Psalms 89 - Quichua Imbabura Bible

Taita Diosca, Davidhuanmi ari nishcaYachachingapaj ezraíta nishca Etán shuti runa rurashca Salmomi.

1Ninanda llaquij Mandaj Diostaca,

tucui causaicamanmi candajusha.

Can imata rurasha nishcata pactachishcataca,

mirai miraicunacamanmi, ñuca shimihuan villajusha.

2Ñucaca cashnami nijurcani:

“Can llaquinaca, causaita causaicaman

shayachinami canga.

Can na llullaj canatapash, jahua pachapillatami

shinllitapacha churangui” nircanimi.

3Canga cashnami nishcangui:

“Ñuca agllashpa churashca mandajhuanmi ari nijurcani.

Ñucata servij Davidmanmi, cashna nishpa juramenturcani:

4‘Cambaj miraicunataca, tucui causaipajmi

shinllitapacha churasha.

Can mandangapaj tiarinatapash, tucui miraipajmi

churasha’ nircanimi” nishcanguimi. Selah

5Mandaj Dioslla, juyaillacunata can

rurashcamandaca, jahua pachapash cushijungami.

Can na llullanapash, jucha illajcunapaj

tandanajuipimi canga.

6Jahua pachapica, ¿pita Mandaj

Dioshuanga chimbapurangayari?

Diospaj churi puracunapica, Mandaj Dioshuan

chimbapurangapaca, ¿pita tiangayari?

7Jucha illajcuna tandanajushcapi, manllana Taita Diosmi.

Paipaj muyundipi tucui ima tiajcunapash,

ninanda manllana Diosmi.

8Tucuita Mandaj Taita Dioslla,

¿pita canshnaca tiangayari?

Ninan ushaita charij Mandaj Diosmi cangui.

Can imatalla rurasha nishcata pactachishcacunaca,

cambaj muyundipimi tiajun.

9Mama cucha ninanda fiñarishcataca,

canmi mandai ushangui.

Yacucuna jatarijujtapash, canga

casilla saquichinguillami.

10Canmi, Rahab shuti llactatapash huañunatashna

chugrichishpa llaquichircangui.

Canda fiñajcunataca, ninan ushaita charij

cambaj rigrahuanmi caiman chaiman cacharcangui.

11Jahua pachaca cambajmi, cai pachapash cambajmi.

Cai pachatapash, chaipi tucui imalla

tiajcunatapash, can churashpami callarichircangui.

12Vichai ladotapash, urai ladotapash canmi rurarcangui.

Tabor shuti, Hermón shuti urcucunapash,

cambaj shutipimi candanajunga.

13Cambaj rigrami, ninan ushaita charin.

Cambaj maquipash shinllipachami.

Cambaj ali lado maquica, alicachi tucushcami.

14Can mandangapaj tiarinaca, imatapash

cashcatapacha rurashpa, aliguta ricushpa

mandanami, callari rumishna shinllipacha tiajun.

Llaquij canapash, na llullaj canapash,

cambaj ñaupajpimi.

15Canda caparishpa mañanajuj gentecunaca,

ninandami cushijun.

Mandaj Dioslla, cambaj ñavi

punchayachijpimi purinajunga.

16Cambaj shutipimi, tucui punllacuna cushijunajunga.

Imatapash cashcatapacha can rurajpimi,

jatunyachi tucunga.

17Canmi, paicunapaj tucui ushaitaca punchayachijungui.

Cambaj ali juyaihuanmi, ñucanchi

mandanataca mirachingui.

18Mandaj Diosca, ñucanchi jarcarina escudoshnami.

Ñucanchipaj Jatun Diosca, israelcunapaj

jucha illaj Diosmi.

19Shina cashpami cambajlla runamambash,

muscuipishna cashna nishpa villarcangui:

“Shuj ninan ushaita charijpaj

jahuapimi, ayudanataca churarcani.

Ñuca agllashca puramandaca, shuj runatami

agllashpa jatumbi churarcani.

20Ñucata servij Davidtami tarircani.

Paitami, ñucapajlla aceiteta talishpa javircani.

21Ushaita charij ñuca maquipash,

tucui causaipimi paihuan canga.

Ñuca rigrapash, paitami shinllichinga.

22Paita fiñajpash, na cungashcapi japi ushangachu.

Nalita ruraj runapash, na mishangachu.

23Ashtahuangarin paipaj ñaupajpimi,

paita fiñajcunataca llaquichisha.

Paita millanayachij runacunataca chugrichishami.

24Ñuca na llullanapash, ñuca llaquinapash paihuanmi canga.

Ñuca shutipimi, paipaj ushaica

jatumbi churai tucunga.

25Shinallata mama cuchatapash, paipaj maquipimi churasha.

Jatun yacucunatapash, paipaj ali lado

maquihuanmi mandanga.

26Paica cashna nishpami, caparishpa mañahuanga:

‘Canga, ñuca Taitami cangui,

ñuca Taita Diosmi cangui.

Ñucata pacashpa quishpichij jatun

Rumishnami cangui’ nihuangami.

27Ñucapash paitaca, punda churishna cachunmi churasha.

Cai pachapi tiaj jatun mandajcunatapash,

yali jatun cachunmi rurasha.

28Paitaca, paipaj tucui causaipimi juyashpa charisha.

Ñuca paihuan ari nishcapash, shinllipachami canga.

29Paipaj miraitapash, causaita

causaicamanmi mandanapi churasha.

Pai mandangapaj tiarinapash, jahua pachashnami

causaita causana punllacunashna canga.

30Ashtahuangarin paipaj churicuna

ñuca mandashcata saquishpaca, ñuca

yachachishcashnaca na causangachu.

31Pactachinajuchun ñuca cushca shimicunata yangapi

churashpami, ñuca mandashcacunatapash na cazunga.

32Paicuna chashna na cazushcamandami,

varahuan llaquichisha.

Nalita rurashcamandaca, astishpami llaquichisha.

33Ashtahuangarin Davidta llaquinataca, napacha saquishachu.

Ñuca na llullashpa villashcataca, na huaglichishachu.

34Ñuca ari nishcataca, na cungashachu.

Ñuca shimihuan villashcacunatapash,

napacha shujman tigrachishachu.

35Ñucaca jucha illaj cashpami,

shuj viajella juramenturcani.

Davidtaca, napacha llullashachu.

36Paipaj miraicunapash, causaita causaicamanmi causanga.

Paicuna mandangapaj tiarinapash,

ñuca ñaupajpica indishna causajungallami.

37Lunashnami, tucui causaicaman shinllipacha tiajunga.

Jahua pachapica, na llullashpa

villaj runashnami tiajunga” nircanguimi. Selah

38Ashtahuangarin canllatami, aceiteta talishpa

javishca cambaj jatun mandajtaca,

yangapi churashpa shitashcangui.

Canllatami paihuanga fiñarishcangui.

39Canda servijhuan ari nijushcataca faquishcanguimi.

Paipaj coronataca, alpapi shitanshnami

yangapi churashcangui.

40Tucui pueblo muyundi pircacunatami t'unishcangui.

Shinlli torrecunatapashmi urmachishcangui.

41Ñanda yalijcunaca, tucuicunami shuhuashpandi yalinajun.

Ladollapi causajcunapash, nalicachishpami rimanajun.

42Ashtahuangarin paita fiñajcunapaj ali lado

maquitarami, ashtahuan shinllichishcangui.

Paita tucui na ricunayachij

runacunatarami cushichishcangui.

43Paipaj espadataca, filo illajtami rurashcangui.

Jatun macanajuipipash, na ayudashcanguichu.

44Pai juyailla cajtaca tucuchircanguimi.

Pai mandangapaj tiarinataca, alpapimi shitarcangui.

45Chairalla viñai cashpa, pai causajushca

punllacunatapashmi quichijiyachishcangui.

Rimashpa pingaichishcahuanmi,

quilpashcatashna saquishcangui. Selah

46Mandaj Dioslla, ¿ima punllacamanda

ñucanchimanda pacajushcalla cagringui?

¿Ñucanchihuanga, nina rupajunshnachu fiña cagringui?

47Ñuca causai huatacuna ñapash yalijujtaca yaripairi.

Huañuna aichayu tucui runacunataca,

¿imashpashi yanga rurarcangui?

48¿Maijan runashi, huañuita na ricushpa causajungalla?

Seolpaj ushaimandaca, ¿pita cacharichingayari? Selah

49Jatun Dioslla, ¿ñaupa punllacunashna

can ninanda llaquinaca maipitayari?

Can llaquinataca can na llullaj cashpami,

Davidman juramenturcangui.

50Jatun Dioslla, canda servijcunata

nalicachishpa rimanajushcataca yaripairi.

Ashtaca gentecuna nalicachishpa

rimashcatami, ñuca shungupi charini.

51Mandaj Dioslla, canda fiñajcunaca,

pai alicachi tucushcatami huaglichinajurca.

Canda fiñajcunaca, aceiteta talishpa javishca

cambaj jatun mandaj alicachi tucushpa

purijujtami huaglichinajurca.

52Mandaj Diosca, causaita causaicaman

alicachi tucushca cachun.

Shina cachun. Shina cachun.