca, Mandaj Dios cushca lamparashnami.

Chaimandami, ñucanchi shungu ucupi

ima yuyai tiajtapash, callarishpa ricujun.

28Jatun mandajtaca llaquij canapash,

na llullaj canapashmi huacaichin.

Juyaj cashpallami, pai mandangapaj

tiarinataca shinllipacha charin.

29Chairalla viñaicunaca, shinllicuna

cashpami alicachirishpa purinajun.

Rucucunaca, ña rucuyashpami juyailla ricurinajun.

30Ninanda astishpa chugrichishcapash,

nalita ruraj runapaca jambimi.

Shinllita llaquichishcapash, shungumanda

mapa yuyaita anchuchinmi.