ISAÍAS 57 - Quichua Imbabura Bible

Yanga dioscunata mañaj israelcunaca, llaquichi tucungapachami

1“Imatapash cashcatapacha ruraj runa huañujpica, pipash paitaca na yarinllu. Pitapash llaquij, ali runacunapash huañunmi. Shina huañujpipash, imatapash cashcatapacha ruraj chai runagutaca llaquimanda anchuchishcataca, pipash na yuyaita japinllu.

2Paicuna huañushpaca, casilla aliguta causangapajmi rin. Taita Diospaj ñaupajpi ali causajcunaca tucuicunami, paicuna sirijunapi samanajunga.

3Ashtahuangarin cangunaca, ñucapajman quimirimuichi. Cangunaca, bruja huarmipaj huahuacunami canguichi. Cazarashca jahua shujcunahuan causaj runapaj, huainayashpa causaj huarmipaj miraicunami canguichi.

4¿Pitata cangunaca, asishpa ricurcanguichi? ¿Pitata shimita ninanda pascashpa, jalluta llujchishpa nalicachircanguichi? Cangunaca, ñucata na cazuj runacunapaj huahuacuna, llulla runacunapaj miraicunami canguichi.

5Cangunaca, fangasapa tucui quiru ucucunapimi, yanga dioscunahuan nalita ruranatalla ninanda munashpa puringuichi. Cangunapaj huahuacunatapash, pugru pambacunapi, jaca rumicunapimi chai dioscunaman cushpa huañuchinguichi.

6Canga, pugru pambapi tiaj llambu rumicunamandami, ima japinatapash charingui. Chaicunami, can japinataca ricuchinga. Chai rumicunamanmi, vinota talishpa ashtahuan imatapash cararcangui. Chai tucui nalita rurashcamandaca, ¿nachu llaquichina cani?

7Jatun urcu jahuapimi, cambaj camataca churarcangui. Chaiman vichai rishpami, chai dioscunaman animalcunata carashpa huañuchircangui.

8Chai diosta can yaringapaca, cambaj huasi pungu huashapimi churarcangui. Canga, ñucaman ricurina randica, shujmanmi churajushcata llujchishpa ricurircangui. Cambaj camata ashtahuan jatunyachishpami, chaiman vitsiashpa sirirircangui. Paicunapajlla causangapajmi ari nircangui. Chai dioscunahuan huainayana cama maipi ricurijpipash, chaipi siririjllami carcangui.

9Jatun mandajpajmambash, jambicunata javirishpa, mishquilla ashnajuj jambicunahuan ninanda churarishpami rircangui. Cambaj randi parlajcunata caru llactacunaman cachashpami, Seol ucucaman chayajta cumurinshna pingai tucurcangui.

10Chai tucui nalita rurashpa causashcamandami shaijurcangui. Shina cashpapash: ‘Imatapash na ashtahuan rurai ushanichu’ nitallapash na nircanguica. Cambaj maquipi ushaita japishpami shaijushpapash, na saquishpa ashtahuan catijurcanguilla.

11¿Pi manllachijpi manllarishpata, ñucata crishpa causajunataca saquircangui? ¿Pi manllachijpita, ñucata na crishpa yaritallapash na yaringui? ¿Nachu chaitaca, pundamandapacha imatapash na nishpa, imatapash na yachanshna upalla saquijpilla ima horallapash, ñucataca na manllashpa causangui?

12Imatapash cashcatapacha can rurashcatapash, imata rurashcatapash, ñucami tucuicunaman ricuchigrini. Chai rurashcacunaca, cambaca imapajpash na alichu canga.

13Cacharichihuayari nishpa, cambaj yanga dioscunata caparijujpipash, na cacharichi ushangachu. Tucui paicunataca, huairami shujta fucushpalla, tucuillata vichai apanga. Ashtahuangarin ñucata yariashpa causajmi, llactata japishpa chaipi causanga. Ñucapajlla urcupimi, causanata charinga” ninmi.

14Chaipica, cashnami ninga: “Ñanda alichishpa, llambullaguta rurashpa fichaichiyari. Ima nitijana tiajpipash, ñuca agllashcacunapaj ñanmanda anchuchichiyari” ningami.

15Paica, causaita causaicaman jahua pachapi causajmi, tucuita yali Jatun Diosmi. Paica, jucha illaj Dios shutimi. Paimi, cashna nin: “Ñucaca, ima juchapash illaj, jahua pachapimi causani. Llaquilla causajcunata, shungupi na jariyashpa causajcunata ayudashpami causani. Na jariyashpa causajcunaman, llaquilla shunguta charijcunaman causaita cungapajmi, chaipi causani.

16Ñucaca, na tucui causaipi fiñanajushpa rimarijushachu. Na fiñarishcalla causajushallachu. Chashna cajpica ñuca ñaupajpillatami, espirituta charij ñuca rurashca almayu runacunaca, ushai illaj tucunajunman.

17Israelcunataca, imatapash yapata munashpa nalita rurashcamandami, ninanda fiñarishpa llaquichircani. Ninanda fiñarishpa llaquichishpami, tigrashpallapash na ricurcani. Shina cajpipash paicunaca na cazushpami, paicunapaj shungu munashcata rurashpa catinajurca.

18Chashna ruranajujtaca ricurcanimi. Shina cajpipash, paicunataca ñucami alichisha, ñucallatami paicunataca michisha. Paicunatapash, paicunahuan llaquilla causajcunatapash cushichishami.

19Paicunapaj shimihuanga: ‘Casilla ali causaimi tian, casilla ali causaimi tian’ nishpa alicachinajuchunmi, carupi causajcunaman, ladollapi causajcunaman ali causaita carasha. Ñucami paicunataca alichisha” ninmi Mandaj Diosca.

20Ashtahuangarin Diosta na manllajcunaca, mama cucha jatarishpa, na casilla tiajui ushanshnami canga. Chai yacucuna mapata, turuta manñaman shitajunshnami canga.

21“Ñucata na manllajcunapaca, casilla ali causaica na tianllu” nircami ñuca Taita Diosca.