EZEQUIEL 12 - Quichua Imbabura Bible

Ezequielca, isarelcuna prezu apai tucunatami ricuchishca

1Mandaj Diosca cai shimicunatami, cashna nishpa villahuarca:

2“Huañuna aichayu runa, canga na cazujcunapaj chaupipimi causajungui. Paicunaca, na cazujcuna cashpami, ñavita charishpapash na ricunajun. Rinrita charishpapash, na uyanajunllu.

3Shina cashcamanda, huañuna aichayu runa. Canga, apashpa rinata ucha quipishpa, paicuna ricunajujpillata punlla llujshishpa ringui. Can maipi causajushcamandaca, shuj ladoman paicuna ricujta yalingui. Chaita ricushpaca cazungapashchari. Paicunaca, na cazujcunami.

4Can imatalla charishcataca, prezu apai tucushpa apana quipitashna paicuna ricujta punlla llujchingui. Ashtahuangarin canga, prezu apai tucunshna, paicuna ricujta chishi llujshingui.

5Paicuna ricujta, patata utujushpa ñanda rurashpa chaita llujshingui.

6Imatalla apanataca rigrapi churashpa, paicuna ricujta apashpa, tuta llujchingui. Cambaj ñavitapash quilparingui, chai llactataca ama ricunguichu. Israelcunata, llaquichinata ricuchij cachunmi, candaca churarcani” nihuarcami.

7Ñucaca, pai mandashcashnallatami rurarcani. Prezu apai tucushpa apana quipitashnami, punlla llujchircani. Chishica, ñuca maquihuambacha patata utujushpami, ñanda rurarcani. Chai jipaca, paicuna ricujtami, quipita rigrapi churashpa, tuta llujshircani.

8Cayandi tutamandatami Mandaj Diosca, cai shimicunata cashna nishpa villahuarca:

9“Huañuna aichayu runa, chai na cazuj israelcunaca: ¿Nachu: ‘¿Imata rurajungui?’ nishpa tapurca?

10Paicunataca cashna ningui: Mandaj Diosca cashnami nin: ‘Cai villanaca, Jerusalenda mandajpash, chaipi causanajuj tucui israelcunapash, imalla tucunatami ricuchijun’ ningui.

11Shinallata ñucapachami, canguna imalla tucunataca ricuchijuni. Imashnami ñuca rurarcani, chashnallatami cangunapash tucunguichi. Cangunaca, huatashcashnami prezu apai tucunguichi.

12Paicunata mandajtapash rigra jahuapi churashpami, tuta llujchishpa apanajunga. Patata ñanda rurashpami, paitaca llujchinajunga. Chashna apajpimi, llactata ama ricungapaca, paipaj ñavitapacha quilparinga.

13Ashtahuangarin ñuca linllita paipaj jahuapi shitajpimi, ñuca tugllapi prezu urmanga. Shinamandami, caldeocuna causanajuj Babilonia llactaman apachun saquisha. Shina apajpimi cai llactata na ricushpa, chaipi huañunga.

14Paita ayudangapaj muyundi tucuilla shayanajuj gentecunataca, paipaj tucui soldadocunandimi, huairapi cachanshna caita chaita cachasha. Paicunataca espadahuanmi catisha.

15Tucui cai pachapi tiaj llactacunapi causajcunapajman, caita chaita maitapash cachajpimi ñucataca, Mandaj Dios cajta yachanajunga.

16Paicuna puramandaca huaquingunatallami, espadahuan, yarjaihuan, ung:uihuan huañunamanda quishpichisha. Maijan llactaman paicuna chayashpapash, tucui millanayaita paicuna ruranajushcata villanajuchunmi, chashna quishpichisha. Shina villajpimi ñucataca, Mandaj Dios cajta yachanajunga” nihuarcami.

17Mandaj Diosca, cai shimicunatami cashna nishpa villahuarca:

18“Huañuna aichayu runa. Cambaj micunataca, manllaihuan chujchushpa micuyari. Yacutapash, ninan munaihuan cashpapash, llaqui llaquilla ufiayari.

19Chai jipaca, Israel llactapi causajcunataca, cashna ningui: Mandaj Jatun Diosca, Jerusalenbi causajcunatapash, israelcunatapash cashnami nin: ‘Paicunaca, micunatapash manllaihuanmi micunajunga, yacutapash manllaihuanmi ufianajunga. Chaipi tucui causajcuna nalita rurashcamanda, paicunapaj llactamandaca tucui ima charishcacunatapash quichujpimi, chushajpacha tucunga.

20Pueblocunapash jichushcami tucunga, alpacunapash llaquinayaitami tucuchi tucunga. Shina rurajpimi ñucataca, Mandaj Dios cajta yachanajunga’ nishpa villai” nihuarcami.

21Mandaj Diosca, cai shimicunatami cashna nishpa villahuarca:

22“Huañuna aichayu runa. ¿Imata yarichijuj shimicunata charishpata, Israel llactapica: ‘Punllacunaca na ucha chayamunllu, muscuipishna ricushcacunapash chinganllami’ ninajunguichi?

23Shinamanda paicunataca, cashna ningui: Mandaj Jatun Diosca, cashnami nin: ‘Cai yarichijuj shimicunataca, chingachishami. Cai yarichijuj shimicunataca, Israel llactapica na ashtahuan rimanajungachu. Chai punllacunaca ñamari chayamushca, muscuipishna ricushcapash tucuimi pactamushca.

24Israel purapica, ima yangacunata muscuipishna ricunapash, yacharcanimi nishpa uyanayaita llullashpa parlanapash na ashtahuan tiangachu.

25Mandaj Dios ñucami rimasha. Ñuca rimashca shimicunaca pactangami. Na ashtahuan unayangachu, canguna causajui punllacunapillatami pactanga. Na cazujcunalla, ñuca rimashca shimicunaca pactangapachami’ ninmi Mandaj Jatun Diosca, nishpa villai” nihuarcami.

26Mandaj Diosca, cai shimicunatami cashna nishpa villahuarca:

27“Huañuna aichayu runa. Ricui candaca, israelcunaca cashnami ninajun: ‘Muscuipishna ricushpa cai runa villashcacunaca, cunanmanda ashtaca punllacuna jipami pactanga. Paica, jipa huatacunapi pactanatami villajun’ ninajunmi.

28Shina nijcunataca, cashna ni: Mandaj Jatun Diosca, cashnami nin: ‘Ñuca imatalla rimashca shimicunamandaca, na ashtahuan unayangachu. Ashtahuangarin imatalla ñuca rimashca shimicunaca pactangapachami’ ninmi Mandaj Jatun Diosca ni” nihuarcami.