DANIEL 7 - Quichua Imbabura Bible

Chuscu animalcunatami, muscuipishna ricushca

1Babilonia llactata jatun mandaj Belsasar shuti runa mandashpa callarijui huatami Danielca, paipaj camapi sirijushpa, shuj muscuita charirca. Paipaj yuyaipica, muscuipishnami ricurca. Chai jipami chai muscushcamandaca, imata ashtahuan villanatalla escribishpa churarca.

2Danielca, cashnami nirca: “Ñucaca, tutami muscuipishna cashnata ricujurcani: Jahua pacha chuscundi ladomanda huaira ñapash shamushpami, mama cuchataca ninanda cuyuchijurca.

3Chaita ricujujpica, caishujpash chaishujpash shuj shuj chuscu animalcunami, mama cuchamandaca llujshirca.

4Punda ricurij animalca, leonshnallami carca. Chaica, jatun angapaj alastashnallapashmi charirca. Chaita ñuca ricujujpillatami, paipaj alastaca aisashpa fitirca. Chai jipaca, alpamanda jatarichishpami, shuj runatashna ishcai chaquihuanlla shayachirca. Paimanga, gentepaj shungutami curca.

5Jipa ñapash ricurij animalca, ososhnallami carca. Chai animalca, shuj lado costillastaca, caishuj lado costillasta yali alsashcami shayajurca. Paipaj shimipica, quimsa costillastami quirucunahuan charijurca. Paitaca: ‘Jatari, ashtaca aichata micui’ nijmi uyarirca.

6Chai jipaca, leopardoshnalla animaltami ñapash ricurcani. Chai animalca, alasyu animalpaj alastashnami, chuscu alasta paipaj huashapi charirca. Chai animalca, chuscu umatami charirca. Mandana ushaitapash paimanmi curca.

7Chai jipaca, muscuipishna tuta ricujushpallatami, quimsapaj jipa shuj animaltapash, ñapash ricurcani. Chai animalca, jatun manllanayai, ninan millai, ninan shinllimi carca. Chai animalca, jatun jirru quirucunata charishpami, tucuillata ñutushpa micujurca. Puchushcataca, paipaj chaquihuanllatami sarujurca. Chai animalca, punda ricushca tucui animalcunamandaca, shujpachami carca. Shinallata chunga cachucunatapashmi charirca.

8Chai animalpaj cachucunata ñuca ricujujpillatami, chai cachu chaupicunamandaca, shuj uchilla cachu ñapash viñarca. Chai cachu viñashca ñaupajmandami, punda tiajushca cachucunamandaca, quimsa cachuta anchuchirca. Jipa viñashca cachuca, gentepaj ñavitashnami charirca. Shimitapash, manllanayai nali shimicunallata rimaj shimitami charirca.

9Ñuca ricujujpillatami, mandangapaj tiarinacunata churanajurca. Chaipica, unai unai huatacunata charij shuj Rucugumi tiarirca. Pai churajushcapash, rasushna yuraj yurajmi carca. Paipaj uma ajchapash, mapa illaj yuraj milmagushnami carca. Pai mandangapaj tiarinaca, rupajuj ninami carca. Chai tiarinapaj ruedacunapash, rupajuj ninallatami carca.

10Paipaj ñaupajmandaca, jatun yacushnami ninaca llujshijurca. Huaranga huarangacunami, paitaca servinajurca. Ashtahuan huaranga huarangacunami, paipaj ñaupajpi shayanajurca. Juez tiarijpica, librocunatami pascanajurca.

11Manllanayai nali shimicunata caparishpa, cachu rimajujta uyashpami, ñucaca ricujurcani. Shina ricujujpillatami, chai animaltaca huañuchishpa, paipaj aichataca ñutushpa, ninapi rupachijuchun cunajurca.

12Shinallata caishuj animalcunatapashmi, paicuna mandai ushanataca quichushca carca. Shina cashpapash chaicunataca, ashata causachun saquircarami.

13Muscuipishna tuta ricujushpallatami, Runa Aichayuman rijchajca, unai unai huatacunata charij Rucugupajman fuyupi ñapash jahua pachamanda shamujujta ricurcani. Paitaca, chai Rucugupaj ñaupajmanmi pushanajurca.

14Paipajman pushajpica, tucui gentecuna, tucui llactacuna, shuj shuj rimaita rimaj tucui runacuna paita servinajuchunmi, mandai ushanatapash, ninanda alicachi tucunatapash, mandana llactatapash paiman curca. Paipaj mandanaca, causaita causaicaman na tucurij mandanami, pai mandana llactaca napacha tucuchi tucungachu.

15Daniel ñucaca, chaicunata ricushpami, shungu ucupilla musparircani. Muscuipishna ñuca yuyaipi ricushcacunata yarishpami manllarircani.

16Chaimandami, chaipi shayanajuj puramanda shujpajman quimirishpaca, tucui chaicunaca imashnapacha cajta villahuai nircani. Chashna nijpimi, paica chaicuna ima cajtapash, cashna nishpa villahuarca:

17‘Cai chuscu jatun animalcunaca, cai pachapi mandangapaj shamuna chuscu jatun mandajcunatami ricuchijun.

18Paicunapaj jipami, mandana llactataca, jahua pachapi causajuj Diospajlla causajcuna japinga. Paicunaca, causaita causaicaman mandangapajmi, mandana llactataca japinga’ nihuarcami.

19Shinamandami ñucaca, quimsapaj jipa ricushca animalca imapacha cajta yachangapaj munarcani. Chai animalca, tucui caishuj animalcunamandaca, shujpachami carca. Chai animalca, manllanayai millai, jirru quirucunata, bronce sillucunata charij animalmi carca. Chai animalca, tucui imatapash ñutushpa micushpami, puchushcataca paipaj chaquihuanllata sarujurca.

20Shinallata paipaj umapi tiashca chunga cachucunamandapashmi yachangapaj munarcani. Chai cachu chaupicunamandaca, shuj uchilla cachumi viñashca carca. Chai cachupaj ñaupajmandaca, quimsa cachucunami urmashca carca. Chai cachuca, ñavitapash, manllanayai nali shimicunata rimaj shimitapashmi charirca. Chai cachuca, caishuj cachucunata yali jatunshnallami carca.

21Chai cachuca, Diospajlla causajcunahuan macanajushpaca, pai mishajtami ricurcani.

22Pai mishajujpimi, unai unai huatacunata charij Rucuguca chayamurca. Paimi, jahua pachapi causajuj paipajlla causajcuna llaquichinajuchun, ushaita curca. Diospajlla causajcunapaca, llactata mandangapaj japina huata pactajpimi japinajurca.

23Chaitaca, cashnami nihuarca: ‘Quimsapaj jipa animalca, quimsa jatun mandajcunapaj jipa, cai pachapi mandana llactatami ricuchijun. Chai mandanaca, chaishuj mandajcunamandaca, shujpachami canga. Tucui cai pachatami, trillanshna ñutushpa tucuchinga.

24Chunga cachucunaca, chai mandanamandaca chunga jatun mandajcuna mandanatami ricuchijun. Paicunapaj jipaca, shuj jatun mandajmi tiaringa. Paica, punda tiashca mandajcunamandaca shujpachami canga. Paimi, quimsa jatun mandajcunataca mishanga.

25Jahua pachapi causajuj Diostaca, nali shimicunahuanmi nalicachishpa rimanga. Shinallata jahua pachapi causajuj Diospajlla causajcunatapashmi, ninanda llaquichinga. Huatacunata, mandashcacunataca, shujman tigrachingapajmi munanga. Diospajlla causajcunaca, quimsa huata chaupicamanmi, paipaj maquipi churai tucushca canga.

26Ashtahuangarin Juez tiarishpami, pai mandanataca quichunga, paica causaita causaicaman llaquinayaita tucuchi tucushcami canga.

27Chaipica, llactata mandanatapash, jahua pacha ucuman tiaj llactacunatapash, jahua pachapi causajuj Diospajlla causajcunamanmi cunga. Pai mandana llactaca, causaita causaicaman mandana llactami canga. Paitaca, tucui mandajcunami cazushpa servinajunga’ nihuarcami.

28Pai villashca shimicunaca, caipillami tucurirca. Chaicunata uyashpami, Daniel ñucaca yuyaipi musparishpa, ñuca ñavipash shuj tucurcani. Ashtahuangarin tucui chaicunataca, ñuca shungupillami charircani” nircami.