JEREMÍAS 50 - Quichua Imbabura Bible

Babilonia llactata llaquichinatami villashca

1Caldeocuna causanajuj Babilonia llacta llaquichi tucunataca, Mandaj Diosmi pai ima nishcata villaj Jeremiashuan, cashna nishpa villachirca:

2“Llactacunapi yachachun villaichiyari. Banderacunatapash, ricunallapi shayachishpa, imatapash na pacashpa cashna villaichiyari: ‘Babilonia puebloca, shujpaj maquipi urmashcamari. Bel shuti diosca, pingai tucushcamari. Merodac shuti diospash, ñutui tucushcamari. Rumi dioscunapash, paicunapaj yanga dioscunapash, ñutui tucushcamari.

3Jahua lado llactamanda gentecunami, chai llactata llaquichingapaj vichai rirca. Paicunami chai llactataca, llaquinayaita tucuchishpa saquinga. Chaipi causangapaca, runacunapash, animalcunapash na tiangachu. Tucuicunami pacajushpa rinajurca’ nichiyari” nircami.

4Mandaj Diosca, cashnatapashmi nin: “Chai punllacunapica, chai huatacunapica israelcunapash, Judá llactamanda runacunapash tandanajushpami shamunga. Paicunaca, paicunata Mandaj Taita Diosta mascashpami, huacashpa purinajunga.

5Sion shuti puebloman tigrangapaj munashpami, maita rina ñanda tapunajunga. Paicunaca: Tandanajushpa jacuchi. Cunanga, causaita causaicaman shujlla yuyai tucushpa, ima horapash ama cungangapaj, Mandaj Dioshuan tandanajugrishunchi ninajungami.

6Ñuca agllashcacunaca, llama chingashcashnami. Paicunataca, michijcunallatami pandachinajurca. Paicunataca, urcucunapimi jichushpa saquirca. Shinamandami, shuj urcumanda caishuj lomaman yalishpa purinajushpallata, paicunapaj corraltapash cungarca.

7Tucui paicunata tuparijcunami langanshna tucuchinajurca. Paicunata fiñajcunaca, cashnami ninajurca: Paicunata huañuchishcamandaca, na juchayu tucushunllu. Paicunallatami, juchata rurashpa imatapash cashcatapacha ruraj Mandaj Diostaca na cazunajurca. Paicunapaj ñaupa taitacunata yariajlla causanajushpami, Mandaj Diostaca fiñachinajurca ninajurcami.

8Babilonia llacta chaupimandaca pacajushpa richiyari, caldeocunapaj llactamandaca llujshichiyari. Llamacunapaj ñaupajpi jatun jari chivo rijunshna caichiyari.

9Ñucami, jahua ladomandaca, Babilonia llactamanda ashtaca tandanajushca gentecunata vichai pushamugrini. Jahua lado llactamanda alichirishpa shamushpami, macanajushpa mishanga. Paicunapaj flechacunataca, macanajunata ali yachaj, ninan shinlli runashnami, shujllatapash na yanga shitanajunga” ninmi.

10Mandaj Diosca, cashnatapashmi nin: “Caldea shuti llactapi causajcunataca, tucui imatalla charishcatami macanajushpa quichunajunga. Paicunata tucui quichujcunaca, na munajtami micunajunga.

11Cangunaca, ñuca llactata tucuchishpaca, ninandami cushijurcanguichi. Llullu jihuaman huagra yaicushcashnami yaicurcanguichi. Caballocuna huacanajunshnami caparircanguichi.

12Shinamandami cangunapaj mamaca, ninanda pingai tucurca. Shinallata cangunata unguj mamapash, ninandami rimai tucushpa pingai tucurca. Ricuichi, chai llactaca, tucui llactacunamanda yali yangallami canga. Imapash illaj, chaquishca, jichushca urcu pambami tucunga.

13Mandaj Dios ninanda fiñarishpa llaquichijpimi, chaipica pillapash na causanga. Ashtahuangarin tucui chai llactaca, llaquinayaita tucuchi tucunga. Shinamandami Babilonia llactata tucui yalijcunaca, manllarishpa ricunajunga. Llaquichishcata ricushpaca asinajungami” ninmi.

14Babilonia llactahuan macanajungapaj shamujcuna alichirishpa, muyundi shayarichilla. Arcohuan tucui shitajcuna, flechacunata ama llaquishpa shitaichilla. Chai gentecunaca, Mandaj Diosta fiñachishpami, juchata ruranajurca.

15Muyundi shayarishpa, macanajui callaringapaca tucuicuna ninanda caparichi. Paicunaca, mishai tucurcami. Babilonia pueblo muyundi jatun pircapash, ucumanda callari rumicunandimi t'unirishpa urmashca. Mandaj Dios paicunata llaquichina punllami chayashca, paicunataca llaquichichilla. Shujcunata paicuna llaquichishcashnallata llaquichichilla.

16Babiloniapica tarpuj runatapash, cozechana punllapi hoceshuan cozechajtapash tucuchichilla. Tucuchij espadapaj ñaupajmandaca, tucuicunami paicunapaj puebloman tigranajunga. Tucuicunami, paicunapaj llactaman pacajushpa calpanajunga.

17Israelcunaca, llama chingashcashnami. Paicunataca, leongunami caita chaita calpachirca. Pundaca, Asiria llactata jatun mandajmi langarca. Pai saquishcataca, Babilonia llactata jatun mandaj Nabucodonosor shuti runami, tucuilla tullucunata ñutushpa micurca.

18Shinamandami tucuita Mandaj, israelcunapaj Taita Diosca, cashna nin: “Babilonia llactata jatun mandajtaca, paipaj llactandimi, Asiria llactata jatun mandajtashnallata llaquichigrini.

19Paita llaquichishpami, israelcunataca paicuna causashca pushtumanllata tigrachimusha. Shina tigrachimujpimi, ñuca llamacunaca Carmelo shuti urcupi, Basán, Efraín, Galaad shuti urcucunapipash, paicunapaj shungu na munajta micunajunga.

20Shinamandami chai punllacunapi, chai huatacunapica israelcuna jatun nalita rurashcata mascajpipash, na ricuringa. Judá llactapi causajcuna juchata rurashcapash, na tariringachu. Ñucallata saquishcacunapaj juchacunata cungajpimi, chashna canga” ninmi Mandaj Diosca.

21Mandaj Diosca, cashnatapashmi nin: “Merataim shuti llactapi causajcunahuan macanajungapaj vichai shamuyari. Pecod shuti llactapi causajcunata catiriashpa huañuchishpa tucuchiyari. Imashna ñuca tucuita mandashcashnallata, tucuchishpa saquiyari.

22Cai pachapica, jatun macanajuipi caparinajuimi tian. Ninandami tucuchinajun.

23¡Tucui cai pachapi tiaj llactacunata, martillohuan tacashpa faquishcashna llactaca, llaquinayaitamari tucurishca! ¡Babilonia llactaca, chashnamari tucui shuj llactacunapaj manllarina, llaquinayaita tucurishca!

24Babilonia llactalla, ñucallatami tsagnarina huascata churarcani. Chaimandami japi tucurcangui. Chaitaca, canga na yacharcanguichu. Chaipi urmashpami, prezu japi tucurcangui. Mandaj Dios ñucata na cazushcamandami, chashna tucurcangui.

25Mandaj Dios ñucami, ima valishcacunata alichishcata pascarcani. Ninanda fiñarishca cashpami, ñuca macanajunacunataca llujchircani. Tucuita Mandaj Taita Dios ñucami, caldeocunapaj llactapi imatalla rurana cashcataca ruragrini.

26Cai pacha tucuri manñacunamanda shamushpa, paihuan macanajuichi. Pai imatalla charishcacunata alichishcamanda, tucuillata llujchishpa apaichi. Tucui imalla tiashcata tucuchishpa, rumi mundundalla saquichi.

27Huañuchina pushtuman cachashpa, maltun shicunatashna tucuillata huañuchichi. ¡Aij, paicunalla! Paicunata ninanda llaquichina punllacuna, huatacunami chayamushca” ninmi.

28Babilonia llactamanda pacajushpa shamujcunaca: “Ñucanchita Mandaj Taita Diospaj huasita urmachishcamandaca, Diosllatami Babilonia llactapi causajcunataca ninanda llaquichirca” nishpa cushijushpa, Sion shuti pueblopi villanajujtami uyani.

29“Babilonia llactapi causajcunahuan macanajuchun, arcota chutashpa flechata shitanata ali yachajcunata tucuillata tandachimuichi. Paipaj muyundipi carpacunata shayachishpa shuyaichi. Pacajushpa richunga, shujllatapash na saquinachu canguichi. Paicuna rurashcashnallatami, tigrachina canguichi. Tucui imatalla pai rurashcashnallatami, paitapash rurana canguichi. Paicunaca, israelcunapaj jucha illaj Mandaj Diosta jariyashpami fiñachinajurca.

30Shinamandami paicuna puramandaca, chaira viñaicunapash plazacunapi huañuchijpi huañushpa urmanajunga. Chai punllapica, paicunapaj tucui soldadocunapashmi, tucuchi tucunajunga” ninmi Mandaj Diosca.

31Tucuita Mandaj, jatun Diosca cashnatapashmi nin: “Ricuichi, jariyashca llactalla, ñucami fiñarcani. Canda, llaquichina punlla, tucuchina huatami chayamurca.

32Jariyaj runaca, nitijashpa urmangami. Paitaca, pipash na jatarichingachu. Paipaj pueblocunapipash, ninatami japichisha. Tucui muyundi llactacunatapashmi rupachisha” ninmi.

33Tucuita Mandaj Diosca, cashnatapashmi nin: “Israelcunapash, Judá llactapi causajcunapash, tandanajushcami llaquichi tucushca causanajurca. Paicunata tucui prezu apajcunaca, na cacharingapaj munashpami charinajurca.

34Ashtahuangarin paicunata quishpichij, ninan ushaita charij, tucuita Mandaj Dios shutimi cani. Paicuna llaquichi tucushpa causanajushcamanda quishpichishpa chai llactata samachingapajpash, Babilonia llactapi causajcunata muspachingapajpash shayarishapachami” ninmi.

35Mandaj Diosca, cashnatapashmi nin: “Babilonia llactapi causaj caldeocunapajmanga, huañuchij espadami shamunga. Paicunata mandajcunapajmambash, paicunapaj ninanda yachajushca runacunapajmambashmi chashnallata shamunga.

36Espada shamushpaca, paicunapaj yachaj runacunatapash, imatapash na yachashcatashnami ruranga. Espada shamushpaca, paicunapaj ninan shinlli runacunatapashmi faquishpa tucuchinga.

37Espada shamushpaca, paicunapaj caballocunatapash, carretacunatapashmi tucuchinga. Espada shamushpaca, paicunapaj chaupipi causanajuj gentecunatapashmi llaquichinga. Paicunaca, huarmicunashnami manllanajunga. Espadahuan yaicushpami, paicuna tucui ima ninan valishcacunata charishcatapash llujchishpa apanajunga.

38Yacucunata chaquichijpimi, tucuilla chaquinga. Chai llactapica, yangalla dioscuna junda cashcamandami, chashna tucunga. Shinallata imamambash rijchajcunata ricushpallatami, juizu chingashcashna tucunajunga.

39Shinamandami Babilonia pueblopica, jichushca pambapi causaj manllanayai chacal nishca animalcunalla causanajunga. Avestruz nishca animalcunapaj huahuacunallami, chaipica causanajunga. Ashtahuangarin chaipica, mirai miraicaman pipash na cutinga causangachu” ninmi.

40Mandaj Diosca, cashnami nin: “Taita Dios ñucaca, imashnami Sodoma shuti, Gomorra shuti pueblocunataca, ladollapi tiaj caishuj pueblocunandi tucuchircani, chashnallatami Babilonia pueblopica, pillapash na causanga. Huañuna aichayu shuj runallapash, na causangachu.

41Ricuichi, jahua lado llactamanda gentecunami shamunajun. Cai pacha manña llactacunamandaca, ashtaca gentecuna ashtaca jatun mandajcunandimi jatarimunga.

42Paicunaca, arcohuambash, lanzahuambash macanajunata alipacha yachajcuna cashpami, pitapash na llaquishpa huañuchingalla. Paicuna caparishcapash, mama cucha yacu jatarishcashnami, manllanayaita uyaringa. Babiloniapi causajcunalla, chai runacunami cangunahuan macanajungapaca alichirishpa, caballocunapi tiarishpa shamunajunga.

43Chai villashcata Babilonia llactata jatun mandaj uyashpaca, paipaj maquipash shaijushcashnami tucurca. Ninanda llaquirijujpimi, ungunalla huarmitashna nanai japirca.

44Ricuichi, jatun pircahuan jarcashca pueblota llaquichingapaca, Jordán huaicu manñaman sachamanda león llujshinshnami, vichai shamunga. Ñallami chaimandaca calpachigrini. Ñuca agllashca runatami, chashna rurachun mingasha. ¿Pita ñucashnaca canga? Ñucahuanga, ¿pita chimbapurai ushanga? Ñuca llaquichijujpica, ¿maijan michij runata shayari ushanga?” ninmi.

45Shina cashcamanda Babilonia llactata fiñashpa, Mandaj Dios imata rurangapaj munashcata, caldeocunata fiñashpa imashna llaquichingapaj yarijushcata uyaichiyari. Paicunapaj llamacunataca, ashtahuan uchilla llamacunatapashmi aisashpa apangapachami. Paicuna shayana pushtucunataca, paicunandimi tucuchinga.

46Babilonia llactata japishpa caparinajujpica, alpapashmi chujchurca. Chai caparinajushcapash, tucui llactacunacamanmi uyarirca.