1Israelcunalla, cangunatapash, Egipto llactamanda vichai pushamushca tucui cangunapaj familiacunatapash, Mandaj Dios fiñashpa rimashcata uyaichi. Paica cashnami nin:
2“Cai pachapi causaj tucui familia puramandaca, cangunatallami ñucapajlla causanajuchun agllarcani. Shina cashcamandami, tucui nalita canguna rurashcamandaca llaquichisha.
3Napash shujlla yuyai cashpata, ¿ishcandi tandanajushpa purinmanllachu?
4Sachapi leonga, ¿napash micuna tiajpita huacanmanllachu? Maltun leonbash, ¿utujupi napash ima aichata micujushpata huacanmanllachu?
5¿Alasyu animalcunaca, pipash na tugllata churajpita, japi tucungallachu? Pambapi tiajuj tugllapash, ¿na imapash yaicujpita, japingallachu?
6Pueblopi trompetata huacachijpica, ¿nachu gentecunaca manllarishpa caparinajunman? ¿Mandaj Dios na llaquichijpita, pueblopica ima llaquipash tiangallachu?
7Mandaj Jatun Diosca, pai ima nishcata villashpa paita servijcunaman, ima tucunatapash nara villashpaca, na llaquichingallachu.
8León huacajujta uyashpaca, ¿pita na manllangayari? Mandaj Jatun Dios rimajpica, ¿pita na villangayari?
Samaria llactataca tucuchingami9Asdod shuti pueblopi mandashpa tiajuna huasicunapi, Egipto llactapi mandashpa tiajuna huasicunapica, cashna nishpa villagrichi: ‘Samaria urcu jahuapi tandanajushpa, chai llactapi causajcuna yapa nalita ruranajujta ninanda llaquichishpa causanajujta ricugrichi’ ninmi.
10Paicunaca, imatapash alita ruranataca napacha yachanllu. Shujcunata macashpa imatapash quichushcacunatallami, mandashpa tiajuna paicunapaj huasicunapipash jundachinajun” ninmi Mandaj Diosca.
11Shina cashcamandami Mandaj Jatun Diosca, paicunataca cashna nirca: “Cangunata fiñajcunaca, cai llacta muyundi ladocunatami shamunajunga. Paicunaca, cambaj shinlli torretapash urmachishpami, mandashpa tiajuna cambaj huasicunamandapash, tucuita shuhuashpa apanga” ninmi.
12Mandaj Diosca, cashnatapashmi nirca: “Samaria pueblopi causaj israelcunaca, ñutulla tiarinacunapi, camacunapimi sirishpa chishanajun. Paicunaca, shuj michij llamata leonbaj shimimanda quichungapaj rishpa, ishcai chaquita, na cashpaca rinri pundatalla quichushcashnami quishpiringa” nircami.
13Tucuita Mandaj Diosca, cashnatapashmi nirca: “Uyaichi, Jacobopaj miraicunata llaquichinata villagrichi.
14Israelcuna ñucata na cazushcamanda llaquichijui punllapica, Bet-el shuti pueblopi tiaj altarcunatapashmi tucuchisha. Chai altar esquinacunapi tiaj cachucunatapash faquijpimi, alpaman urmanajunga.
15Shinallata tamia punllacunapi, rupai punllacunapi tiana huasicunatapashmi huaglichisha. Marfilta churashpa rurashca huasicunapashmi tucuringa. Ashtaca huasicunami, llaquinayaita tucuringa” nircami Mandaj Diosca.
Who We AreWhat We EelieveWhat We Do
2025 by iamachristian.org,Inc All rights reserved.
