1Mandaj Dioslla, candami caparijurcani,
ucha ayudahuayari.
Canda ñuca mañajujtaca uyahuayari.
2Ñuca mañajuj shimicunaca, inciensota
cushnichijpishna cambaj ñaupajman vichai ripachun.
Ñuca maquita vichai churashcapash, chishipi
imatalla canman carashcashna cachun.
3Mandaj Dioslla, ñuca shimipica, cuidajta churapairi.
Ñuca shimitaca, pungupi cuidanshna cuidahuayari.
4Ñuca shungupi nalicunatalla ashtahuan
yarijuchumbash, ama saquihuaichu.
Jatun nalita rurajcunahuan canda na manllashpa,
imatalla rurachumbash, ama saquihuaichu.
Paicunapaj jatun micuipi cushijuchumbash,
ama saquihuaichu.
5Imatapash cashcatapacha ruraj runa ñucata
llaquichishpaca, alichari canman.
Pai ñucata jarcashpa rimashcapash, bálsamo nishca
yuramanda juyailla aceiteshnami canman.
Paica, ñuca umataca na chugrichinmanllu.
Ashtahuangarin chai runacuna nalita rurashcata
fiñashpami, candaca mañajushalla.
6Paicunapaj juezcunaca, jatun rumicunapimi
jahuamanda shitai tucunga.
Na llullashpa rimashca
ñuca shimitami uyanajunga.
7Yapushpa alpata chaupijpishnami, ñucanchi
tullucunaca Seol punguman, caita chaita shitai tucushca.
8Mandaj Jatun Dioslla.
Chaimandami ñuca ñavihuanga, candalla chapariajuni.
Canda yariashpami causajurcani.
Ñuca almataca, ama jichushpa saquipaichu.
9Paicuna churashca lazucunapi
urmanamandaca huacaichihuayari.
Jatun nalita rurajcunapaj tugllapi
japi tucunamandapash huacaichihuayari.
10Canda na manllajcunaca, paicuna churashca
linllicunapillata, tucuilla urmangachu.
Ñucaca yalishpa rishallami.
Who We AreWhat We EelieveWhat We Do
2025 by iamachristian.org,Inc All rights reserved.
