Psalms 62 - Quichua Imbabura Bible

Taita Diospillami pacajunaca tianCandajcunata mandaj Jedutún candachijuchun, David rurashca Salmomi.

1Ñuca almaca, Taita Diospillami saman.

Paimandami, ñuca quishpirinaca shamun.

2Paillami, ñuca jatun Rumishnapash,

ñucata quishpichijpash.

Paica ñuca pacajunami.

Na yapa lluchashpa urmashachu.

3Cangunaca, ¿ima horascamanda shuj runataca,

urmanalla shuj pirca llapigrijunshna,

shuj muyundi jarcashca pata llapigrijunshna,

llaquichinatalla yariashpa causagringuichi?

4Alipi tiajujmandapash anchuchinata

yariashpami causanajun.

Llullanatallami juyanajun.

Shimihuanga alicachinajunmi.

Ashtahuangarin shungupica, ima llaquipash

japishpaca alichari canman

yashpami purinajun. Selah

5Ñuca almaca, Taita Diospillami saman.

Paitallami shuyashpa causani.

6Paillami, ñuca jatun Rumishnapash,

ñucata quishpichijpash.

Paica, ñuca pacajunami,

na lluchashpa urmashachu.

7Taita Diospimi, ñuca quishpirinapash,

ñuca alicachi tucunapash.

Taita Diosmi, ñuca jatun shinlli

Rumishnapash, ñuca pacajunapash.

8Gentecuna, tucui huatacuna paitalla shuyaichiyari.

Paipaj ñaupajpica, tucui shungu mañaichiyari.

Taita Diosmi, ñucanchi pacajuna. Selah

9Huañuna aichayu runacunapaj miraicunaca

yangallapachami, runacunapaj miraicunaca llullami.

Balanzapi tucuillata tandachishpa pezajpica,

imapash na canmanllu.

10Shujcunata ninandapacha llaquichinatapash,

macashpa shuhuanatapash na yariashpa

causanachu canguichi.

Chashna rurashpara, yanga tucunguichiman.

Canguna charishcacuna ashtahuan mirajpipash,

na chaitalla yarianachu canguichi.

11Shuj viajemi, Taita Diosca cashna rimarca.

Chashna rimajtaca, ishcaicamanmi uyarcani:

“Ninan ushaica, Taita Diospajmi.

12Jatun Diospaj llaquinaca, cambajmi.

Canmi, tucuicuna imatalla rurashcamandaca,

paicuna japina cashcatapachata cungui” nijtami uyarcani.