JEREMÍAS 13 - Quichua Imbabura Bible

Ismushca chumbishna cajtami ricuchishca

1Mandaj Diosca, cashnami nihuarca: “Lino puchata rurashca huatarina chumbita randingapaj rishpa, cinturaspi chumbilingui. Chai chumbitaca, ama yacupi satinguichu” nihuarcami.

2Shina nijpica, Mandaj Dios mandashcashnallatami, shuj chumbita randishpa, cinturaspi chumbilircani.

3Mandaj Diosca, cutinllatami ñucataca cashna nihuarca:

4“Cunanga, can randishca chumbita japishpa, cambaj cinturasmanda pascari. Shinallata Eufrates jatun yacuman jatarishpa ri. Chaiman chayashpaca, rumi jaca utujupi pacangui” nihuarcami.

5Shina nijpimi, Mandaj Dios mandashcashnallata, Eufrates yacu manñaman rishpa pacarcani.

6Ña tauca punllacuna yalijpimi, Mandaj Diosca cashna nihuarca: “Jatarishpa, Eufrates yacu manñaman ri. Ñuca chaipi pacachun mandashca chumbita apamugri” nihuarcami.

7Shina nijpimi, Eufrates yacu manñaman rishpa, pacashca pushtuta allashpa, chai chumbita japircani. Chai chumbica ña ismushca, imapajpash na valijmi carca.

8Shinamandami Mandaj Diosca, cashna nihuarca:

9“Mandaj Dios ñucami, cashna nini: ‘Judá llactapi causajcuna jariyashpa jatun tucushcatapash, Jerusalenbi causajcuna ninanda jariyashcatapash, cai chumbita ismuchinshnallatami tucuchigrini.

10Cai nali gentecunaca, ñuca yachachishca shimicunata na uyangapaj munanllu. Paicunapaj shungu yarishcatallami rurashpa causanajun. Shuj dioscunata servishpa, paicunapaj ñaupajpi cunguringapajllami catinajun. Chaimandami, cai ismushca chumbishna, imapajpash na valij tucunga.

11Imashnami runaca, chumbita paipaj cinturaspica shinllita huatarin, chashnallatami tucui israelcunatapash, Judá llactapi tucui causajcunatapash, ñucapajman tandachircani. Ñuca agllashcacuna cachun, ñuca jatun Dios cajta rijsichinajuchun, ñucata alicachinajuchun, ñucata jatunyachinajuchunmi tandachircani. Ashtahuangarin paicunaca, na cazurcachu’ ninmi Mandaj Diosca.

Vino junda funducunata ñutushpami ricuchishca

12Cai shimicunataca, cashna nishpa villangui: Israelcunata Mandaj Taita Diosca, cashnami nin: ‘Tucuilla fundupimi, vino junda canga’ ninmi ningui. Shina nijpimi paicunaca: ‘Tucuilla fundupi vino jundanataca, ¿nachu yachanchi?’ ninajunga.

13Shina ninajujpica, cashna ningui: Mandaj Diosca, cashnatapashmi nin: ‘Ricuichi, ñucaca cai llactapi tucui causajcunatami ninanda machachigrini. David tiarinapi tiarishpa mandajuj, paipaj mirai jatun mandajcunamanda callarishpa curacunatapash, villajcunatapash, Jerusalenbi tucui causajcunatapashmi machachigrini.

14Paicunataca, pai purallata macanajuchishpami llaquichigrini. Taitacunapash, churicunahuanmi randimanda llaquichirinajunga. Paicuna nalita rurashcataca na cungashpa, na llaquishpa, na juyashpami, tucuillata tucuchisha’ ninmi Mandaj Diosca, nishpa villai” nihuarcami.

Judá llactapi causajcunaca, prezu apai tucungami

15Na jariyashpa, aligutapacha uyaichiyari. Mandaj Diosmi, cangunataca rimajun.

16Cangunaca, nara yana yana tutata rurajpillata, cangunapaj chaquipash nara yana yana urcucunapi nitijashpallata, cangunata Mandaj Taita Diostaca, punchapambagumi cangui nichiyari. Cangunaca, punchapamba michatami shuyanajunguichi. Chaita ruranapaj randica, huañui japinalla yana yana tutapimi churanga.

17Ashtahuangarin canguna caita na uyajpica, canguna jariyashpa jatun tucushcamandaca, ñuca shungu ucupillami pacalla huacasha. Mandaj Diospaj llamacunata prezu apashcamandami, jatun llaquihuan ñuca ñavimanda viquipash ninanda shutungacaman huacajusha.

18“Jatun mandajtapash, jatun mandajpaj mamatapash cashna ni: ‘Canguna juyailla cajta ricuchij coronaca, cangunapaj umamanda urmashcami. Chashna cashcamandaca pingai tucushpa, alpapi tiarichiyari’ ni.

19Neguev shuti pambapi tiaj pueblocunata vichashpa saquijpimi, chaicunata pascangapaca pipash na tiarca. Judá llactapi causajcunapash, tucuicunami prezu apai tucurca. Paicunataca, shujllatapash na saquishpami apanajurca.

20Jahua lado llactamanda shamujcunata vichai ricuichiyari. Juyailla llama canllatami, canman curcani. ¿Chai llamacunaca maipitayari?

21Canda umashna mandachunga, can yachachijushca cambaj cumbacunatallata churajpica, ¿imatashi ninguiman? ¿Nachu candaca, huahuata ungugrijuj huarmitashna nanai japinman?

22Cambaj shungupica: ‘¿Imamandata cai tucui llaquicunaca japihuanyari?’ yanguipashchari. Can yapa nalicunata rurajushcamandami, can churajushcacunapash na quilparca. Chaqui talonbashmi, lluchulla purijurcangui.

23¿Etiopía shuti llactamanda yana runaca, yurajyai ushangachu? ¿Leopardo animalpash, muru cara cashcamanda shujman tigrai ushangachu? Chashnallatami cangunapash, nalita rurashpa yacharishca cashcamandaca alita ruraitaca, napacha ushanguichi.

24Shinamandami paicunataca, jichushca pambamanda huairapi shamuj jupatashna, caiman chaiman cachagrini” ninmi.

25Mandaj Diosca, cashnatapashmi nin: “Ñucaca, chai llaquitami, canman alichishca charijuni. Can ñucata cungashpa, llullatara yariashpa causajushcamandaca, can japina cashcataca chaitallatami cusha.

26Ñucami, cambaj ninan pinganayai ricurichunga, cambaj ñaupaj lado churajunata llatanagrini. Chaipimi, ninan pinganayaita can purijushcapash ricuringa.

27Canga, cazarashca jahua shujcunahuan causashpami, huarmita munaj caballoshna, lomacunapi jarihuanlla causashpa jatun nalita rurarcangui. Pambacunapipash, jatun millanayaicunata rurajtami candaca ricurcani. ¡Aij, can Jerusalenlla! ¿Nachu mapa illaj tucugringui? ¿Ima horascamanda mapa illaj tucugringui?” ninmi.